ដោយៈសុខុម
ភ្នំពេញៈ យោងតាមអង្គការអន្តរជាតិខាងការងារ (ILO)បានឱ្យដឹងថា ការផ្ទុះការឆ្លងរាតត្បាតវីរុសកូវីដ-១៩ បានបង្កផលប៉ះពាល់យ៉ាងធ្ងន់ធ្ងរមកលើសេដ្ឋកិច្ច និងធ្វើឱ្យបាត់បង់ការងារជាង៨១កន្លែងក្នុងឆ្នាំ២០២០ ។ នេះបើយោងតាមសារព័ត៌មាន TheEdgeMarkets ចុះផ្សាយកាលពីថ្ងៃទី១៦ ធ្នូនេះ។
លោកស្រី Chihoko Asada Miyakawa នាយកប្រចាំតំបន់អាស៊ីប៉ាស៊ីហ្វិកនៃអង្គការ ILO បានលើកឡើងតាមរយៈសេចក្ដីថ្លែងការណ៍ កាលពីថ្ងៃអង្គារ ទី១៥ ធ្នូថា “វីរុសកូវីដ-១៩ បានវាយប្រហារយ៉ាងធ្ងន់ធ្ងរ មកលើទីផ្សារការងារក្នុងតំបន់។ ការការពារសន្តិសុខសង្គម ដែលមានកម្រិតទាប និងសមត្ថភាពនៅមានកម្រិតរបស់ស្ថាប័ន ក្នុងប្រទេសជាច្រើនបានធ្វើឱ្យក្រុមហ៊ុនសហគ្រាស និងកម្មករ និយោជិត ពិបាកនឹងក្រោកឈរឡើងវិញ” ។
របាយការណ៍របស់អង្គការនេះបានបង្ហាញថា អត្រាការងារក្នុងតំបន់អាស៊ីប៉ាស៊ី ហ្វិកបានធ្លាក់ចុះ ៤,២ភាគរយ បើធៀបនឹងអត្រាមុនពេលមានវិបត្តិសកលនេះ ដោយស្ត្រីមានចំនួន ៤,៦% ហើយបុរសមានចំនួន៤% ។ យុវវ័យបានរងផលប៉ះពាល់ខ្លាំងជាងគេទាំងអស់ ព្រោះពួកគេធ្វើការគិតថ្លៃកម្លាំងពលកម្មតាមម៉ោង ហើយឱកាសបាត់បង់ការងាររបស់ពួកគេខ្ពស់ជាងអ្នកផ្សេងពី៣ ទៅ១៨ដង។
ដោយសារការងារគិតថ្លៃកម្លាំងពលកម្មតាមម៉ោងមានតិច បានធ្វើឱ្យប្រាក់ចំណូលជាមធ្យមកំពុងធ្លាក់ចុះ។ គិតជាសរុប ប្រាក់ចំណូលបានពីកម្លាំងពលកម្ម ក្នុងតំបន់បានធ្លាក់ចុះរហូតដល់ ៩,៩% ក្នុងរយៈពេល៣ត្រីមាសនៃឆ្នាំ២០២០ ដែលស្មើនឹងការធ្លាក់ចុះ GDP (ផលិតផលក្នុងស្រុកសរុប) ៣,៤% ។
យោងតាមរបាយការណ៍ដដែលឱ្យដឹងទៀតថា “កម្មករ និយោជិតយ៉ាងច្រើនត្រូវបានរុញទម្លាក់ចូលក្នុងភាពក្រីក្រ។ សេដ្ឋកិច្ច កម្មករនិយោជិត និងក្រុមហ៊ុនសហគ្រាសក្នុងតំបន់កំពុងប្រឹងប្រែងយ៉ាងខ្លាំង ដើម្បីងើបចេញពីវិបត្តិនេះ និងបោះជំហានឆ្ពោះទៅរកកំណើនប្រកបដោយបរិយាប័ន (inclusive growth)” ៕
