ដោយៈ គង់ ម៉ាលីនណា
ភ្នំពេញៈ ប្រមុខរដ្ឋាភិបាល សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានសម្រេចបន្តផ្តល់ការលើកទឹកចិត្តផ្នែកពន្ធដារ ដល់ក្រុមហ៊ុនផលិតស៊ីម៉ង់ត៍ក្នុងស្រុក ដើម្បីលើកម្ពស់ការផលិត និងភាពប្រកួតប្រជែង។
ការសម្រេចនេះបានធ្វើឡើងក្នុងឱកាស ដែលសម្តេចអនុញ្ញាឱ្យថ្នាក់ដឹកនាំសមាគមឧស្សាហកម្មស៊ីម៉ង់ត៍កម្ពុជា ដឹកនាំដោយលោក Ratchayut Kasemchaisiri ប្រធានក្រុមប្រឹក្សាភិបាល ចូលជួបសម្តែងការគួរសម និងពិភាក្សាការងារកាលពីរសៀលថ្ងៃពុធ ទី១៨ ខែធ្នូ ឆ្នាំ២០២៤។
ក្នុងជំនួបនេះ លោកប្រធានក្រុមប្រឹក្សាភិបាល បានគោរពរាយការណ៍ជូនសម្ដេចមហាបវរធិបតី អំពីវឌ្ឍនភាពនៃឧស្សាហកម្មស៊ីម៉ង់ត៍ ដែលបច្ចុប្បន្នបណ្តាក្រុមហ៊ុន ដែលជាសមាជិកសមាគមបាន និងកំពុងបោះទុនវិនិយោគសរុបជាង១.២ប៊ីលានដុល្លារ និងអាចបង្កើតការងារបានជាង២,៧០០កន្លែង ដែលក្នុងនោះមានជាង១,៩០០នាក់ គឺជាកម្លាំងពលកម្មក្នុងស្រុក។
សមាគមមានលទ្ធភាពផលិត និងចែកចាយស៊ីម៉ង់ត៍ ដើម្បីបំពេញតម្រូវការនៅក្នុងស្រុកផង និងសម្រាប់នាំចេញទៅតាមបណ្ដាប្រទេសជិតខាងមួយចំនួនផង ហើយថ្មីៗនេះ សមាគមក៏បានក្លាយជាសមាជិកសហព័ន្ធ ក្រុមហ៊ុនផលិតស៊ីម៉ងត៍អាស៊ាន (AFCM) ផងដែរ។
ជាការឆ្លើយតប សម្ដេចមហាបវរធិបតី បានសម្ដែងការកោតសសើរ និងវាយតម្លៃខ្ពស់ចំពោះវឌ្ឍនភាពរីកចម្រើន និងជោគជ័យរបស់សមាគមឧស្សាហកម្មស៊ីម៉ង់ត៍កម្ពុជា ដែលបានរួមចំណែកក្នុងការអភិវឌ្ឍសង្គម-សេដ្ឋកិច្ចកម្ពុជា តាមរយៈការបង្កើតការងារសម្រាប់ប្រជាពលរដ្ឋ និងលទ្ធភាពក្នុងការផ្គត់ផ្គង់ស៊ីម៉ង់ត៍ ប្រកបដោយគុណភាព និងតម្លៃសមរម្យ។
ជាមួយគ្នានេះ សម្ដេចមហាបវរធិបតី ក៏បានគូសបញ្ជាក់អំពីការដាក់ចេញគោលនយោបាយ វិធានការ និងការលើកទឹកចិត្តនានារបស់រាជរដ្ឋាភិបាល ដើម្បីធានាដល់ភាពជោគជ័យ បរិយាកាសវិនិយោគ និងភាពប្រកួតប្រជែងរបស់បណ្ដាក្រុមហ៊ុន ដែលកំពុងមានប្រតិបត្តិការអាជីវកម្មនៅកម្ពុជាផងដែរ។
តបតាមសំណូមពររបស់សមាគម ឧស្សាហកម្មស៊ីម៉ង់ត៍កម្ពុជា សម្តេចមហាបវរធិបតីនាយករដ្ឋមន្ត្រី បានសម្រេចបន្តផ្តល់ការលើកទឹកចិត្តផ្នែកពន្ធដារ ដល់ក្រុមហ៊ុនផលិតស៊ីម៉ង់ត៍ក្នុងស្រុក ព្រមទាំងប្រគល់ភារកិច្ចឱ្យក្រសួងសេដ្ឋកិច្ច និងហិរញ្ញវត្ថុ សហការជាមួយក្រសួងរ៉ែ និងថាមពលសិក្សា លើវិធានការមួយចំនួនបន្ថែមទៀត ដើម្បីលើកយោបល់សុំការសម្រេច ពីសម្តេចមហាបវរធិបតីនាយករដ្ឋមន្ត្រី ក្នុងគោលដៅបង្កើនភាពប្រកួតប្រជែង និងការរីកចម្រើននៃឧស្សាហកម្មស៊ីម៉ង់ត៍ ក្នុងការផលិតស៊ីម៉ង់ត៍ក្នុងស្រុក ដែលមានគុណភាពខ្ពស់ និងតម្លៃសមសមរម្យ ដើម្បីជួយជាប្រយោជន៍បន្ថែម ដល់ប្រជាពលរដ្ឋកម្ពុជាដែលជាអ្នកប្រើប្រាស់៕
