ហុងគ្រីប្តេជ្ញាជំរុញការវិនិយោគ និងពាណិជ្ជកម្មបន្ថែមទៀតជាមួយកម្ពុជា។ លោក Tibor Baloghdi ឯកអគ្គរដ្ឋទូតវិសាមញ្ញ និងពេញសមត្ថភាពនៃប្រទេសហុងគ្រីប្រចាំកម្ពុជា បានធ្វើការប្តេជ្ញាចិត្តនេះ ក្នុងជំនួបជាមួយលោក ហួត ហាក់ រដ្ឋមន្ត្រីក្រសួងអធិការកិច្ច នៅរាជធានីភ្នំពេញ នៅថ្ងៃទី២៨ ខែឧសភា។
លោក Tibor Balogdhi បានគូសបញ្ជាក់ថា ការជំរុញបន្ថែមទៀតនៃកិច្ចសហប្រតិបត្តិការសេដ្ឋកិច្ច ការវិនិយោគ និងពាណិជ្ជកម្មទ្វេភាគីគឺស្ថិតនៅក្នុងចំណុចអាទិភាពកំពូលរបស់លោកសម្រាប់បេសកកម្មនៅកម្ពុជា។
ដោយកោតសរសើរចំពោះអាទិភាពរបស់លោកឯកអគ្គរដ្ឋទូត លោក ហួត ហាក់ បានជម្រាបលោកឯកអគ្គរដ្ឋទូតអំពីស្ថានភាពនាពេលបច្ចុប្បន្ននៅកម្ពុជា រួមទាំងវិស័យនយោបាយ និងសេដ្ឋកិច្ចសង្គម និងគោលដៅរបស់ប្រទេសកម្ពុជាក្នុងការទាក់ទាញការវិនិយោគផ្ទាល់ពីបរទេសបន្ថែមទៀត។
លោករដ្ឋមន្ត្រីវាយតម្លៃខ្ពស់អំពីទំនាក់ទំនងការទូតដ៏ល្អរវាងប្រជាជាតិទាំងពីរចាប់តាំងពីឆ្នាំ១៩៥៦។ លោកបានថ្លែងអំណរគុណចំពោះរដ្ឋាភិបាលហុងគ្រីដែលបានចូលរួមចំណែកក្នុងការអភិវឌ្ឍន៍ប្រទេសកម្ពុជា ជាពិសេសលើវិស័យអប់រំ ពាណិជ្ជកម្ម និងទេសចរណ៍។ AKP
