ដោយៈ សាវុធ
ភ្នំពេញៈ ការនាំចេញរបស់ប្រទេសកម្ពុជាត្រូវបានរំពឹងថា នឹងទទួលបានផលចំណេញ ដោយសារការចុះហត្ថលេខាលើកិច្ចព្រមព្រៀងដ៏ធំមួយ ដែលប្រទេសចំនួន១៥ នៅអាស៊ីប៉ាស៊ីហ្វិកចូលរួម ក្នុងអំឡុងពេលកិច្ចប្រជុំកំពូលអាស៊ាន នៅទីក្រុងហាណូយ កាលពីពាក់កណ្តាលខែវិច្ឆិកា។
កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) ត្រូវបានចុះហត្ថលេខានៅចុងបញ្ចប់ នៃកិច្ចប្រជុំកំពូលអាស៊ានរយៈពេល៤ថ្ងៃ នៅថ្ងៃទី១៥ខែវិច្ឆិកា ហើយនឹងត្រូវពិនិត្យបំពេញបន្ថែម មុនពេលចូលជាធរមាន ដោយដំណើរការនេះនឹងចំណាយពេលរាប់ខែ។
លោកឧកញ៉ាលឹម ហេងអនុប្រធានសភាពាណិជ្ជកម្មកម្ពុជា បានមានប្រសាសន៍កាលចុងសប្តាហ៍កន្លងមកនេះថា នៅឆ្នាំ២០២១នេះ មានរឿងវិជ្ជមានជាច្រើនសំរាប់កម្ពុជា ទាំងការអនុវត្តន៍កិច្ចព្រមព្រៀងពាណិជ្ជកម្មសេរីជាមួយចិន ការអនុវត្តកិច្ចព្រមព្រៀង RCEP ការអនុវត្តកិច្ចព្រមព្រៀងលើកលែងពន្ឋ (GSP)ពីអង់គ្លេសដល់កម្ពុជា ដែលនឹងធ្វើឲ្យកំនើននៃការនាំចេញកម្ពុជាកើនឡើង។
លោកបន្តថា “ការវិនិយោគនៅកម្ពុជា កាន់តែទាក់ទាញច្រើនថែមទៀត ដោយក្រុមហ៊ុនចិន អាមេរិក ជប៉ុន កូរ៉េជាដើមនឹងចូលមកវិនិយោគនៅកម្ពុជា ដើម្បីនាំចេញដោយរួចពន្ឋ។
ប្រទេសហត្ថលេខីទាំង១៥ មានចិន ជប៉ុន កូរ៉េខាងត្បូង អូស្ត្រាលី នូវែលហ្សេឡង់ និងប្រទេសជាសមាជិកអាស៊ានទាំង១០ ដូចជាប្រ៊ុយណេ កម្ពុជា ឥណ្ឌូនេស៊ី ឡាវ ម៉ាឡេស៊ី មីយ៉ាន់ម៉ា ហ្វីលីពីន សិង្ហបុរី ថៃ និងវៀតណាម។
RCEP ត្រូវបានចាត់ទុកថា ជាកិច្ចព្រមព្រៀងពាណិជ្ជកម្មធំបំផុត នៅលើពិភពលោក ដែលគ្របដណ្តប់ជិតមួយភាគបី នៃចំនួនប្រជាជនពិភពលោក និងប្រហែល ៣០% នៃផលិតផលក្នុងស្រុកសរុបរបស់ពិភពលោក។
ការចុះហត្ថលេខាលើកិច្ចព្រមព្រៀង RCEP ត្រូវបានរំពឹងថានឹងជួយជំរុញពាណិជ្ជកម្មក្នុងតំបន់ ដែលធ្វើឱ្យការនាំចេញរបស់កម្ពុជាទទួលបានផលប្រយោជន៍។
RCEP ផ្តោតយ៉ាងខ្លាំងលើការកាត់បន្ថយពន្ធ និងបង្កើនការនាំចេញទៅកាន់ទីផ្សារអន្តរជាតិ ខណៈការងើបឡើងវិញ នៃសេដ្ឋកិច្ចចិនក៏នឹងជះឥទ្ធិពលវិជ្ជមាន ដល់ការងើបឡើងវិញ នៃសេដ្ឋកិច្ចកម្ពុជាផងដែរ ព្រោះប្រទេសចិនគឺជាទិសដៅសំខាន់មួយ នៃការនាំចេញរបស់កម្ពុជា៕
