ដោយៈសុខុម
អន្តរជាតិ: ក្រោយពេលលោក Elon Musk ជាប់ឈ្មោះជាមហាសេដ្ឋីមានបំផុតទី២ ក្នុងពិភពលោក យ៉ាងឆាប់រហ័សកាលពីពេលថ្មីៗនេះ ស្រាប់តែលេចឮពាក្យចចាមអារ៉ាមដ៏គួរឱ្យភ្ញាក់ផ្អើលថា ម្ចាស់ក្រុមហ៊ុន Tesla រូបនេះមានបំណងចង់លក់ក្រុមហ៊ុនរបស់ខ្លួន ឱ្យទៅក្រុមហ៊ុន Apple ។
ទោះបីជាគ្មានភ័ស្ដុតាងបញ្ជាក់ថា វាជាការពិតឬយ៉ាងណាក្ដី ក៏ដំណឹងដែលថា ក្រុមហ៊ុនយក្ស Apple របស់សហរដ្ឋអាមេរិក គ្រោងផលិតរថយន្ត បានបង្កភាពរំជើបរំជួលយ៉ាងខ្លាំង។ នេះបើយោងតាមគេហទំព័រ gadgetsnow.com ចុះផ្សាយកាលពីថ្ងៃទី២៣ ធ្នូ។
យោងតាមការចុះផ្សាយរបស់ទីភ្នាក់ងារព័ត៌មាន Reuters បានឱ្យដឹងថា ក្រុមហ៊ុន Apple គ្រោងចាប់ផ្ដើមផលិតរថយន្ត ដំបូងបង្អស់របស់ខ្លួននៅត្រឹមឆ្នាំ២០២៤ ។ ហើយស្របពេលជាមួយគ្នានេះ ស្រាប់តែលោក Elon Musk អគ្គនាយកក្រុមហ៊ុន Tesla បានបង្ហើបដំណឹងដ៏គួរឱ្យចាប់អារម្មណ៍។
លោក Elon Musk បានបង្ហោះលើគណនីបណ្ដាញ ទំនាក់ទំនងសង្គមទ្វីតទ័រ ដោយលើកឡើងគួរឱ្យភ្ញាក់ផ្អើលថា លោកធ្លាប់ពិចារណាលក់ក្រុមហ៊ុន Tesla ឱ្យទៅក្រុមហ៊ុន Apple ប៉ុន្តែអគ្គនាយករបស់ Apple គឺលោក Tim Cook បានបដិសេធមិនជួបពិភាក្សាជាមួយលោកឡើយ។
លោកបានលើកឡើងយ៉ាងដូច្នេះថា “អំឡុងពេលដ៏លំបាកបំផុត ដែលយើងបានជួបប្រទះក្នុងកម្មវិធីផលិតរថយន្តអគ្គិសនី Model 3 ខ្ញុំបានព្យាយាមទាក់ទងទៅលោក Tim Cook ដើម្បីពិភាក្សាគ្នាអំពីលទ្ធភាពក្រុមហ៊ុន Apple ទិញយកក្រុមហ៊ុន Tesla (១/១០ នៃទ្រព្យសកម្មរបស់យើង) ។ ប៉ុន្តែគាត់បានបដិសេធមិនព្រមជួបនោះទេ” ។
ទោះជាយ៉ាងណា អគ្គនាយកក្រុមហ៊ុន Tesla រូបនេះមិនបានបញ្ជាក់ពីកាលបរិច្ឆេទជាក់លាក់ ដែលលោកណាត់ជួបពិភាក្សាជាមួយលោក Tim Cook ឡើយ ប៉ុន្តែគេជឿថា ប្រហែលជាអំឡុងឆ្នាំ២០១៥ ៕
