ដោយៈសាវុធ
ភ្នំពេញៈ ការពង្រឹងអាជីវកម្មរបស់សហគ្រាសខ្នាតតូច និងមធ្យម (SMEs) ជាមួយនឹងការច្នៃប្រឌិត និងអន្តរជាតូបនីយកម្ម នឹងក្លាយជាគន្លឹះមួយក្នុងការធ្វើឱ្យសេដ្ឋកិច្ចអាស៊ីអាគ្នេយ៍ ដែលរងផលប៉ះពាល់ដោយសារជំងឺកូវីដ១៩ មានការងើបឡើងវិញលឿន។ នេះបើយោងតាមរបាយការណ៍ថ្មីរបស់ធនាគារអភិវឌ្ឍន៍អាស៊ី (ADB) ។
សហគ្រាសខ្នាតតូច និងមធ្យម គឺជាកម្លាំងជំរុញដ៏សំខាន់មួយ នៅក្នុងសេដ្ឋកិច្ចអាស៊ីអាគ្នេយ៍ ដែលមានអត្រាជាមធ្យម ៩៧%នៃសហគ្រាសទាំងអស់ និង៦៩%នៃកម្លាំងពលកម្មជាតិចាប់ពីឆ្នាំ២០១០ ដល់ឆ្នាំ ២០១៩ ។ សហគ្រាសខ្នាតតូចនិងមធ្យម បានចូលរួមវិភាគទានជាមធ្យម ៤១% នៃផលិតផលក្នុងស្រុកសរុបរបស់ប្រទេសនីមួយ។
លោក Yasuyuki Sawada ប្រធានសេដ្ឋវិទូរបស់ ADB មានប្រសាសន៍ថា “សហគ្រាសខ្នាតតូច និងមធ្យម នៅក្នុងសេដ្ឋកិច្ចអាស៊ីអាគ្នេយ៍ ផ្តោតសំខាន់លើទីផ្សារក្នុងស្រុក ហើយកម្រិតនៃភាពជាសហគ្រិនរបស់ពួកគេ នៅតែមានកម្រិតទាបបំផុត។ លោកបន្តថា “ការគាំទ្រដល់ការអភិវឌ្ឍ សហគ្រាសខ្នាតតូចនិងមធ្យម ជាពិសេសក្នុងការទទួលយកបច្ចេកវិទ្យានិងការចូលរួមនៅក្នុងបណ្តាញផ្គត់ផ្គង់ពិភពលោក នឹងរួមចំណែកដល់ការលូតលាស់ និងជំនួយក្នុងការខិតខំប្រឹងប្រែងស្តារឡើងវិញពីវិបត្តិជំងឺកូវីដ១៩” ។
លោកបានថ្លែងថា “យើងជឿជាក់ថារបាយការណ៍ថ្មីស្តីពី ត្រួតពិនិត្យសហគ្រាសខ្នាតតូចនិងមធ្យមអាស៊ី (ASM) ២០២០ ដែលផ្តល់ទិន្នន័យ និងវិភាគយ៉ាងច្រើនលើការអភិវឌ្ឍសហគ្រាសខ្នាតតូចនិងមធ្យម នៅអាស៊ីអាគ្នេយ៍ មុនពេលជំងឺរាតត្បាត នឹងក្លាយជាគោលការមួយ ក្នុងការជួយដល់វិស័យសហគ្រាសខ្នាតតូច និងមធ្យមនៅក្នុងតំបន់” ។
របាយការណ៍ ASM ថ្មីនេះ ដែលចេញផ្សាយកាលពីថ្មីៗនេះ បង្ហាញពីការវាយតម្លៃលម្អិតអំពីបញ្ហាហិរញ្ញវត្ថុ និងមិនមែនហិរញ្ញវត្ថុ ក្នុងវិស័យសហគ្រាសខ្នាតតូច និងមធ្យមនៅអាស៊ីអាគ្នេយ៍ទាំងនៅប្រទេស និងថ្នាក់តំបន់។ វាក៏វិភាគអំពីគោលនយោបាយនិងបទប្បញ្ញត្តិជុំវិញការអភិវឌ្ឍសហគ្រាសខ្នាតតូច និងមធ្យម និងការទទួលបានហិរញ្ញវត្ថុនៅក្នុងប្រទេសនីមួយៗនៅអាស៊ីអាគ្នេយ៍៕