ដោយៈ វុត្ថា
កំពតៈ រដ្ឋបាលក្រុងកំពតបាននិងកំពុង ពង្រឹងការអនុវត្តតាមប្លង់គោលនៃហេដ្ឋារចនាសម្ព័ន្ធក្រុង រួមមានការវាស់វែងចុះបញ្ជីក្បាលដីលក្ខណៈជាប្រព័ន្ធ ការកំណត់ព្រំដែនដែនផ្លូវថ្នល់ ផ្លូវទឹក និងទីតាំងលំនៅដ្ឋានកម្មសិទ្ធិ ជាពិសេសការកែលម្អហេដ្ឋារចនាសម្ព័ន្ធនានានៅទូទាំងក្រុង ដែលរហូតមកដល់ពេលនេះ ឈានដល់ដំណាក់កាលពង្រីកសួនតាមបណ្តោយមាត់ព្រែកកំពត។
លោកជាវ តាយ អភិបាលខេត្តកំពតនៅល្ងាចថ្ងៃទី៣ ខែមករា ឆ្នាំ២០២១ បានមានប្រសាសន៍ថា ក្រោមការអនុវត្តតាមគោលនយោបាយរបស់រាជារដ្ឋាភិបាល ដែលមានសម្ដេចតេជោហ៊ុន សែន ជានាយករដ្ឋមន្ត្រីនៃកម្ពុជា ក្នុងការប្រែក្លាយខេត្តកំពតទៅជាគោលដៅទេសចរណ៍កម្រិតខ្ពស់ បច្ចុប្បន្នរដ្ឋបាលខេត្តបានយកចិត្តទុកដាក់ ក្នុងការពង្រឹងលើការអភិវឌ្ឍ និងកែលម្អនូវហេដ្ឋារចនាសម្ព័ន្ធនានាក្នុងខេត្តជាបន្តបន្ទាប់។
លោកបានបន្តថា “ពេលនេះរដ្ឋបាលខេត្ត ក្រុង បាននិងបន្តការអនុវត្តនូវការកែលម្អហេដ្ឋារចនាសម្ព័ន្ធ ដល់ការពង្រីកសួននៅតាមបណ្តោយមាត់ព្រែកកំពត ដោយក្នុងនោះមានការបែងចែកជា២ រួមមានទីតាំងសួនមាត់ព្រែក និងទីតាំងសម្រាប់ចំណតរ៉ឺម៉ក ឱ្យបានសមរម្យ” ។
ទី១ ទីតាំងមាត់ព្រែកខាងជើងស្ពានចាស់ ដើម្បីពិនិត្យលទ្ធភាពពង្រីក និងកែលម្អសួនច្បារឲ្យធំទូលាយ ដើម្បីកែលម្អសោភ័ណភាពទីក្រុងកំពត ដែលជាទីក្រុងទេសចរណ៍ទទួលបានពានរង្វាន់រំដួល៣ទង និងជាទីក្រុងស្អាតនៅអាស៊ានកាន់តែស្រស់ស្អាត។ ក្នុងនោះ លោកអភិបាលខេត្ត បានស្នើឲ្យជំនាញពិនិត្យស្ថានភាពជាក់ស្តែងនៃព្រែក ដើម្បីចាក់ខ្សាច់ប្រវែងប្រមាណ១៥ម៉ែត្របន្ថែមទៀត សម្រាប់ពង្រីកហេដ្ឋារចនាសម្ព័ន្ធ ដូចជាសួនច្បារ និងផ្លូវជាដើម។
ទី២ ចុះពិនិត្យទីតាំងចំណតរ៉ឺម៉ក ស្ថិតនៅសង្កាត់ក្រាំងអំពិល ក្រុងកំពត ដើម្បីឲ្យមានសោភ័ណភាពសម្រាប់រ៉ឺម៉កមានទីតាំងចតសមរម្យ។ ជាមួយគ្នានេះលោកអភិបាលខេត្តបានមានប្រសាសន៍ថា នឹងរៀបចំកិច្ចប្រជុំជាមួយអ្នកវិនិយោគ នៅក្នុងដើមសប្តាហ៍ក្រោយ ដើម្បីពិនិត្យលទ្ធភាពក្នុងការស្ដារ និងរៀបចំហេដ្ឋារចនាសម្ព័ន្ធដូចជា ផ្លូវបេតុង និងបន្ទប់ទឹកអនាម័យជាដើម។
នៅក្នុងផែនការរបស់រដ្ឋបាលខេត្ត បានលើកឡើងពីគម្រោងស្ដារព្រែកកំពត និងកែលំអរសោភ័ណភាព តាមដងព្រែកឱ្យបានកាន់តែល្អប្រសើរ ប្រកបដោយអនាម័យបរិស្ថាន ធានាបានសុខមាលភាពសាធារណៈ សម្រាប់ភ្ញៀវទេសចរជាតិអន្តរជាតិ មកទស្សនាកំសាន្តនៅខេត្តកំពតឱ្យបានកាន់តែច្រើនឡើង៕