ដោយៈម៉ាណេត
ភ្នំពេញៈ អាស៊ាន និងសហភាពអឺរ៉ុប បានប្តេជ្ញាជំរុញកិច្ចព្រមព្រៀងពាណិជ្ជកម្មសេរីរវាងតំបន់ទាំងពីរ ឱ្យសម្រេចបានក្នុងពេលដ៏ឆាប់ខាងមុខ ដើម្បីសម្រេចបាននូវសក្តានុពលធុរកិច្ច និងវិនិយោគ ដែលជាមូលដ្ឋានគ្រឹះដ៏សំខាន់ សម្រាប់កសាងទំនាក់ទំនងអាស៊ាន-សហភាពអឺរ៉ុបឱ្យកាន់តែរឹងមាំថែមទៀត។
ការប្តេជ្ញាជំរុញពាណិជ្ជកម្មសេរីនេះ ត្រូវបានលើកឡើង ក្នុងកិច្ចប្រជុំរដ្ឋមន្ត្រីការបរទេស អាស៊ាន-សហភាពអឺរ៉ុប លើកទី២៣តាមរយៈប្រព័ន្ធវីដេអូ។ នេះបើយោងតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិកម្ពុជា នៅល្ងាចថ្ងៃទី១ ខែធ្នូ ឆ្នាំ២០២០ ។
សេចក្តីប្រកាសព័ត៌មានបានឱ្យដឹងថា “កិច្ចប្រជុំបានប្តេជ្ញាបង្កើតក្របខណ្ឌជាក់ស្តែង សម្រាប់កិច្ចព្រមព្រៀងពាណិជ្ជកម្មសេរីអាស៊ាន- សហភាពអឺរ៉ុប និងទន្ទឹងរង់ចាំការសម្រេចបានដ៏ឆាប់នូវកិច្ចព្រមព្រៀងនេះ” ។
កិច្ចប្រជុំក៏បានអនុម័ត សេចក្តីប្រកាសរួមរដ្ឋមន្ត្រីការបរទេសអាស៊ាន-សហភាពអឺរ៉ុបស្តីពី ការតភ្ជាប់ ហើយបានកោតសរសើរចំពោះកិច្ចខិតខំប្រឹងប្រែង ដើម្បីស្វែងរកលទ្ឋភាពធ្វើសំយោគរវាង «ផែនការមេស្តីពីការតភ្ជាប់អាស៊ានឆ្នាំ២០២៥» និងយុទ្ធសាស្ត្រអឺរ៉ុបស្តីពី «ការតភ្ជាប់អឺរ៉ុបនិងអាស៉ី» ។
កិច្ចប្រជុំក៏បានឯកភាពគ្នា ធ្វើការឆ្ពោះទៅសម្រេចឱ្យបានឆាប់ នូវកិច្ចព្រមព្រៀងដឹកជញ្ជូនតាមផ្លូវអាកាស គ្រប់ជ្រុងជ្រោយអាស៊ាន-សហភាពអឺរ៉ុប (CATA) ផងដែរ។
សម្រាប់វិស័យសេដ្ឋកិច្ច លោកឧបនាយករដ្ឋមន្ត្រី បានសាទរចំពោះកិច្ចខិតខំប្រឹងប្រែង ដើម្បីសម្រេចឱ្យបាននូវកិច្ចព្រមព្រៀងពាណិជ្ជកម្ម សេរីអាស៊ាន-សហភាពអឺរ៉ុប ដែលលោកជឿជាក់ថា ជាគន្លឹះដើម្បីសម្រេចបាននូវសក្តានុពលធុរកិច្ច និងវិនិយោគដែលជាមូលដ្ឋានគ្រឹះដ៏សំខាន់ សម្រាប់កសាងទំនាក់ទំនងអាស៊ាន-សហភាពអឺរ៉ុបឱ្យកាន់តែរឹងមាំថែមទៀត។
លោកបានស្វាគមន៍ការលើកកម្រិតទំនាក់ទំនង ដៃគូសន្ទនាអាស៊ាន-សហភាពអឺរ៉ុប ទៅជាភាពជាដៃគូយុទ្ធសាស្ត្រ ដែលត្រូវបានសម្រេចក្នុងកិច្ចប្រជុំនេះ ដោយជឿជាក់ថា សមិទ្ធផលថ្មីនេះ នឹងជួយពង្រឹងថែមទៀតនូវទំនាក់ទំនងមិត្តភាព និងកិច្ចសហប្រតិបត្តិការដែលមានប្រយោជន៍ទៅវិញទៅមកនាពេលកន្លងមក៕