ដោយៈ លក្ខិណា
ភ្នំពេញៈ យោងតាមសារព័ត៌មានជប៉ុន NHK បានឱ្យដឹងថា អត្រាតម្លៃដឹកទំនិញតាមកុងតឺន័រ កំពុងតែមានការកើនឡើងខ្លាំងនៅទូទាំងពិភពលោក ដោយសារតែជំងឺរាតត្បាតជះផលប៉ះពាល់លើការដឹកជញ្ជូន។
សារព័ត៌មានមួយនេះ នៅថ្ងៃទី១៥ ខែធ្នូ ឆ្នាំ២០២០បានបង្ហាញថា ការចំណាយលើការដឹកជញ្ជូនតាមកុងតឺន័រ ដែលមានប្រវែង៤០ហ្វីតពីប្រទេសចិន ទៅកាន់អាមេរិក បានកើនឡើងដល់តម្លៃ៣.៨៧៤ដុល្លារ កាលពីដើមខែធ្នូឆ្នាំ២០២០នេះ។ ចំនួននេះច្រើនជាងរយៈពេលដូចគ្នាកាលពីឆ្នាំមុនចំនួន២,៨ដង។
ការវិភាគនេះ បានមកពីក្រុមហ៊ុន Freightos ដែលមានមូលដ្ឋាននៅទីក្រុងហុងកុងដែលតាមដានអត្រាដឹកជញ្ជូន។
យោងតាមក្រុមហ៊ុន Freightos បានឱ្យដឹងថា ការគិតថ្លៃដឹកទំនិញអន្តរជាតិបានកើនឡើង ក្នុងរយៈពេលប៉ុន្មានខែចុងក្រោយនេះ។ បរិមាណទំនិញបានកើនឡើងយ៉ាងឆាប់រហ័ស នៅពេលសកម្មភាពសេដ្ឋកិច្ច បានកើនឡើងនៅសហរដ្ឋអាមេរិក និងខណៈពេលដែលប្រជាជនស្នាក់នៅផ្ទះ បានបង្កើតនូវតម្រូវការថ្មី។
ចំណែករដ្ឋមន្ត្រីក្រសួងពាណិជ្ជកម្មរបស់ប្រទេសថៃ បានធ្វើដំណើរទស្សនកិច្ចនៅកំពង់ផែមួយក្នុងទីក្រុងបាងកក ហើយបាននិយាយថា លោកនឹងពិចារណាលើវិធានការ ដើម្បីជួយដល់ក្រុមហ៊ុននាំចេញក្នុងការដឹកជញ្ជូនទំនិញ។
ទន្ទឹមនឹងនេះដែរនៅប្រទេសម៉ាឡេស៊ី អង្គការដែលតំណាងឱ្យអ្នកនាំចេញត្រូវបានគេរាយការណ៍ថា បានស្នើសុំឱ្យរដ្ឋាភិបាលជួយគាំទ្រលើបញ្ហានេះផងដែរ។ នេះបើតាម NHK ចុះផ្សាយនៅថ្ងៃកាលពីល្ងាចមិញនេះ៕
