ដោយៈ ម៉ាណេត
ភ្នំពេញៈ ក្រសួងសេដ្ឋកិច្ច និងហិរញ្ញវត្ថុ និងរដ្ឋាករទឹកស្វយ័តក្រុងភ្នំពេញ (រ.ទ.ស.ភ) បានចុះកិច្ចព្រមព្រៀងកម្ចីបន្ត ដើម្បីផ្តល់ហិរញ្ញប្បទានកម្ចីបន្តជាង ១០១លានដុល្លារអាមេរិក ដែលក្រសួងសេដ្ឋកិច្ចនិងហិរញ្ញវត្ថុ ទទួលបានហិរញ្ញប្បទានកម្ចីពីទីភ្នាក់ងារបារាំងសម្រាប់ការអភិវឌ្ឍ (AFD) ។ នេះបើយោងតាមរបាយការណ៍របស់ រ.ទ.ស.ភ ដែលបានដាក់ជូនក្រុមហ៊ុនផ្សារមូលបត្រកម្ពុជានៅថ្ងៃទី២៥ ខែវិច្ឆិកា ឆ្នាំ២០២០ ។
រ.ទ.ស.ភ ត្រូវទូទាត់សងការប្រាក់ជូនក្រសួងសេដ្ឋកិច្ច និងហិរញ្ញវត្ថុតាមអត្រាថេរ(០,៤៨% ក្នុងមួយឆ្នាំ) ដែលកើនឡើងឬថយចុះតាមអត្រាសន្ទស្សន៍ (Index Rate) នៅក្នុងរយៈពេលចាប់ពី កាលបរិច្ឆេទចុះហត្ថលេខា (២៤ ធ្នូ ២០១៩) រហូតដល់កាលបរិច្ឆេទកំណត់អត្រា (Rate Setting Date) បូកបន្ថែម ០,៣៥% ។
កម្ចីមានរយៈពេល២០ឆ្នាំ រួមទាំងរយៈពេលអនុគ្រោះសងប្រាក់ដើម៧ឆ្នាំ គិតចាប់ពីកាលបរិច្ឆេទចុះហត្ថលេខា នៃកិច្ចព្រមព្រៀងកម្ចីរវាងក្រសួងសេដ្ឋកិច្ច និងហិរញ្ញវត្ថុ និងទីភ្នាក់ងារបារាំងសម្រាប់ការអភិវឌ្ឍ (AFD) ថ្ងៃទី២៤ ខែធ្នូ ឆ្នាំ២០១៩ ។
ការផ្តល់ហិរញ្ញប្បទានកម្ចីបន្តនេះ នឹងត្រូវប្រើប្រាស់លើគម្រោងសាងសង់រោងចក្រប្រព្រឹត្តកម្មទឹកស្អាតបាក់ខែង (ជំហ៊ាន២) ដែលនឹងចូលរួមចំណែកពង្រីកសេវាកម្មផ្គត់ផ្គង់ទឹកស្អាត សម្រាប់ការពង្រីកនៅរាជធានីភ្នំពេញ ដែលក្នុងនោះរួមមាន៖ ទី១ ការសាងសង់រោងចក្រប្រព្រឹត្តកម្មទឹកស្អាតបាក់ខែង (ជំហាន២) នឹងបង្កើនសមត្ថភាពផលិតពី ១៩៥.០០០ម៣/ថ្ងៃ ទៅ ៣៩០.០០០ ម៣/ថ្ងៃ ទី២ ពង្រីកបណ្តាញចែកចាយទឹក ស្របតាមផែនការមេផ្គត់ផ្គង់ទឹក ២០១៦-២០៣០ និងទី៣ គាំទ្រលើការងារបច្ចេកទេសក្នុងការគ្រប់គ្រងសេវាផ្គត់ផ្គង់ទឹក៕
