ដោយ: គង់ លាងហួរ
អន្តរជាតិ: តម្លៃប្រេងឆៅបានកើនឡើងនៅក្នុងការជួញដូរនៅព្រឹកថ្ងៃច័ន្ទដើមសប្តាហ៍នេះ បន្ទាប់ពីការប្រយុទ្ធគ្នារវាងរវាងប្រទេសរុស្ស៊ី និងប្រទេសអ៊ុយក្រែនបានកើនឡើងកាន់តែខ្លាំងកាលពីចុងសប្តាហ៍កន្លងទៅ។
តម្លៃប្រេងឆៅ Brent futures បានកើនឡើង២០សេន ឬ០,៣%ដល់៧១,២៤ដុល្លារក្នុងមួយបារ៉ែលគិតត្រឹមម៉ោងសកល 0130 GMT ខណៈតម្លៃប្រេងឆៅរបស់អាមេរិក West Texas Intermediate futuresបានកើនឡើង៩សេន ឬ០,១%ដល់៦៧,១១ដុល្លារក្នុងមួយបារ៉ែល។
រដ្ឋបាលរបស់ប្រធានាធិបតីអាមេរិកជិតផុតអាណត្តិលោក ចូ បៃដិន បានអនុញ្ញាតឱ្យអ៊ុយក្រែនប្រើប្រាស់អាវុធដែលផលិតដោយសហរដ្ឋអាមេរិក ដើម្បីវាយប្រហារយ៉ាងជ្រៅទៅក្នុងទឹកដីនៃប្រទេសរុស្សុី។នេះបើយោងតាមការទម្លាយឱ្យដឹងកាលពីថ្ងៃអាទិត្យដោយមន្ត្រីអាមេរិក២រូប និងប្រភពមួយដែលបានដឹងអំពីការសម្រេចចិត្តខាងលើ។
លោក Tony Sycamore អ្នកវិភាគទីផ្សារនៅក្រុមហ៊ុន IG marketsបានលើកឡើងថា “លោក ចូបៃដិន អនុញ្ញាតឱ្យអ៊ុយក្រែនវាយប្រហារកងកម្លាំងរុស្ស៊ីនៅជុំវិញទីក្រុង Kursk ដោយប្រើកាំជ្រួចរយៈចម្ងាយឆ្ងាយ។ភាពតានតឹងភូមិសាស្ត្រនយោបាយនេះអាចជះឥទ្ធិពលត្រឡប់ទៅលើតម្លៃប្រេង”៕
