ដោយលក្ខិណា
ភ្នំពេញៈ ចាប់តាំងពីក្រោយវិបត្តិសេដ្ឋកិច្ចអំឡុងឆ្នាំ២០០៨ និង២០០៩មកវិនិយោគិនបរទេសមកពីគ្រប់ទិសទី បានចូលមកបណ្ដាក់ទុនជាហូរហែរ ក្នុងប្រទេសកម្ពុជា ដែលជំរុញឱ្យកម្ពុជា ជាពិសេសនៅរាជធានីភ្នំពេញមានអគារខ្ពស់ៗ និងធ្វើឱ្យភ្នំពេញកាន់តែមានសភាពប្លែកលើកមុខមាត់ ដល់ប្រទេសកម្ពុជាមួយកម្រិតទៀត។
តើកត្តាអ្វីដែលជំរុញឱ្យវិនិយោគបរទេស ចូលចិត្តមកបណ្ដាក់ទុនវិនិយោគនៅក្នុងប្រទេសកម្ពុជា?។
លោកឧកញ៉ាចេង ខេង អគ្គនាយកក្រុមហ៊ុនស៊ីភីអិល បានលើកឡើងកន្លងមកថា កម្ពុជា គឺជាប្រទេសមួយដែលមានការចាប់អារម្មណ៍ពីបរទេស ហើយអាចនិយាយបានជាកូនក្រមុំមួយរូបមិនទាន់តែងខ្លួន ។ អ្វីដែលពិសេសនោះកម្ពុជាជាចំណុចកណ្ដាលអាស៊ាន និងមានភាពងាយស្រួល ក្នុងការដឹកជញ្ជូនពីកម្ពុជាទៅកាន់បណ្ដាប្រទេស ក្នុងតំបន់អាស៊ាន ទាំងផ្លូវគោក ផ្លូវទឹក និងផ្លូវអាកាស ។
លោកឧកញ៉ាបន្តថា “នៅក្នុងរយៈពេលជាងពីរទសវត្សរ៍កន្លងមកនេះ កំណើនសេដ្ឋកិច្ច ក៏រក្សាបានក្នុងរង្វង់ប្រមាណ៧ភាគរយផងដែរ ដោយសារតែស្ថិរភាពនយោបាយ សន្តិភាព។ លោកបន្តថា “ម្យ៉ាងទៀតតម្លៃដីនៅកម្ពុជា ក៏នៅមានកម្រិតបើធៀបនឹងប្រទេសផ្សេងទៀត ដូច្នេះហើយទើបវិនិយោគិនបរទេសតែងតែចង់មកដាក់ទុន” ។
លោកឧកញ៉ាបន្ថែមថា អ្វីដែលអ្នកក្នុងស្រុកត្រូវត្រៀម សម្រាប់ទទួលវិនិយោគិនបរទេស ដែលនឹងចូលមកបណ្ដាក់ទុនបន្តបន្ទាប់ទៀត គឺត្រូវមានអ្នកដែលមានជំនាញធនធានមនុស្សបច្ចេកទេស ជាពិសេសនោះ អ្នកដែលធ្វើវិស័យអ្វីមួយត្រូវមានវិជ្ជាជីវៈច្បាស់លាស់ ។
សម្ដេចតេជោហ៊ុន សែននាយករដ្ឋមន្ត្រីនៃព្រះរាជាណាចក្រកម្ពុជា ធ្លាប់បានមានប្រសាសន៍កម្ពុជា ស្វាគមន៍រាល់វិនិយោគិនមកពីគ្រប់ទិសទី ដោយបើកចំហរ ហើយវិនិយោគិនបរទេស អាចបណ្ដាក់ទុនវិនិយោគបើកអាជីវកម្មរកស៊ី ឬបើកក្រុមហ៊ុននៅក្នុងប្រទេសកម្ពុជា ដោយមិនចាំបាច់មានការសហការជាមួយអ្នកនៅក្នុងប្រទេសឡើយ។
កត្តាទាំងនេះ គឺជាអ្វីដែលវិនិយោគិនបរទេស ចូលមកបណ្ដាក់ទុនវិនិយោគនៅក្នុងប្រទេសកម្ពុជា ជាពិសេសបណ្ដាក់ទុនវិនិយោគ នៅក្នុងវិស័យអចលនទ្រព្យ ដែលជំរុញ ឱ្យវិស័យនេះ ក្លាយជាវិស័យស្នូលក្នុងកំណើនសេដ្ឋកិច្ច ហើយបើទោះបីជាកម្ពុជាជួបវិបត្តិដោយសារតែជំងឺកូវីដ១៩ក្ដី ក៏ក្រុមប្រឹក្សាអភិវឌ្ឍន៍កម្ពុជា ឃើញថាកម្ពុជានៅតែទទួលបានគម្រោងវិនិយោគិនជាបន្តបន្ទាប់ និងបង្កើតការងារជាច្រើនដល់ពលរដ្ឋផងដែរ។
កត្តាសុខសន្តិភាព ស្ថេរភាពនយោបាយ ស្ថេរភាពសង្គម និងកំនើនសេដ្ឋកិច្ចយ៉ាងរ៉ឹងមាំ ការអនុម័តច្បាប់សហកម្មសិទ្ឋកាលពីឆ្នាំ២០១០ ដែលអនុញ្ញាត្តឲ្យជនបរទេសជិតផ្ទះចាប់ពីជាន់ទី១ឡើងបាន ក៏ជាកត្តាសំខាន់មិនអាចខ្វះបានសំរាប់ទាក់ទាញវិនិយោគិនបរទេសផងដែរ។ នេះបើតាមការអះអាងរបស់លោកយិន លាងគង់ទីប្រឹក្សាសមាគមអចលនទ្រព្យសកល។
លោកបន្តថា “ការមានច្បាប់ពន្ឋដែលមិនមានភាពស្មុគ្រស្មាញ និងគ្មានការរើសអើងរវាងអ្នកវិនិយោគក្នុងស្រុក និងបរទេស ពិសេសជនបរទេសអាចបោះទុនវិនិយោគ១០០ភាគរយបាននៅទីនេះ សុទ្ឋតែជាកត្តាស្នូលដែលរុញសេដ្ឋកិច្ចកម្ពុជា កើនឡើងជាប្រចាំ ពិសេសទាក់ទាញលំហូរវិនិយោគផ្ទាល់ពីបរទេស៕
