ដោយ: គង់ លាងហួរ
អន្តរជាតិ: តម្លៃប្រេងឆៅបានធ្លាក់ចុះនៅព្រឹកថ្ងៃសុក្រនេះ ខណៈមានការព្យាករណ៍ថា ការផ្គត់ផ្គង់ប្រេងសកលនឹងកើនឡើងលើសតម្រូវការនៅឆ្នាំ២០២៥ ហើយទីផ្សារក៏បានបន្ទាបការរំពឹងទុកលើកំណើនតម្រូវការប្រេងនៅប្រទេសចិនផងដែរ។
តួយ៉ាង តម្លៃប្រេងឆៅ Brent futures បានធ្លាក់ចុះ៨សេនមកនៅត្រឹម៧៣,៣៣ដុល្លារក្នុងមួយបារ៉ែលគិតត្រឹមម៉ោងសកល 0125 GMT ខណៈតម្លៃប្រេងឆៅ West Texas Intermediate របស់អាមេរិកបានធ្លាក់ចុះ៧សេនដល់៦៩,៩៥ដុល្លារក្នុងមួយបារ៉ែល។
ទីភ្នាក់ងារថាមពលអន្តរជាតិ(IEA) បានព្យាករណ៍ថា បណ្តាប្រទេសដែលពុំមែនជាសមាជិកអង្គការ OPEC+ នឹងជំរុញការផ្គត់ផ្គង់ប្រេងប្រហែល១,៥លានបារ៉ែលក្នុងមួយថ្ងៃនៅឆ្នាំក្រោយ ដែលជំរុញដោយសហរដ្ឋអាមេរិក កាណាដា ហ្គីយ៉ាណា ប្រេស៊ីល និងអាហ្សង់ទីន។
IEA បានគូសបញ្ជាក់ឱ្យដឹងនៅក្នុងរបាយការណ៍ស្តីពីទីផ្សារប្រេងប្រចាំខែរបស់ខ្លួនថា កំណើនតម្រូវការប្រេងសកលនៅឆ្នាំ២០២៥ នឹងមានចំនួន១,១លានបារ៉ែលក្នុងមួយថ្ងៃ។ការណ៍នេះមានន័យថា ការផ្គត់ផ្គង់ប្រេងសកលនឹងកើនឡើងលើសតម្រូវការ៕
