ដោយៈ គង់ ម៉ាលីនណា
ភ្នំពេញៈ អ្នកនាំពាក្យក្រសួងសេដ្ឋកិច្ច និងហិរញ្ញវត្ថុ លោក មាស សុខសេនសាន បានចេញសារតាមរយៈវីដេអូ ដោយបានច្រានចោល ពាក់ព័ន្ធនឹងព័ត៌មាន ដែលចែកចាយថា “ចិនឈប់ផ្ដល់កម្ចីកម្ពុជា” ខណៈកម្ពុជា-ចិន មានគម្រោងជាច្រើន ត្រូវធ្វើជាមួយគ្នា។
លោកមាស សុខសេនសាន បានបញ្ជាក់ថា “ទំនាក់ទំនងរវាងប្រទេសទាំងពីរ គឺជាទំនាក់ទំនង ដែលបន្ដមានការស្អិតរមួត ត្រូវបានពង្រឹង តាមរយៈការវិនិយោគ និងតាមរយៈកិច្ចសហប្រតិបត្ដិការនានា ដែលមានជាធរមាន”។
លោកបានលើកឡើងថា កម្ពុជា-ចិន មានគម្រោងជាច្រើនរវាងប្រទេសទាំងពីរ ដែលបន្ដចុះពិនិត្យ និងត្រូវចុះកិច្ចព្រមព្រៀង ក្នុងក្របខណ្ឌនៃកិច្ចសហប្រតិបត្ដិការ និងក្របខណ្ឌ នៃការចុះកិច្ចព្រមព្រៀង ហិរញ្ញប្បទានឥណសំណង រាប់ទាំងហិរញ្ញប្បទានសមទានជាច្រើនទៀត៕
