ដោយ: គង់ លាងហួរ
អន្តរជាតិ: តម្លៃប្រេងឆៅបានកើនឡើងបន្តិចនៅព្រឹកថ្ងៃពុធនេះ ខណៈទីផ្សាររំពឹងថា តម្រូវការប្រេងនៅក្នុងប្រទេសចិននឹងកើនឡើងនៅឆ្នាំក្រោយ បន្ទាប់ពីទីក្រុងប៉េកាំងបានប្រកាសបន្ធូរបន្ថយគោលនយោបាយរូបិយវត្ថុដើម្បីជំរុញកំណើនសេដ្ឋកិច្ច។
តួយ៉ាង តម្លៃប្រេងឆៅ Brent futures បានកើនឡើង១០សេនដល់៧២,២៩ដុល្លារក្នុងមួយបារ៉ែលគិតត្រឹមម៉ោងសកល 0131 GMT ខណៈតម្លៃប្រេងឆៅរបស់អាមេរិក WTI futures បានកើនឡើង៩សេនដល់៦៨,៦៨ដុល្លារក្នុងមួយបារ៉ែល។
ប្រទេសចិនបានអះអាងឱ្យដឹងកាលពីថ្ងៃច័ន្ទដើមសប្តាហ៍នេះថា ខ្លួននឹងអនុម័តគោលនយោបាយរូបិយវត្ថុ “ធូររលុង” នៅឆ្នាំ២០២៥ខាងមុខ។ នេះជាការបន្ទន់ជំហររបស់ចិនជាលើកដំបូងមិនធ្លាប់មានក្នុងរយៈពេល១៤ឆ្នាំកន្លងមក ខណៈទីក្រុងប៉េកាំងព្យាយាមជំរុញសេដ្ឋកិច្ចរបស់ខ្លួន។
កាលពីខែវិច្ឆិកាកន្លងទៅ ការនាំចូលប្រេងឆៅទៅកាន់ប្រទេសចិនក៏បានកើនឡើងជាលើកដំបូងក្នុងរយៈពេល៧ខែ ដោយកើនឡើងជាង១៤ភាគរយបើប្រៀបធៀបនឹងឆ្នាំមុន៕
