ដោយ: គង់ លាងហួរ
អន្តរជាតិ: ផ្លូវរូងក្រោមទឹកសមុទ្រដំបូងបង្អស់របស់ប្រទេសឥណ្ឌា នៅក្នុងទីក្រុងបុមបៃ កំពុងបង្ហាញសញ្ញានៃការជ្រាបទឹក ក្រោយពីបើកដាក់ឱ្យដំណើរការកាលពី២ខែមុន។នេះបើយោងតាមសារពត៌មានឥណ្ឌា NDTV។
ផ្លូវរូងក្រោមសមុទ្រនេះ តភ្ជាប់តំបន់ Girgaon ភាគខាងត្បូងនៃទីក្រុងបុមបៃ ក្នុងរដ្ឋ Maharashtra ទៅកាន់តំបន់ Worli ភាគកណ្តាលនៃទីក្រុងបុមបៃ។ ផ្លូវនេះកាត់បន្ថយពេលវេលាធ្វើដំណើររវាងតំបន់ទាំង២ពី៤៥នាទី មកនៅសល់ត្រឹមតែ១០នាទីប៉ុណ្ណោះ។
ផ្លូវរូងក្រោមសមុទ្រនេះគឺជាប្រភេទផ្លូវភ្លោះ ដែលមានចំនួន២ខ្សែ។ ប៉ុន្តែ បច្ចុប្បន្ននេះ ផ្លូវតែ១ខ្សែប៉ុណ្ណោះ ដែលត្រូវបានបើកដាក់ឱ្យប្រើប្រាស់កាលពីថ្ងៃទី១១ ខែមីនា។ ផ្លូវនេះមានអង្កត់ផ្ចិតប្រមាណ១២,១៩ម៉ែត្រ និងមានយានយន្តជាង៧០ម៉ឺនគ្រឿងបានធ្វើដំណើរ គិតមកទល់ពេលនេះ។
ការជ្រាបទឹកនេះត្រូវបានគេថតជាវីដេអូបង្ហោះចែករំលែកយ៉ាងព្រោងព្រាតនៅលើប្រព័ន្ធផ្សព្វផ្សាយសង្គម ដែលការណ៍នេះបង្កឱ្យមានការព្រួយបារម្ភអំពីសុវត្ថិភាព មុនពេលរដូវវស្សាឈានចូលមកដល់។
យ៉ាងណាមិញ គេនៅមិនទាន់ដឹងច្បាស់ពីមូលហេតុ ដែលបណ្ដាលឲ្យមានការជ្រាបទឹកចូលទៅក្នុងផ្លូវរូងក្រោមសមុទ្រនេះនៅឡើយនោះទេ ខណៈបញ្ហានេះកំពុងត្រូវបានស៊ើបអង្កេត។
ជុំវិញរឿងនេះ អាជ្ញាធរនៃប្រទេសឥណ្ឌាបានជួបពិភាក្សាជាមួយក្រុមអ្នកជំនាញរួចទៅហើយ ដោយគូសបញ្ជាក់ថា ការជ្រាបទឹកនេះមិនបង្កការគំរាមកំហែងដល់រចនាសម្ព័ន្ធដើមនោះទេ។
ជាមួយគ្នានេះ លោក Eknath Shinde អភិបាលរដ្ឋ Maharashtra បានអះអាងថា “ចន្លោះប្រហោងដែលជ្រាបទឹកនឹងត្រូវបានជួសជុលភ្លាមៗ ដោយប្រើបច្ចេកវិទ្យាច្បាស់លាស់ ហើយយើងនឹងស្វែងរកដំណោះស្រាយជាអចិន្ត្រៃយ៍។ អ្នកដំណើរនឹងមិនប្រឈមមុខនឹងបញ្ហាអ្វីឡើយ”។
ផ្លូវរូងក្រោមសមុទ្រនេះ ត្រូវបានបើកសម្ពោធដោយលោក Eknath Shinde និងមន្ត្រីជាន់ខ្ពស់ផ្សេងៗទៀត ។ លោក Shinde បានបញ្ជាក់ថា ផ្លូវរូងក្រោមសមុទ្រនៃដំណាក់កាលទី២ នឹងត្រូវបើកដាក់ឱ្យប្រើប្រាស់នៅថ្ងៃទី១០ ខែមិថុនាខាងមុខ៕ប្រភព: NDTV៕
