ដោយ: គង់ លាងហួរ
អន្តរជាតិ: លោក Surapong Piyachote អនុរដ្ឋមន្ត្រីក្រសួងដឹកជញ្ជូនថៃអះអាងថា គម្រោងផ្លូវរថភ្លើងចំនួន៩ខ្សែ ដោយរួមបញ្ចូលទាំងខ្សែរថភ្លើងល្បឿនលឿនថៃ-ចិន ដំណាក់កាលទី២ ប្រវែង៣៥៧គីឡូម៉ែត្រ គ្រោងស្នើសុំការអនុម័តពីគណៈរដ្ឋមន្ត្រីនៅខែតុលាខាងមុខ។
លោក Piyachote បានគូសបញ្ជាក់ថា គម្រោងផ្លូវរថភ្លើងទាំង៩ ត្រូវការដើមទុនវិនិយោគសរុបចំនួន៦៦១ពាន់លានបាត (ប្រហែល១៩ពាន់លានដុល្លារអាមេរិក) ហើយក្នុងចំណោមគម្រោងទាំង៩ គេសង្កេតឃើញមានគម្រោងផ្លូវរថភ្លើង២ទិស(ទាំងទៅ-ទាំងមក)ចំនួន៦គម្រោង ដែលត្រូវការទុនវិនិយោគចំនួន២៩៨ពាន់លានបាត។
គម្រោងផ្លូវរថភ្លើងទាំង៦ខ្សែ រួមមានដូចជា ផ្លូវរថភ្លើង Paknam Pho-Den Chai ប្រវែង២៨៥គីឡូម៉ែត្រ ផ្លូវរថភ្លើង Chumphon-Surat Thani ប្រវែង១៦៨គីឡូម៉ែត្រ ផ្លូវរថភ្លើង Surat Thani-Hat Yai ប្រវែង១៨៩គីឡូម៉ែត្រ ផ្លូវរថភ្លើង Thanon Chira Juction-Ubon Ratchathani ប្រវែង៣០៨គីឡូម៉ែត្រ ផ្លូវរថភ្លើង Hat Yai Junction-Padang Besar ប្រវែង៤៥គីឡូម៉ែត្រ និងផ្លូវរថភ្លើង Denchai-Chiang Mai ប្រវែង១៨៩គីឡូម៉ត្រ។
ចំណែកឯ គម្រោងសាងសង់ផ្លូវរថភ្លើងចំនួន២ខ្សែទៀត កំពុងត្រូវបានត្រៀមរៀបចំពង្រីក នៅតំបន់ជាយក្រុងរបស់រាជធានីបាងកក ដែលជាផ្នែកមួយនៃប្រព័ន្ធខ្សែរថភ្លើងពណ៌ក្រហម (Red Line Train) ក្រោមទុនវិនិយោគសរុបចំនួន២១,៦ពាន់លានបាត។
លោក Surapong Piyachote បានបញ្ជាក់បន្ថែមថា ការស្ថាបនាប្រព័ន្ធផ្លូវរថភ្លើងល្បឿនលឿនថៃ-ចិនដំណាក់កាលទី២ ចាប់ពីខេត្តនគររាជសីមា ទៅកាន់ខេត្តណងខៃ ក្រោមទុនវិនិយោគចំនួន៣៤១,៣ពាន់លានបាត ជាគម្រោងផ្លូវដែកដ៏សំខាន់មួយទៀត។
ការដេញថ្លៃគម្រោងរថភ្លើងល្បឿនលឿនដំណាក់កាលទី២នេះ ត្រូវបានគេរំពឹងថា នឹងរៀបចំឡើងនៅដំណាច់ចុងឆ្នាំ២០២៤ ខណៈការសាងសង់គ្រោងនឹងបញ្ចប់រួចរាល់ជាស្ថាពរនៅដំណាច់ចុងឆ្នាំ២០២៨ខាងមុខ។
ការស្ថាបនាផ្លូវរថភ្លើងល្បឿនលឿនថៃ-ចិន ដំណាក់កាលទី១ប្រវែង២៥០គីឡូម៉ែត្រចាប់ពីទីក្រុងបាងកក ទៅកាន់ខេត្តនគររាជសីមា បានចាប់ផ្តើមបើកការដ្ឋានជាផ្លូវការនៅថ្ងៃទី២១ ខែធ្នូ ឆ្នាំ២០១៧ និងមិនទាន់បញ្ចប់ការសាងសង់នៅឡើយគិតមកទល់ពេលនេះ៕ប្រភព:Bangkok Post៕
