ដោយៈ គង់ សូរិយា
ភ្នំពេញៈ ក្រសួងបរិស្ថានកាលពីថ្ងៃទី២ ធ្នូ បានសាងសង់ផ្ទះតង់ចំនួន១០ផ្ទះ ត្រូវបានចាប់ផ្តើមសាងសង់ តាមរចនាបទខ្មែរជាជំហានដំបូង នៅក្នុងសហគមន៍ការពារធម្មជាតិ ព្រៃធំអន្លង់ធំ ស្ថិតនៅលើខ្នងភ្នំគូលែន នៃឧទ្យានជាតិព្រះជ័យវរ្ម័ន នរោត្តម “ភ្នំគូលែន”។
គោលដៅនៃការសាងសង់នេះ ដើម្បីពង្រឹងការអភិរក្សព្រៃឈើ និងលើកកម្ពស់ជីវភាពសហគមន៍ ជាមួយសក្តានុពលលំហែបៃតង។
ផ្ទះតង់ទាំងនេះត្រូវបានផ្តល់ឱ្យ ដោយក្រសួងបរិស្ថានតាមរយៈគម្រោងនិរន្តភាពតំបន់ទេសភាព និងទេសចរណ៍ធម្មជាតិកម្ពុជា (CSLEP) ដែលដឹកនាំអនុវត្តន៍ ដោយក្រសួងបរិស្ថាននិងក្រសួងអភិវឌ្ឍជនបទ ក្រោមហិរញ្ញប្បទានធនាគារពិភពលោក មូលនិធិបរិស្ថានសកល និងរាជរដ្ឋាភិបាលកម្ពុជា។
ក្រសួងបរិស្ថានបញ្ជាក់ថា តង់ស្នាក់សម្រាប់ទេសចរណ៍ សាងសង់ឡើងតាមរចនាបទខ្មែរ និងមានលក្ខណៈទំនើប មានអនាម័យ សោភ័ណភាពស្អាត ការលំហែកម្សាន្ត ប្រកបដោយសុខុដុមរមនា ជាមួយធម្មជាតិសម្រាប់ឱ្យភ្ញៀវជាតិ ឬអន្តរជាតិ ដែលមកកម្សាន្តបោះតង់ និងដើរទស្សនាជុំវិញព្រៃសហគមន៍ តំបន់ទីទួលបុរាណ ប្រាសាទបុរាណ កន្លែងវប្បធម៌ ប្រវត្តិសាស្រ្ត និងតំបន់ទេសភាពធម្មជាតិផ្សេងទៀត លើខ្នងភ្នំគូលែន”។
រដ្ឋមន្រ្តីក្រសួងបរិស្ថាន លោក អ៊ាង សុផល្លែត បានជួបសំណេះសំណាល ជាមួយអាជ្ញាធរដែនដី ដៃគូសហការ និងប្រជាពលរដ្ឋនៅក្នុងសហគមន៍ តំបន់ការពារធម្មជាតិព្រៃធំអន្លង់ធំ នាថ្ងៃទី៣០ ខែវិច្ឆិកាកន្លងមក។
លោកបានលើកឡើងថា “សហគមន៍តំបន់ការពារធម្មជាតិដើរតួនាទីសំខាន់ ក្នុងកិច្ចការងារការពារ និងអភិរក្សព្រៃឈើសហគមន៍”។
លើសពីនោះ វាក៏ជាកន្លែងដែលសហគមន៍ ត្រូវធ្វើជាម្ចាស់ សម្រាប់ការអភិវឌ្ឍគោលដៅលំហែបៃតង ដែលត្រូវស្វាគមន៍ ភ្ញៀវទេសចរមកកម្សាន្ត តាមរយៈការបោះតង់សម្រាក និងទស្សនាទេសភាពធម្មជាតិ ទីតាំងវប្បធម៌ ប្រវត្តិសាស្រ្ត សាសនា ជាដើម នៅក្នុងព្រៃសហគមន៍ទៀតផង។
លោករដ្ឋមន្រ្តីបានបន្តថា សហគមន៍តំបន់ការពារធម្មជាតិ នៅលើខ្នងភ្នំគូលែន ជាតំបន់ដែលមានព្រៃឈើក្រាស់ មានទេសភាពស្រស់ស្អាត ហើយអាចឱ្យភ្ញៀវទេសចរណ៍ បោះតង់សម្រាកក្បែរមាត់ទឹក និងទស្សនាប្រាសាទនានា ក្នុងព្រៃជាច្រើន។
សហគមន៍តំបន់ការពារធម្មជាតិនេះ ត្រូវបានបង្កើតឡើងនៅឆ្នាំ២០០១ ដែលមានផ្ទៃដីទំហំប្រហែល៣៦៥ហិកតា ស្ថិតនៅក្នុងភូមិអន្លង់ធំ ឃុំខ្នងភ្នំ ស្រុកស្វាយលើ។
គិតត្រឹម ឆ្នាំ២០២៤ សហមន៍តំបន់ការពារធម្មជាតិ សរុបមានចំនួន១៩៣សហគមន៍ ត្រូវបានបង្កើតឡើង ដែលមានសមាជិកសរុបចំនួន៧៣,១៤៩គ្រួសារ និងគ្របដណ្តប់លើផ្ទៃដីព្រៃជាង៣៣ម៉ឺនហិកតា ស្ថិតក្នុងខេត្តចំនួន១៥។
អ្នកនាំពាក្យក្រសួងបរិស្ថាន លោកខ្វៃ អាទិត្យាបានឱ្យដឹងថា សហគមន៍ជាង៥០ មានសត្តានុពល ដែលអាចរៀបចំជាតំបន់ទេសចរណ៍ធម្មជាតិ។ ប៉ុន្តែនាពេលបច្ចុប្បន្ននេះ មានសហគមន៍ប្រមាណ៣០ កំពុងតែដំណើរការ បង្កើតចំណូលពីទេសចរណ៍ធម្មជាតិ។
លោក ញ៉ន ម៉ុច សមាជិកសហគមន៍តំបន់ការពារធម្មជាតិព្រៃធំអន្លង់ធំ សង្ឃឹមថា ជីវភាពរបស់ប្រជាសហគមន៍ លើខ្នងភ្នំ និងប្រសើរឡើង នៅពេលមានសមិទ្ធផលថ្មី ដូចជាកន្លែងបោះតង់ និងផ្ទះតង់សម្រាប់ទេសចរអាចមកស្នាក់ លំហែកម្សាន្ត។
លោកបានឱ្យដឹងថា នាពេលបច្ចុប្បន្ននេះ ភ្ញៀវទេសចរជាច្រើន កំពុងតែចាប់អារម្មណ៍តំបន់នេះ ហើយការគាំទ្ររបស់ក្រសួងបរិស្ថាន និងជំរុញការអភិវឌ្ឍសេដ្ឋកិច្ច របស់ប្រជាសហគមន៍បន្ថែមទៀត ដែលពីមុនធ្លាប់ពឹងលើ ធនធានព្រៃឈើ ហើយបានងាកមកពង្រឹង មុខរបរសេវាកម្មទេសចរណ៍វិញ។
លោកបាននិយាយថា “ប្រជាពលរដ្ឋ ដែលរស់នៅក្នុងសហគមន៍ បានខិតខំរួមគ្នាទប់ស្កាត់ ការកាប់បំផ្លាញព្រៃឈើ និងបានចូលរួមដាំដាំឈើឡើងវិញ ដើម្បីបង្កើនគម្របព្រៃឈើផងដែរ”៕
