ដោយ: គង់ លាងហួរ
អន្តរជាតិ: តម្លៃប្រេងឆៅបានធ្លាក់ចុះបន្តិចវិញនៅព្រឹកថ្ងៃច័ន្ទនេះ បន្ទាប់ពីបានកើនឡើងយ៉ាងគំហុកក្នុងអត្រាប្រចាំសប្តាហ៍គិតត្រឹមថ្ងៃសុក្រសប្តាហ៍មុន ខណៈមានការគំរាមកំហែងកាន់តែខ្លាំងឡើងចំពោះលទ្ធភាពនៃការផ្ទុះសង្រ្គាមនៅទូទាំងតំបន់មជ្ឈិមបូព៌ា។
តម្លៃប្រេងឆៅ Brent futures បានធ្លាក់ចុះ៤៣សេន ឬ០,៥%មកនៅត្រឹម៧៧,៦២ដុល្លារក្នុងមួយបារ៉ែលគិតត្រឹមម៉ោងសកល 0015 GMT ខណៈតម្លៃប្រេងឆៅ West Texas Intermediate futuresបានធ្លាក់ចុះ៣៥សេន ឬ០,៥%មកនៅត្រឹម៧៤,០៣ដុល្លារក្នុងមួយបារ៉ែល។
យោងតាមឧបករណ៍ CME FedWatch បានឱ្យដឹងថា បច្ចុប្បន្ន ទីផ្សារមើលឃើញឱកាស៩៨ភាគរយ ដែលធនាគារកណ្តាលអាមេរិក(Fed) អាចនឹងបញ្ចុះអត្រាការប្រាក់ចំនួន០,២៥ភាគរយបន្ថែមទៀតក្នុងកិច្ចប្រជុំគោលនយោបាយប្រចាំខែវិច្ឆិកាខាងមុខ។
សន្ទស្សន៍ប្រាក់ដុល្លារ ដែលវាស់វែងរូបិយប័ណ្ណប្រាក់ដុល្លារអាមេរិក ធៀបនឹងរូបិយប័ណ្ណធំៗចំនួន៦ ដូចជាប្រាក់យ៉េន និងប្រាក់អឺរ៉ូ បានធ្លាក់ថ្លៃចុះតិចតួចមកនៅត្រឹម១០២,៤៨ពិន្ទុនៅព្រឹកថ្ងៃច័ន្ទនេះ បន្ទាប់ពីបិទការជួញដូរត្រឹម១០២,៥២ពិន្ទុកាលពីថ្ងៃសុក្រសប្តាហ៍មុន។
ចំណែក ផ្សារហ៊ុននៅតំបន់អាសុីបានងើបឡើងថ្លៃនៅព្រឹកថ្ងៃច័ន្ទដើមសប្តាហ៍នេះ ខណៈបណ្តាអ្នកវិនិយោគមានសុទិដ្ឋនិយមថា ធនាគារកណ្តាលធំៗក្នុងតំបន់ ដូចជា ធនាគារកណ្តាលកូរ៉េខាងត្បូង និងធនាគារកណ្តាលអូស្ត្រាលី គ្រោងបញ្ចុះអត្រាការប្រាក់នៅសប្តាហ៍នេះ។
តាមរយៈការជួញដូរនៅលើទីផ្សារ សន្ទស្សន៍ផ្សារហ៊ុននៅតំបន់អាស៊ីរបស់ក្រុមហ៊ុនអាមេរិក MSCI នៅក្រៅប្រទេសជប៉ុន បានងើបឡើងថ្លៃចំនួន០,៥០ភាគរយ គិតត្រឹមម៉ោង១០:៥៣នាទីព្រឹក។
ជាមួយគ្នានេះ ផ្សារហ៊ុន Nikkei របស់ប្រទេសជប៉ុនបានងើបឡើងថ្លៃ២,០៥ភាគរយ ខណៈពេលសន្ទស្សន៍ផ្សារហ៊ុន Hang Seng របស់ទីក្រុងហុងកុងបានងើបឡើងថ្លៃ០,៩៩ភាគរយ។
ដោយឡែក សន្ទស្សន៍ផ្សារហ៊ុនបន្ទះឈីប CSI300 និងសន្ទស្សន៍ផ្សារហ៊ុន Shanghai Composite របស់ប្រទេសចិន បានបិទការជួញដូរព្រមគ្នា ដោយសារថ្ងៃឈប់សម្រាក “Golden Week” ហើយគ្រោងបើកការជួញដូរឡើងវិញនៅថ្ងៃអង្គារស្អែកនេះ។
រីឯ ផ្សារហ៊ុនរបស់ប្រទេសអូស្ត្រាលី S&P /ASX 200 បានងើបឡើងថ្លៃ០,៤៩ភាគរយ ខណៈពេលដែលសន្ទស្សន៍ផ្សារហ៊ុន KOSPI របស់ប្រទេសកូរ៉េខាងត្បូងបានងើបឡើងថ្លៃ០,៩៦ភាគរយ៕
