ដោយ: គង់ លាងហួរ
អន្តរជាតិ: ប្រទេសឡាវកំពុងបន្តសាងសង់គម្រោងទំនប់វារីអគ្គិសនីខ្នាតយក្សតម្លៃ៣ពាន់លានដុល្លារនៅជិតតំបន់បេតិកភណ្ឌពិភពលោករបស់អង្គការយូណេស្កូស្ថិតក្នុងទីក្រុងហ្លួងព្រះបាង។
ទំនប់វារីអគ្គិសនីនៅទីក្រុងហ្លួងព្រះបាង នឹងមានសមត្ថភាពផលិតថាមពល១.៤៦០មេហ្គាវ៉ាត់ក្នុងមួយឆ្នាំ និងជាទំនប់វារីអគ្គិសនីទី៣ នៅក្នុងប្រទេសឡាវ ដែលអាចបិទខ្ទប់សរសៃឈាមដ៏សំខាន់នៃលំហូរទឹកទន្លេមេគង្គក្រោម។
គម្រោងនេះត្រូវបានរំពឹងថា នឹងបើកដាក់ឱ្យប្រើប្រាស់នៅឆ្នាំ២០២៧ខាងមុខ ខណៈការងារសាងសង់កំពុងដំណើរការទៅមុខយ៉ាងឆាប់រហ័ស បន្ទាប់ពីបើកការដ្ឋានកាលពីឆ្នាំ២០២០។
ស្ថិតក្រោមការសាងសង់ដោយសម្ព័ន្ធក្រុមហ៊ុនថៃ និងបណ្តាក្រុមហ៊ុនដទៃទៀត ទំនប់វារីអគ្គិសនីនៅទីក្រុងហ្លួងព្រះបាងជាផ្នែកមួយនៃមហិច្ឆិតារបស់ប្រទេសឡាវក្នុងការប្រែក្លាយជាប្រទេសនាំចេញថាមពលអគ្គិសនីឈានមុខគេក្នុងតំបន់។
ក្នុងរយៈពេល២ទស្សវត្សន៍កន្លងមកនេះ ការវិនិយោគលើគម្រោងសាងសង់ទំនប់វារីអគ្គិសនីទាំងអស់នៅក្នុងប្រទេសឡាវមានទំហំទឹកប្រាក់ប្រហែល៤០ពាន់លានដុល្លារអាមេរិក ខណៈដើមទុនភាគច្រើនទទួលបានពីធនាគារបរទេស។
យ៉ាងណាមិញ ការសាងសង់ទំនប់វារីអគ្គិសនីនេះកំពុងជះផលប៉ះពាល់ដល់ឧស្សាហកម្មទេសចរណ៍ក្នុងទីក្រុងហ្លួងព្រះបាង (Luang Prabang) ដែលជាតំបន់បេតិកភណ្ឌពិភពលោករបស់អង្គការយូណេស្កូ។
មគ្គុទ្ទេសក៍ទេសចរណ៍ឡាវមួយរូបបានអះអាងថា ជនបរទេសដែលមកកំសាន្តនៅទីនេះចូលចិត្តជិះទូកដើម្បីមើលសម្រស់ធម្មជាតិ ដើមឈើ សត្វស្លាប និងគោក្របីតាមមាត់ទន្លេដូចកាលពីមុន។
ទោះជាយ៉ាងណា នាពេលនេះ ច្រាំងទន្លេកំពុងបាក់ស្រុត ដោយសារការស្ថាបនាគម្រោងទំនប់វារីអគ្គិសនីខាងលើ។
ម៉្យាងទៀត ក្រុមអ្នកជំនាញបានព្រមានថា ទំនប់វារីអគ្គិសនីនៅទីក្រុងហ្លួងព្រះបាងនឹងបំផ្លាញធនធានជលផលទឹកសាប ដែលជាប្រភពជាតិកាឡូរីដ៏សំខាន់សម្រាប់ប្រជាជនក្នុងតំបន់៕ប្រភព: MRC៕
