ដោយៈ គង់ ម៉ាលីនណា
ភ្នំពេញៈ ពាណិជ្ជកម្មរវាងកម្ពុជា និងវៀតណាមបានបន្តកើនឡើងជាបន្តបន្ទាប់ ដោយក្នុងរយៈពេល១០ ខែដើមឆ្នាំ ២០២៤ សម្រេចបានជាង៦,៤ ពាន់លានដុល្លារ កើនឡើងជាង ២០ភាគរយ។
យោងតាមទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា(GDCE) ចាប់ពីខែមករា ដល់ខែតុលា ឆ្នាំ ២០២៤ ការនាំចេញនាំចូលទំនិញ រវាងកម្ពុជា-វៀតណាម មានទឹកប្រាក់សរុប ៦ ៤១៩,៣៦ លានដុល្លារ កើនឡើង២១,៧ ភាគរយពីចំនួន ៥ ២៧៦,៨៦ លានដុល្លារនារយៈពេល១០ខែ ឆ្នាំ២០២៣។
វៀតណាម គឺជាដៃគូពាណិជ្ជកម្មអន្តរជាតិធំទី ៣ របស់កម្ពុជា បន្ទាប់ពីប្រទេសចិន និងសហរដ្ឋអាមេរិក។
ទំហំពាណិជ្ជកម្មខាងលើ គឺកម្ពុជានាំទៅវៀតណាម មានទឹកប្រាក់២៩៦៧,៨១ លានដុល្លារ កើន៣១,២ភាគរយ និងទំនិញវៀតណាម នាំចូលមកកម្ពុជា៣៤៥១,៥៥ លានដុល្លារ កើន១៤,៤ ភាគរយ។
ប្រទេសវៀតណាម គឺជាទីផ្សារធំទី២ ដែលទទួលទិញទំនិញកម្ពុជា បន្ទាប់ពីសហរដ្ឋអាមេរិក និងស្ថិតនៅលេខ២ផងដែរជាប្រទេស ដែលនាំទំនិញច្រើនចូលមកកម្ពុជា បន្ទាប់ពីប្រទេសចិន។ នេះបើតាមទិន្នន័យអគ្គនាយកដ្ឋានគយ និងរដ្ឋាករ។
លោកបណ្ឌិតហុង វណ្ណៈ អ្នកស្រាវជ្រាវសេដ្ឋកិច្ចនៃរាជបណ្ឌិតសភាកម្ពុជាបានមានប្រសាសន៍ថា លក្ខខណ្ឌទីតាំងភូមិសាស្រ្ត និងភាពល្អប្រសើរនៃទំនាក់ទំនងការទូត បានធ្វើឱ្យលំហូរទំនិញឆ្លងដែន រវាងប្រទេសទាំង២ រក្សាបានសញ្ញាវិជ្ជមានជាបន្តបន្ទាប់ បើទោះក្នុងកាលៈទេសៈពិភពលោក ជួបនឹងវិបត្តិក៏ដោយ។
លោកបន្តថា ដោយសារប្រទេសវៀតណាម មានធនធានផលិតកម្ម និងរោងចក្រកែច្នៃច្រើនជាងកម្ពុជា ដូច្នេះលំហូរទំនិញកម្ពុជា ទៅប្រទេសវៀតណាម គឺមានភាគច្រើនជាផលិតផលកសិកម្មមិនទាន់កែច្នៃ ខណៈទំនិញដែលវៀតណាមនាំមកកម្ពុជា គឺជាផលិតផលសម្រេច និងគ្រឿងម៉ាស៊ីនមួយចំនួន”។
លោកបានពន្យល់ថា សម្រាប់មូលហេតុ ដែលជញ្ជីងពាណិជ្ជកម្មកម្ពុជា បន្តមានឱនភាពជាមួយវៀតណាម គឺវាមិនមែនជាបញ្ហា ដែលគួរឱ្យបារម្ភនោះទេ ពីព្រោះនៅក្នុងការធ្វើពាណិជ្ជកម្មអន្តរជាតិ គឺតែងតែមានស្ថានភាពបែបនេះ ដោយទំនិញកម្ពុជានាំចេញ ទៅគោលដៅប្រទេសខ្លះ មានចំនួនច្រើន(សហរដ្ឋអាមេរិ និងតំបន់អ៊ឺរ៉ុប) ប៉ុន្តែការនាំចូលមកវិញមានចំនួនទឹកប្រាក់តិចតួចប៉ុណ្ណោះ។
ក្នុងគោលបំណងរឹតចំណង កិច្ចសហប្រតិបត្តិការរវាងរដ្ឋាភិបាល និងប្រជាជននៃប្រទេសទាំង២ ប្រធានរដ្ឋសភានៃសាធារណរដ្ឋសង្គមនិយមវៀតណាម លោក Tran Thanh Man កំពុងដឹកនាំគណ:ប្រតិភូជាន់ខ្ពស់ រដ្ឋសភានៃសាធារណរដ្ឋសង្គមនិយមវៀតណាម មកធ្វើទស្សនកិច្ចនៅប្រទេសកម្ពុជាចាប់ពីថ្ងៃទី២១-២៤ ខែវិច្ឆិកា ឆ្នាំ២០២៤។
ក្នុងដំណើរទស្សនកិច្ចនេះ លោក Tran Thanh Man គ្រោងនឹងជួបសវនាកាជាមួយ សម្តេចប្រធានរដ្ឋសភាកម្ពុជា លោកជំទាវឃួន សុដារី ណប្រធានព្រឹទ្ធសភាលោក ហ៊ុន សែន, នាយករដ្ឋមន្ត្រីកម្ពុជា សម្តេចបវរធិបតីហ៊ុន ម៉ាណែតជាដើម៕
