ដោយៈ គង់ សូរិយា
ភ្នំពេញៈ លោកឧបនាយករដ្ឋមន្រ្តីសាយ សំអាល់ រដ្ឋមន្រ្តីក្រសួង រៀបចំដែនដី នគរូបនីយកម្ម និងសំណង់បានបើកកិច្ចប្រជុំ និងពិភាក្សាទាក់ទងនឹងការរៀបចំច្បាប់ចំនួន៦។
លោករដ្ឋមន្រ្តីបានបើកកិច្ចប្រជុំកាកើពីថ្ងៃទី២៣ ឧសភា ដោយបានរំពឹងថា ក្នុងពេលឆាប់ៗខាងមុខ កម្ពុជានឹងមានច្បាប់និងលិខិតបទដ្ឋានគ្រប់គ្រាន់ល្មម សម្រាប់គ្រប់គ្រងប្រកបដោយប្រសិទ្ធភាពរាល់វិស័យស្ថិតក្រោមសមត្ថកិច្ចរបស់ខ្លួន សម្រាប់ធានានិងជំរុញការអភិវឌ្ឍសេដ្ឋកិច្ចនិងសង្គមក្នុងរយៈពេលវែង។
អង្គប្រជុំបានឲ្យដឹងថា បន្ថែមលើច្បាប់ និងលិខិតបទដ្ឋានគតិយុត្តិ ដែលមានស្រាប់ ក្រសួងបាន និងកំពុងជំរុញបញ្ចប់សេចក្តីព្រាងច្បាប់ភូមិបាលថ្មី ច្បាប់ស្តីពីការរៀបចំដែនដី ច្បាប់ស្តីពីនគរូបនីយកម្ម ច្បាប់ស្តីលំនៅឋាន ច្បាប់ស្តីពីការវាស់វែង និងការផលិតផែនទី ក៏ដូចជា ច្បាប់ស្តីពីវិជ្ជាជីវៈស្ថាបត្យករផងដែរ៕
