ដោយៈលក្ខិណា
ភ្នំពេញៈ កំពត និងកែប គឺជាខេត្តដ៏មានសក្ដានុពលមួយ សម្រាប់ទាក់ទាញវិនិយោគិនពីក្នុង និងក្រៅប្រទេសបណ្ដាក់ទុនវិនិយោគ នៅក្នុងវិស័យអចលនទ្រព្យ ក្នុងនោះគេឃើញថា ទាំងរដ្ឋបាលខេត្តទាំងពីរ និងបណ្ដាវិនិយោគិននានា បានបង្ហាញពីភាពទាក់ទាញដល់បណ្ដាវិនិយោគិនដទៃទៀត ទៅបណ្ដាក់ទុនវិនិយោគ នៅក្នុងខេត្តជាប់សមុទ្រទាំងពីរនេះផងដែរ។
លោកសុខ គែន ភ្នាក់ងារអចលនទ្រព្យមួយរូបប្រចាំខេត្តកំពតបានឱ្យដឹងផងដែរថា មួយរយៈនេះ លោកមើលឃើញថាវិនិយោគិនជាច្រើនបាន និងកំពុងសម្លឹងឆ្ពោះមករកការវិនិយោគនៅក្នុងខេត្តកំពត ក្នុងនោះដែរ គម្រោងអគារធំៗនៅក្នុងខេត្តកំពតបានក្លាយជាធ្នាក់មួយ សម្រាប់ទាក់ទាញវិនិយោគដទៃទៀត ចូលមកកាន់ទឹកដីខេត្តកំពត ដូចជាអគាររបស់ក្រុមហ៊ុនថៃប៊ុនរ៉ុង និងគម្រោងបុរីមួយចំនួននៅជាងទីរួមខេត្តកំពតជាដើម ។
លោកបន្តថា “ការវិនិយោគនៅក្នុងខេត្តកំពត បើទោះបីជាមានវិបត្តិដោយសារតែកូវីដ១៩ក្ដី តែការទិញលក់និងតម្លៃដីធ្លី ក្នុងខេត្តមួយនេះ នៅតែមានសភាពល្អប្រសើរ ដោយមានអ្នកស្វែងរកទិញដី សម្រាប់ទុកលក់បន្ត និងអ្នកទិញដីសម្រាប់អភិវឌ្ឍន៍នៅពេលអនាគត ហើយក៏មិនមានស្ងប់ស្ងាត់នោះដែរ” ។ លោកថា “អ្វីដែលសំខាន់សម្រាប់ខេត្តកំពតដែលអាចទាញ វិនិយោគិនមកបណ្ដាក់ទុនបាននោះ ដោយសារតែហេដ្ឋារចនាសម្ព័ន្ធតភ្ជាប់ពីភ្នំពេញ មកកាន់ខេត្តកំពត ត្រូវបានស្ថាបនាជាថ្មី និងមានភាពងាយស្រួល ដែលធ្វើឱ្យរយៈពេលនៃការធ្វើដំណើរ ពីភ្នំពេញទៅកាន់ខេត្តកំពតកាន់តែខ្លី” ។
ក្រៅពីនេះដែរ នៅកំពតក៏មានកំពង់ផែទឹកជ្រៅមួយ ដ៏មានសក្ដានុពលផងដែរ ដែលជាចំណុចទាក់ទាញវិនិយោគិនជាច្រើនទៀត។
ចំណែកលោកងិន ភារម្យភ្នាក់ងារអចលនទ្រព្យនៅខេត្តកែប ក៏បាននិយាយផងដែរថា បច្ចុប្បន្ន អ្នកមកពីភ្នំពេញ គឺជាអ្នករកទិញដីធ្លីនៅក្នុងខេត្តកែប ដើម្បីអភិវឌ្ឍន៍នៅពេលអនាគត ហើយមានអ្នកខ្លះ ក៏ទិញសម្រាប់ទុកចំណេញអនាគតដែរ។
លោកបន្តថា “សក្ដានុពលសម្រាប់អភិវឌ្ឍន៍ នៅខេត្តកែបនាពេលនេះ ព្រោះថាខេត្តនេះគឺជាគោលដៅ ទេសចរណ៍ដ៏សំខាន់មួយនៅពេលបច្ចុប្បន្ននេះ នៅពេលអនាគត ហើយហេដ្ឋារចនាសម្ព័ន្ធ ផ្លូវក៏មានភាពងាយស្រួលតពីភ្នំពេញផងដែរ” ។
ជាមួយគ្នានេះ លោកច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនទ្រព្យកម្ពុជា បានមានប្រសាសន៍ថាកំពត និងកែប គឺជាតំបន់ទេសចរណ៍សំបូរបែប ដោយមានភ្នំ សមុទ្រ មានជ្រោះ មានព្រែក ដែលក្លាយជាតំបន់ទាក់ទាញ សម្រាប់វិនិយោគិន ជាពិសេសសម្រាប់អភិវឌ្ឍន៍ជាលំនៅឋានលំហែកាយ ហើយក៏អាចនឹងពេញនិយមសម្រាប់ពេលអនាគត៕
