ដោយៈសុខុម
មីយ៉ាន់ម៉ាៈ អំឡុងសម័យកូវីដ ខណៈមនុស្សជាច្រើនជុំវិញពិភពលោក ជួបវិបត្តិហិរញ្ញវត្ថុ ដោយសារបាត់បង់ការងារធ្វើ ថៅកែកាត់ប្រាក់ខែ អាជីវកម្មក្ស័យធន ឬផ្អាកការរកស៊ីដោយសារវិធានការទប់ស្កាត់ការឆ្លងរាតត្បាត ដែលធ្វើឱ្យពួកគេមានបញ្ហាជីវភាពរស់នៅប្រចាំថ្ងៃ ឬសូម្បីគ្មានលុយសងបំណុលធនាគារនោះ បែរជាពលរដ្ឋមីយ៉ាន់ម៉ាសម្រុកនាំគ្នាខ្ចីលុយធនាគារដើម្បីទិញផ្ទះទៅវិញ។
លោក U Khin Maung Than ប្រធានសមាគមសេវាអចលនទ្រព្យមីយ៉ាន់ម៉ា (Myanmar Real Estate Services Association) បានលើកឡើងថា អចលនទ្រព្យប្រភេទលំនៅដ្ឋាន កំពុងលក់ដាច់ខ្លាំងគួរឱ្យកត់សម្គាល់ អំឡុងសម័យកូវីដ-១៩ ដោយពលរដ្ឋខ្ចីប្រាក់ពីធនាគារមកទិញ។ នេះបើយោងតាមកាសែត Myanmar Times ចុះផ្សាយកាលពីថ្ងៃទី២៣ ធ្នូកន្លងមកនេះ។
ប្រធានសមាគមរូបនេះបានបន្តថា “កម្ចីទិញផ្ទះនៅតែទទួលបានការពេញនិយមខ្លាំងក្នុងឆ្នាំនេះ ទោះបីជាចំនួនអចលនទ្រព្យដែលលក់នៅលើទីផ្សារបានធ្លាក់ចុះក្ដី” ។
លោក U Nay Min Thu នាកយគ្រប់គ្រងគេហទំព័រ iMyanmarHouse.com បានប្រាប់ថា តម្លៃផ្ទះបានធ្លាក់ចុះ ហើយក្នុងករណីខ្លះអ្នកទិញ បានសុំបញ្ចុះតម្លៃរហូតដល់ទៅជិត ៥០%ក៏មានដែរ។ ខណៈធនាគារបន្ទាបអត្រាការប្រាក់ទាបជាងធម្មតា កម្ចីទិញផ្ទះបានក្លាយជាជម្រើស ដ៏ទាក់ទាញសម្រាប់អ្នក ដែលកំពុងសម្លឹងចង់ហក់ចូលក្នុងទីផ្សារអចលនទ្រព្យរបស់មីយ៉ាន់ម៉ា។
លោកគូសបញ្ជាក់ថា “ពលរដ្ឋមានចំណាប់អារម្មណ៍ខ្លាំង លើគម្រោងលំនៅដ្ឋាននៅជាយក្រុងយ៉ង់ហ្គូន (Yangon) និងគម្រោងលំនៅដ្ឋានក្នុងតំបន់ និងរដ្ឋផ្សេងៗទៀត។ ក្នុងក្រុងយ៉ង់ហ្គូន ពលរដ្ឋចាប់អារម្មណ៍លើអាផាតម៉ិន ដែលលក់ក្នុងតម្លៃក្រោម៥០ លានខ្យាត (Kyat) (៣៧.៣០០ ដុល្លារអាមេរិក)” ។
ប្រធានសមាគមអភិវឌ្ឍន៍អចលនទ្រព្យមីយ៉ាន់ម៉ា លោក U Tin Maung បាននិយាយថា ទីផ្សារអចលនទ្រព្យរបស់មីយ៉ាន់ម៉ា បានរងផលប៉ះពាល់ធ្ងន់ធ្ងរ ដោយសារវិធានការរឹតបន្តឹងពាក់ព័ន្ធវីរុសកូវីដ-១៩ ដែលធ្វើឱ្យការលក់សរុបធ្លាក់ចុះខ្លាំងក្នុងត្រីមាសទី២ នៃឆ្នាំ២០២០ ៕
