ដោយ: គង់ លាងហួរ
អន្តរជាតិ: តម្លៃប្រេងបានធ្លាក់ចុះនៅថ្ងៃសុក្រនេះ បន្ទាប់ទិន្នន័យបានបង្ហាញថា ស្តុកប្រេងសាំងរបស់សហរដ្ឋអាមេរិកបានកើនឡើង២លានបារ៉ែលកាលពីសប្តាហ៍មុន ដែលគិតចាប់ពីថ្ងៃច័ន្ទ ទី២០ ដល់ថ្ងៃសុក្រ ទី២៤ ខែឧសភា ឆ្នាំ២០២៤។
តម្លៃប្រេងឆៅ Brent futures បានធ្លាក់ចុះ១២សេន មកនៅត្រឹម៨១,៧៤ដុល្លារ ក្នុងមួយបារ៉ែល គិតត្រឹមម៉ោងសកល 0008 GMT ខណៈតម្លៃប្រេងឆៅរបស់អាមេរិក West Texas Intermediate (WTI) បានធ្លាក់ចុះ១៧សេន មកនៅត្រឹម៧៧,៧៤ដុល្លារ ក្នុងមួយបារ៉ែល។
យោងតាមរបាយការណ៍ ដែលចុះផ្សាយនៅថ្ងៃព្រហស្បតិ៍ម្សិលមិញបានបង្ហាញថា កំណើនសេដ្ឋកិច្ចរបស់សហរដ្ឋអាមេរិកនៅក្នុងត្រីមាសទី១ ត្រូវបានធ្វើបច្ចុប្បន្នភាពសារជាថ្មី ដោយបានធ្លាក់ចុះមកនៅសល់ត្រឹម១,៣ភាគរយ បើប្រៀបធៀបទៅនឹងកំណើនចំនួន១,៦ភាគរយក្នុងទិន្នន័យបឋម ដែលចេញផ្សាយកាលពីមុន។
នាពេលនេះ ទីផ្សារមើលឃើញឱកាសចំនួន៥៥ភាគរយ ដែលធនាគារកណ្តាលអាមេរិក(Fed) អាចនឹងបញ្ចុះអត្រាការប្រាក់លើកដំបូងនៅក្នុងខែកញ្ញាខាងមុខ។ នេះបើយោងតាមឧបករណ៍ CME FedWatch ដែលត្រូវបានដកស្រង់ចុះផ្សាយដោយសារពត៌មាន Reuters។
សន្ទស្សន៍ប្រាក់ដុល្លារ ដែលវាស់វែងរូបិយប័ណ្ណដុល្លារអាមេរិក ធៀបទៅនឹងរូបិយប័ណ្ណដៃគូប្រជែងធំៗចំនួន៦ ដូចជាប្រាក់យ៉េន និងប្រាក់អឺរ៉ូជាដើម បានងើបឡើងថ្លៃ០,១៣%ដល់១០៤,៨៥ពិន្ទុនៅព្រឹកថ្ងៃសុក្រនេះ បើធៀបនឹងកម្រិត១០៤,៧២ពិន្ទុ គិតត្រឹមពេលបិទការជួញដូរកាលពីថ្ងៃព្រហស្បតិ៍ម្សិលមិញ។
ចំណែកឯ ផ្សារហ៊ុននៅតំបន់អាស៊ីបានងើបឡើងថ្លៃ នៅព្រឹកថ្ងៃសុក្រនេះ ខណៈពេលដែលក្រុមអ្នកវិនិយោគកំពុងរង់ចាំអ៊ុតមើលទិន្នន័យអតិផរណាពីតំបន់អឺរ៉ុប និងសហរដ្ឋអាមេរិក ដែលអាចនឹងកំណត់ទស្សនៈវិស័យ ឬគោលនយោបាយអត្រាការប្រាក់ជាសកល។
តាមរយៈការជួញដូរនៅព្រឹកថ្ងៃសុក្រនេះ សន្ទស្សន៍ផ្សារហ៊ុននៅតំបន់អាស៊ីរបស់ក្រុមហ៊ុនអាមេរិក MSCI នៅក្រៅប្រទេសជប៉ុន បានងើបឡើងថ្លៃប្រមាណ០,១៩ភាគរយ គិតត្រឹមម៉ោង១០:១៧នាទីព្រឹក។
ផ្សារហ៊ុន Nikkei របស់ប្រទេសជប៉ុនបានងើបឡើងថ្លៃ០,១៧ភាគរយ ខណៈពេលដែលសន្ទស្សន៍ផ្សារហ៊ុន Hang Seng របស់ទីក្រុងហុងកុងបានងើបឡើងថ្លៃ០,៨៧ភាគរយ។
ដោយឡែក សន្ទស្សន៍ផ្សារហ៊ុនបន្ទះឈីបពណ៌ខៀវ CSI300 របស់ប្រទេសចិន បានងើបឡើងថ្លៃ០,០៥៥ភាគរយ ខណៈដែលសន្ទស្សន៍ផ្សារហ៊ុន shanghai Composite បានងើបឡើងថ្លៃ០,១២ភាគរយ។
រីឯ ផ្សារហ៊ុនរបស់ប្រទេសអូស្ត្រាលី S&P /ASX 200 បានងើបឡើងថ្លៃ០,៥២ភាគរយ ខណៈពេលដែលសន្ទស្សន៍ផ្សារហ៊ុន KOSPI របស់ប្រទេសកូរ៉េខាងត្បូងបានងើបឡើងថ្លៃ០,៤៨ភាគរយ៕