ដោយៈ គង់ សូរិយា
ភ្នំពេញៈ ប្រសិនជាគ្មានអ្វីប្រែប្រួលទេនោះ អាកាសយានដ្ឋានអន្តរជាតិតេជោ នឹងបើកដំណើរការជាផ្លូវការនៅថ្ងៃទី៩ កញ្ញាខាងមុខនេះ បន្ទាប់ពីការប្រកាសបើកដំណើរការ នៅដើមខែកក្កដា ត្រូវបានពន្យាពេល។
ជាមួយគ្នានេះនៅដើមសប្តាហ៍ក្រោម ក្រុមហ៊ុនអាកាសចរណ៍ជាតិកម្ពុជា Air Cambodia ក៏នឹងធ្វើពិធីទទួលស្វាគមន៍នូវយន្តហោះថ្មីATR 72-600 ផងដែរ។
យោងតាមសេចក្តីជូនដំណឹង របស់រដ្ឋលេខាធិការដ្ឋានអាកាសចរណ៍ស៊ីវិល(SSCA) ដែលចុះហត្ថលេខា ដោយលោកម៉ៅ ហាវណ្ណាល់
រដ្ឋមន្ត្រីប្រតិភូអមនាយករដ្ឋមន្រ្តី ទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល នៅថ្ងៃទី២៣ ខែឧសភា នេះ បានឱ្យដឹងថា យោងតាមចំណារ របស់លោកនាយករដ្ឋមន្ត្រី ហ៊ុន ម៉ាណែត ចុះថ្ងៃទី២១ ខែឧសភា ឆ្នាំ២០២៥ បានកំណត់យកថ្ងៃទី៩ ខែកញ្ញា ឆ្នាំ២០២៥ ជាកាលបរិច្ឆេទ បើកឱ្យប្រតិបត្តិការអាកាសយានដ្ឋាន អន្តរជាតិតេជោ លំដាប់ថ្នាក់4Fជាផ្លូវការ និងកំណត់យកថ្ងៃទី២០ ខែតុលា ឆ្នាំ២០២៥ សម្រាប់រៀបចំពិធីសម្ពោធ បើកឱ្យប្រើប្រាស់អាកាសយានដ្ឋានអន្តរជាតិតេជោ លំដាប់ថ្នាក់4F ជាផ្លូវការក្រោមអធិបតីភាពសម្តេចធិបតីហ៊ុន ម៉ាណែតនាយករដ្ឋមន្រ្តីនៃកម្ពុជា។
អាកាសយានដ្ឋានអន្តរជាតិតេជោ គឺជាគម្រោងវិនិយោគគ្នារវាងរដ្ឋ និងឯកជន ដោយក្រុមហ៊ុនឯកជនOCIC មានភាគហ៊ុន៩០ភាគរយ និងរដ្ឋលេខាធិការដ្ឋានអាកាសចរណ៍ស៊ីវិល(SSCA)១០ភាគរយ។ អាកាសយានដ្ឋាននេះ បានបើកការដ្ឋានសាងសង់កាលពីថ្ងៃទី៧ ខែមករា ឆ្នាំ២០២០ លើផ្ទៃដីទំហំ២៦០០ ហិកតា ស្ថិតនៅចម្ងាយ១៩គីឡូម៉ែត្រភាគខាងត្បូង រាជធានីភ្នំពេញជាមួយនឹងទុនវិនិយោគប្រមាណ១,៥ពាន់លានដុល្លារ(មិនគិតបញ្ចូលតម្លៃដី)។
អាកាសយានដ្ឋានអន្តរជាតិតេជោ គឺជាប្រភេទអាកាសយានដ្ឋាន Greenfield ដែលមានខ្នាតធំលំដាប់ 4F និងអាចអនុញ្ញាតឱ្យយន្តហោះប្រភេទធុនធំៗដូចជា Airbus A380-800 និង យន្តហោះ Boeing 747-800 ចុះចតបាន។
អាកាសយានដ្ឋាននេះ រចនាឡើងជា៣ដំណាក់កាល ដោយដំណាក់កាល១ ពីឆ្នាំ២០២០ ដល់២០៣០ អាចទទួលភ្ញៀវបានចំនួន ១៥លាននាក់។ ដំណាក់កាលទី២ ឆ្នាំ២០៣០ ដល់ឆ្នាំ២០៥០ ទទួលភ្ញៀវបាន៣០លាននាក់ និងដំណាក់កាលពី៣ ចាប់ពីឆ្នាំ២០៥០ អាចទទួលភ្ញៀវបាន៥០លាននាក់។
រដ្ឋលេខាធិការ និងជាអ្នកនាំពាក្យនៃរដ្ឋលេខាធិការដ្ឋានអាកាសចរណ៍ស៊ីវិល លោក ស៊ីន ចាន់សិរីវុត្ថា បានមានប្រសាសន៍ឲ្យដឹងថា ក្រៅពីដំណឹងនៃការបើកដំណើរការ អាកាសយានដ្ឋានអន្តរជាតិតេជា គឺនៅសប្តាហ៍ក្រោយ ក្រុមហ៊ុនអាកាសចរណ៍ជាតិកម្ពុជា Air Cambodia ក៏នឹងធ្វើពិធីទទួលស្វាគមន៍នូវយន្តហោះថ្មី ATR 72-600 ផងដែរ។
លោកបានថ្លែងថា “វិស័យអាកាសចរណ៍កម្ពុជា កំពុងបង្ហាញពីភាពវិជ្ជមានជាបន្តបន្ទាប់ ដោយនៅថ្ងៃទី២៦ ខែឧសភា នេះក្រុមហ៊ុន Air Cambodia ក៏នឹងធ្វើពិធីស្វាគមន៍ ការមកដល់នៃយន្តហោះថ្មី ATR 72-600 ដែលផលិតនៅប្រទេសបារាំងផងដែរ”។
យោងតាមរបាយការណ៍ របស់រដ្ឋលេខាធិការដ្ឋានអាកាសចរណ៍ស៊ីវិលកម្ពុជា ឱ្យដឹងថា វិស័យដឹកជញ្ជូនតាមផ្លូវអាកាសរបស់អាកាសយានដ្ឋានអន្តរជាតិទាំង៣នៅកម្ពុជា (អាកាសយានដ្ឋានអន្តរជាតិភ្នំពេញ សៀមរាប និងខេត្តព្រះសីហនុ) កាលពីឆ្នាំ ២០២៤ បានកើនឡើងគួរឱ្យកត់សម្គាល់ ដោយទទួលបានជើងហោះហើរចេញ-ចូល(ទ្វេទិស) សរុប៥៨,៣៥៤ កើនឡើង១៤ភាគរយ បើធៀបនឹងឆ្នាំ ២០២៣ និងអ្នកដំណើរឆ្លងកាត់ចេញ-ចូល(ទ្វេរទិស) មានចំនួន៦, ២៤១,៨៤២នាក់ កើនឡើង២២ភាគរយ។
ចំណែកទំនិញដឹកជញ្ជូន តាមផ្លូវអាកាសចេញ-ចូល(ទ្វេទិស) មានចំនួន៧៧,៧៥២តោន កើនឡើង៤០ភាគរយ។
កន្លងមកថ្នាក់ដឹកនាំរដ្ឋាភិបាល និងតំណាងក្រុមហ៊ុនវិនិយោគអាកាសយានដ្ឋានអន្តរជាតិតេជោ ធ្លាប់បានប្រាប់បណ្តាញសារព័ត៌មានថា នៅពេលអាកាសយានដ្ឋានអន្តរជាតិតេជោ បើកដំណើរការ គឺគ្រប់ប្រតិបត្តិការទាំងអស់ នៅអាកាសយានដ្ឋានអន្តរជាតិពោធិ៍ចិនតុង នឹងត្រូវបិទបញ្ចប់។
សម្តេចនាយករដ្ឋមន្ត្រីកម្ពុជា លោក ហ៊ុន ម៉ាណែត កាលពីថ្ងៃទី១៦ ខែឧសភា ក្នុងឱកាសអញ្ជើញជាអធិបតី ក្នុងពិធីអបអរសាទរខួបលើកទី៨០ ថ្ងៃកំណើតនគរបាលជាតិកម្ពុជាបានថ្លែងថា បន្ទាប់ពីបញ្ចប់ប្រតិបត្តិការ ទីតាំង(ដី) អាកាសយានដ្ឋានអន្តរជាតិភ្នំពេញ នឹងត្រូវប្រគល់រដ្ឋលេខាធិការដ្ឋានអាកាសចរណ៍ស៊ីវិល ជាអ្នកគ្រប់គ្រង និងឱ្យសមត្ថកិច្ចជួយថែរក្សាទ្រព្យសម្បត្តិនានា។
សម្តេចបន្តថា អាកាសយានដ្ឋានអន្តរជាតិភ្នំពេញ ត្រូវរក្សាឱ្យបាននូវតម្លៃប្រវត្តិសាស្ត្រ ឱ្យពលរដ្ឋប្រើប្រាស់ជាអតិបរមា និងប្រើប្រាស់ឱ្យមានចីរភាព ហើយនៅតែជាសម្បត្តិរបស់រដ្ឋ។
លោកបញ្ជាក់ថា “ព្រលានយន្តហោះពោធិ៍ចិនតុង ប៉ុន្មានថ្ងៃនេះឃើញមានការនិយាយផុសផុល អំពីការលក់ព្រលានយន្តហោះនេះ”។ សម្តចបញ្ជាក់ថា “ខ្ញុំឃើញអ្នកខ្លះថា ច្បាស់ណាស់រាជរដ្ឋាភិបាលលក់ព្រលានយន្តហោះនេះឱ្យវិស័យឯកជន១៥ឆ្នាំមុន”។
សម្តេចបានលើកជាសំណួរថា តើបានមកពីណា? ១៥ឆ្នាំមុន យើងមិនទាន់គ្រោងធ្វើព្រលានយន្តហោះថ្មីផង។ បើមានសូមឱ្យឯកសារហ្នឹងមក ក្រែងខ្ញុំមិនដឹង ព្រោះមានតែ២នាក់ទេដែលមានសិទ្ធិក្នុងការសម្រេចដោះដូរ គឺសម្តេចតេជោ អតីតនាយករដ្ឋមន្ត្រីនៅអាណត្តិមុន និងរូបខ្ញុំជានាយករដ្ឋមន្ត្រីក្នុងអាណត្តិនេះ។
សម្តេចបញ្ជាក់ទៀតថា “យើងទាំង២នាក់ អត់ដែលបានដឹងពីគម្រោង នៅក្នុងការលក់ព្រលានយន្តហោះពោធិ៍ចិនតុង។ អឺចឹងអ្នកដែលនិយាយជជែកគ្នាខ្ញុំសុំឱ្យបញ្ចប់”៕
