ដោយ:គង់ ម៉ាលីនណា
ភ្នំពេញ: អគ្គលេខាធិការនៃសហព័ន្ឋស្រូវអង្ករកម្ពុជា លោកលុន យ៉េងបានលើកឡើងថា នៅឆ្នាំ២០២១ខាងមុខការនាំអង្ករចេញ ទៅកាន់ទីផ្សារប្រទេសអង់គ្លេស មានភាពល្អប្រសើរ ខណៈដែលក្នុងមួយឆ្នាំៗអង្ករកម្ពុជា បង្ហាញវត្តមានលក់នៅប្រទេសនេះចន្លោះប្រមាណពី៣ទៅ៤ម៉ឺនតោន។
លោកបានមានប្រសាសន៍ឲ្យដឹងកាលពីថ្ងៃម្សិលម៉ិញថា ការប្រកាសរបស់ក្រសួងពាណិជ្ជកម្មកាលពីថ្មីៗនេះ ដែលអំពាវនាវឱ្យអ្នកនាំចេញ ត្រូវមកធ្វើការស្នើសុំវិញ្ញាបនបត្របញ្ជាក់ដើមកំណើតទំនិញទម្រង់ អេ (CO FORM A) គឺជាការល្អ ដើម្បីបញ្ជាក់ប្រភពដើមកំណើតទំនិញ ដែលនឹងត្រូវនាំចេញទៅកាន់អង់គ្លេស ដោយរួចពន្ធចាប់ពីដើមខែមករា ឆ្នាំ២០២១តទៅ។
លោកបន្តថា “អង់គ្លេសបានចាកចេញពីសហគមអឺរ៉ុប ដោយបានការផ្តល់ប្រពន្ធអនុគ្រោះពន្ធ (WTO) មិនជារឿងអី្វផ្សេងឬថ្មីនោះទេ ហើយការស្នើសុំវីញ្ញាបនបត្របញ្ជាក់ដើមកំណើតទំនិញ នេះជាការគោរពតាមច្បាប់ពាណិជ្ជកម្ម” ។
លោកលុន យ៉េងបានបន្តថា ទម្រង់នឹងអត់មានអីទេ គ្រាន់តែការទៅបំពេញបែបបទនីតិវិធីប្រកាសទំនិញទេ អត់មានពាក់ព័ន្ធអ្វីទៅលើសហគមអឺរ៉ុបអីទេ ទៅប្រទេសណាក៏ត្រូវបំពេញទម្រង់ដែរ គ្រាន់តែទម្រង់ផ្សេងៗគ្នា ហៅថា FORM ផ្សេងគ្នា ទៅអាស៊ាន FORM D ទៅអាម៉េរិក FORM នេះទៅ ទៅអឺរ៉ុប FORM ផ្សេងៗគ្នា គ្រាន់ថាកន្លងមករយះពេលថ្មីៗពីមុនទៅសហគមនអឺរ៉ុប គេប្រើឌឺរ៉េច មានន័យថាបំពេញក្នុង system គេតែម្តង ឥឡូវនេះ ដោយសារប្រហែលជាអង់គ្លេសអត់ទាន់ធ្វើអីរួច អញ្ចឹងគាត់ឱ្យយើងគាត់ឱ្យយើងបំពេញតាម តាមប្រព័ន្ធដែលអាចអនុវត្តន៍បាន ដូចក្រសួងពាណិជ្ជកម្មផ្សព្វផ្សាយញ្ចឹង។
ជាមួយគ្នានេះ លោកឧកញ៉ាលឹម ហេង អនុប្រធានសភាពាណិជ្ជកម្មកម្ពុជាបានមានប្រសាសន៍ថា ការផ្តល់ប្រព័ន្ឋអនុគ្រោះពន្ឋពីអង់គ្លេស និងផ្តល់កាលានុវត្តន៍ភាពដល់ការនាំចេញរបស់កម្ពុជា ដែលធ្វើឲ្យកម្ពុជាមានលទ្ឋភាពនាំចេញ ទៅកាន់ប្រទេសនេះកាន់តែច្រើន ខណៈដែលថ្ងៃទី១ មករា ឆ្នាំ២០២១ខាងមុខនេះ កិច្ចព្រមព្រផៀងពាណិជ្ជកម្មសេរីរវាងកម្ពុជា និងមិត្តចិនចូលជាធរមានផងដែរ ដែលធ្វើឲ្យកម្ពុជាអាចទាក់ទាញវិនិយោគិនកាន់តែច្រើន ដើម្បីយកកម្ពុជាធ្វើជាមូលដ្ឋានផលិតកម្ម ជម្រុញការនាំចេញទៅកាន់ប្រទេសចិន ដើម្បីរួចពន្ឋផងដែរ។
លោកបន្តថា “សេដ្ឋកិច្ចកម្ពុជានៅឆ្នាំ២០២១ នឹងហក់ឡើងខ្ពស់ ដោយសារកម្ពុជានឹងសម្រេចបាននូវការនាំចេញកើនឡើងខ្ពស់ ពិសេសទាក់ទាញការវិនិយោគពីក្រុមហ៊ុនអន្តរជាតិកាន់តែច្រើនថែមទៀត” ៕
