ដោយៈសាវុធ
ភ្នំពេញៈ មុនការស្នើសុំលិខិតអនុញ្ញាតគយនាំចូល ដើម្បីនាំចូលឧបករណ៍សម្ភារៈដោយពន្ធនិងអាករជាបន្ទុក របស់រដ្ឋក្នុងក្របខ័ណ្ឌឥណទាន ឬជំនួយមនុស្សធម៌ ភ្នាក់ងារអនុវត្តគម្រោង ឬសាម៉ីស្ថាប័នទទួលជំនួយ ត្រូវបំពេញទម្រង់បែបបទស្នើសុំទៅក្រសួងសេដ្ឋកិច្ចនិងហិរញ្ញវត្ថុ ដើម្បីពិនិត្យនិងសម្រេច។
បន្ទាប់ពីទទួលបានការអនុញ្ញាត ពីក្រសួងសេដ្ឋកិច្ចនិងហិរញ្ញវត្ថុ ភ្នាក់ងារអនុវត្តន៍គម្រោង ឬសាម៉ីស្ថាប័នទទួលជំនួយខាងលើ ត្រូវស្នើសុំលិខិតអនុញ្ញាតគយនៅអគរ (នាយកដ្ឋានរបបគយ) ដោយភ្ជាប់មកជាមួយ នូវឯកសារចាំបាច់នានារួមមាន ទី១ លិខិតអនុញ្ញាតឲ្យនាំចូលទំនិញដោយពន្ធ និងអាករជាបន្ទុក របស់រដ្ឋពីក្រសួងសេដ្ឋកិច្ច និងហិរញ្ញវត្ថុ ឬលិខិតស្នើសុំការអនុញ្ញាតឲ្យនាំចូល ដោយពន្ធនិងអាករជាបន្ទុករបស់រដ្ឋ ដែលមានចំណារ ឯកភាពពីឯកឧត្តមរដ្ឋមន្ត្រី ក្រសួងសេដ្ឋកិច្ចនិងហិរញ្ញវត្ថុ។
ទី២ ឯកសារត្រូវភ្ជាប់ជាមួយរួមមាន វិក្កយបត្រទំនិញ បញ្ជីវេចខ្ចប់ និងឯកសារដឹកជញ្ជូន លិខិតប្រគល់សិទ្ធិសម្រាប់អ្នកតំណាង និងឯកសារពាក់ព័ន្ធផ្សេងទៀតក្នុងករណីចាំបាច់៕