ដោយៈសុខុម
ហុងកុងៈ បណ្ដាក្រុមហ៊ុនចិន ដែលគ្រប់គ្រងដោយរដ្ឋ កំពុងចាប់ផ្ដើមមានបញ្ហាខកខានសងបំណុលរបស់ខ្លួនតាមពេលកំណត់ ហើយវាជាបញ្ហាមួយដែលអាចឆាបឆេះរាលដាលដល់ប្រព័ន្ធហិរញ្ញវត្ថុរបស់ប្រទេសចិន ដោយគំរាមកំហែងដល់ការងើបឡើងនៃសេដ្ឋកិច្ចរបស់ប្រទេសនេះ ព្រមទាំងសេដ្ឋកិច្ចសកលលោកពីការឆ្លងរាតត្បាតវីរុសកូវីដ-១៩ ។ នេះបើយោងតាម CNN ចុះផ្សាយកាលពីថ្ងៃទី១០ ធ្នូកន្លងមកនេះ។
បញ្ហានេះបានវិវឌ្ឍកាន់តែធ្ងន់ធ្ងរឡើង ក្នុងរយៈពេលប៉ុន្មានសប្ដាហ៍ចុងក្រោយនេះ។ ក្រុមហ៊ុនធំៗជាច្រើនរួមមានក្រុមហ៊ុន Brilliance Auto Group ក្រុមហ៊ុនផលិតឈីបស្មាតហ្វូនដ៏កំពូល Tsinghua Unigroup និងក្រុមហ៊ុន Yongcheng Coal and Electricity បានប្រកាសក្ស័យធន ឬខកខានសងបំណុលរបស់ខ្លួនកាលពីខែមុន ជាហេតុបង្កឱ្យមានការភ្ញាក់ផ្អើលខ្លាំង ក្នុងទីផ្សារបំណុលរបស់ប្រទេសនេះ។
តម្លៃប័ណ្ណបំណុលបានធ្លាក់ចុះយ៉ាងគំហុក ហើយអត្រាការប្រាក់បានហក់ឡើងខ្ពស់ ដែលបានបង្កចលាចលដល់ទីផ្សារភាគហ៊ុន ទីដែលភាគហ៊ុនរបស់បណ្ដាក្រុមហ៊ុនដែលគ្រប់គ្រងដោយរដ្ឋកំពុងធ្លាក់ថ្លៃ។
អ្វីជាឬសគល់នាំឲ្យមានបញ្ហាធ្ងន់ធ្ងរបែបនេះ អ្នកវិភាគបានរកឃើញថា ចំណុចទី១ ទំនាក់ទំនងជិតស្និទ្ធរវាងក្រុមហ៊ុនទាំងនេះ និងរដ្ឋអំណាចមូលដ្ឋានរបស់ចិន ធ្វើឱ្យពួកគេហ៊ានប្រថុយប្រថានក្នុងគ្រាមានបញ្ហា។ ប៉ុន្តែប្រសិនបើបណ្ដាវិនិយោគិនព្រួយបារម្ភថា រដ្ឋលែងមានឆន្ទៈ ក្នុងជួយគាំទ្រពួកគេតទៅទៀត នោះពួកគេនឹងប្រឈមហានិភ័យ កាន់តែខ្ពស់។
ចំណុចទី២ ភាពជោគជ័យរវាងវិស័យរដ្ឋ ពិតជាមានសារៈសំខាន់ណាស់ចំពោះប្រព័ន្ធហិរញ្ញវត្ថុរបស់ប្រទេសចិន។ ក្រុមហ៊ុនបែបនេះរួមចំណែកតិចជាង១ ភាគ៣នៃ GDP (ផលិតផលក្នុងស្រុកសរុប) ប៉ុន្តែក្រុមហ៊ុនទាំងនេះមានចំណែកស្មើ នឹងជាងពាក់កណ្ដាលនៃកម្ចីធនាគារ ដែលផ្ដល់ឱ្យនៅក្នុងប្រទេសចិន និងប្រមាណ៩០% នៃបំណុលក្រុមហ៊ុនរបស់ប្រទេសនេះ។ នេះបើយោងតាមទិន្នន័យ ទទួលបានពីធនាគារប្រជាជនចិន (People’s Bank of China) និងផ្សារភាគហ៊ុនចិន Huachuang Securities៕