ដោយ:គង់ សូរិយា
ភ្នំពេញ: ក្រសួងពាណិជ្ជកម្មបានឲ្យដឹងថា នៅថ្ងៃទី២៤ ដល់២៧ ខែធ្នូខាងមុខនេះក្រសួងនឹងបន្តរៀបចំពិព័រណ៌ផលិតផលខ្មែរ ក្នុងឱកាសយុទ្ធនាការទិញផលិតផលខ្មែររដូវកាលទី៥ ដែលនឹងរៀបចំឡើងនៅក្រុងសិរីសោភ័ណ ខេត្តបន្ទាយមានជ័យ។
យោងតាមសេចក្តីជូនដំណឹងរបស់ក្រសួងពាណិជ្ជកម្ម បាននៅរសៀលថ្ងៃទី២ ខែធ្នូ ឆ្នាំ២០២០កន្លងមកបានឱ្យដឹងថា ការរៀបចំព្រឹត្តការណ៍នេះ ធ្វើឡើងក្នុងគោលបំណងភ្ជាប់ទំនាក់ទំនងសេដ្ឋកិច្ច គ្រប់ប្រព័ន្ធរវាងរាជធានី-ខេត្តទូទាំងប្រទេស និងរួមចំណែកដល់ដំណើរការអភិវឌ្ឍសេដ្ឋកិច្ចជាតិឡើងវិញ។
ក្រសួងនឹងប្រមូលកៀរគរផលិតផលខ្មែរ ដែលមានគុណភាពខ្ពស់ សុវត្ថិភាពសម្រាប់អ្នកប្រើប្រាស់ និងមានការវេចខ្ចប់បានល្អត្រឹមត្រូវ អនុលោមតាមស្តង់ដារផលិតកម្មពីគ្រប់ទិសទីនៅទូទាំងប្រទេសមកដាក់តាំងបង្ហាញ និងស្វែងរកដៃគូទៅលក់បន្ត។
សេចក្តីជូនដំណឹងដដែលបានបន្តថា ក្នុងអំឡុងពេលពិធីនោះដែរ ក្រសួងនឹងសហការជាមួយគណៈកម្មការអន្តរក្រសួង ដើម្បីប្រយុទ្ធនឹងជំងឺកូវីដ១៩ ដោយអនុលោមតាមស្តង់ដារសុខាភិបាលជាតិ៕
