ដោយ: គង់ លាងហួរ
អន្តរជាតិ: តម្លៃប្រេងឆៅបានធ្លាក់ចុះនៅក្នុងការជួញដូរនៅព្រឹកថ្ងៃព្រហស្បតិ៍នេះ បន្ទាប់ពីធនាគារកណ្តាលអាមេរិកបានផ្តល់សញ្ញាថា ខ្លួននឹងបន្ថយល្បឿននៃការកាត់បន្ថយអត្រាការប្រាក់នៅឆ្នាំ២០២៥។ ការណ៍នេះអាចជះផលប៉ះពាល់ដល់តម្រូវការប្រេងឥន្ធនៈ។
តួយ៉ាង តម្លៃប្រេងឆៅ Brent futures បានធ្លាក់ចុះ៣៣សេនមកនៅត្រឹម៧៣,០៦ដុល្លារក្នុងមួយបារ៉ែលគិតត្រឹមម៉ោងសកល 0107 GMT ខណៈតម្លៃប្រេងឆៅរបស់អាមេរិក West Texas Intermediate បានធ្លាក់ចុះ៣៦សេនមកនៅត្រឹម៧០,២២ដុល្លារក្នុងមួយបារ៉ែល។
ការធ្លាក់ចុះវិញនៃតម្លៃប្រេងនៅព្រឹកថ្ងៃព្រហស្បតិ៍នេះបានកើតឡើង ក្រោយពីតម្លៃប្រេងបានកើនឡើងកាលពីថ្ងៃពុធម្សិលមិញ ដោយសារស្តុកប្រេងឆៅរបស់អាមេរិកធ្លាក់ចុះ ហើយធនាគារកណ្តាលអាមេរិកបានកាត់បន្ថយអត្រាការប្រាក់ចំនួន០,២៥ភាគរយដូចការរំពឹងទុក។
ប៉ុន្តែ ក្រោយមក ធនាគារកណ្តាលអាមេរិកបានបង្ហាញទស្សនវិស័យមិនអំណោយផលសម្រាប់ឆ្នាំ២០២៥ ដោយគ្រោងបន្ថយល្បឿននៃការកាត់បន្ថយអត្រាការប្រាក់របស់ខ្លួន៕
