ដោយៈ ហ្វីអូណា
ភ្នំពេញៈ កម្ពុជាទទួលបានគម្រោងវិនិយោគ ដែលចុះបញ្ជីក្នុងក្រុមប្រឹក្សាអភិវឌ្ឍន៍កម្ពុជាចំនួន១៤៧ម្រោង មានទឹកប្រាក់វិនិយោគសរុបប្រមាណ២៧០០លានដុល្លារអាមេរិក ក្នុងរយៈពេល៥ខែដើមឆ្នាំនេះ។
ព័ត៌មាននេះត្រូវបានលើកឡើងដោយសម្តេចធិបតីហ៊ុន ម៉ាណែតនាយករដ្ឋមន្រ្តីនៃកម្ពុជា នៅក្នុងពិធីសំណេះសំណាលជាមួយពលរដ្ឋ និងពលករកូរ៉េ ក្នុងពេលសម្តេចអញ្ជើញបំពេញទស្សនកិច្ចផ្លូវការនៅសាធារណរដ្ឋកូរ៉េ កាលពីពេលកន្លងថ្មីកន្លងទៅនេះ(ថ្ងៃទី១៥ ដល់ថ្ងៃទី១៨ ខែឧសភា ឆ្នាំ២០២៤)។
សម្ដេចធិបតី ហ៊ុន ម៉ាណែត បានបញ្ជាក់ថា “នេះគឺជាលទ្ធផលដែលបានមកពីការដើរទាក់ម៉ូយរបស់សម្ដេច និងមន្ត្រីជាន់ខ្ពស់ផ្សេងៗទៀត ហើយលទ្ធផលនេះក៏មិនទាន់ គិតចាប់តាំងពីការកកើតរាជរដ្ឋាភិបាលថ្មីក្នុងអំឡុងខែសីហា ឆ្នាំ២០២៣នោះដែរ ពោលគឺគិតពីខែមករា ដល់ខែឧសភា ២០២៤នេះតែប៉ុណ្ណោះ”។
សម្ដេចធិបតីបានបន្ថែមថា នៅក្នុងដំណើរទស្សនកិច្ចរបស់សម្ដេចនៅក្នុងប្រទេសកូរ៉េ រយៈពេលប៉ុន្មានថ្ងៃនេះ ក៏បានជួបជាមួយក្រុមហ៊ុនធំៗរបស់កូរ៉េជាច្រើន ហើយឃើញថាកូរ៉េបានចាប់អារម្មណ៍លើការវិនិយោគ នៅក្នុងប្រទេសកម្ពុជាបន្ថែម។ ដូច្នេះ នៅពេលខាងមុខនេះ កម្ពុជានឹងទទួលបានការវិនិយោគរបស់កូរ៉េបន្ថែមទៀត។
លោកហ្សង់ហ្វ្រង់ស័រ តាន់ រដ្ឋមន្ត្រីប្រតិភូអមនាយករដ្ឋមន្ត្រី ថ្លែងក្នុងសន្និសីទកាសែតលោកថា កម្ពុជាគ្រោងនឹងបង្កើតតំបន់សេដ្ឋកិច្ចពិសេស ដោយផ្ដោតលើតែវិនិយោគិនកូរ៉េប៉ុណ្ណោះ។ ការបង្កើតតំបន់សេដ្ឋកិច្ចនេះ នឹងសម្រួលដល់ការវិនិយោគ ពីប្រទេសកូរ៉េមកកាន់កម្ពុជាបានច្រើន ហើយក៏អាចទាក់ទាញវិនិយោគិន ពីបណ្តាប្រទេសដទៃចូលមកវិនិយោគនៅកម្ពុជាកាន់តែច្រើន។
លោកបន្តថា ក្រៅពីតំបន់សេដ្ឋកិច្ចពិសេសនេះ កម្ពុជាក៏បានជំរុញឱ្យបង្កើតតំបន់សេដ្ឋកិច្ចពិសេស ផ្ដោតលើវិនិយោគិនជប៉ុន និងវិនិយោគិនចិន ពោលគឺបង្កើតតំបន់សេដ្ឋកិច្ចពិសេស ផ្ដោតលើវិនិយោគិនមកពីប្រទេសមួយៗតែម្ដង ដែលនឹងធ្វើឱ្យវិនិយោគិនប្រទេសនោះ មានភាពងាយស្រួលជាងមុន។
ប្រភពក្រុមប្រឹក្សាអភិវឌ្ឍន៍កម្ពុជា បានបង្ហាញឱ្យឃើញថា រយៈពេលបួនខែកន្លងទៅនេះ មានគម្រោងវិនិយោគមួយចំនួនមានទីតាំងនៅក្នុងតំបន់សេដ្ឋកិច្ច ជាពិសេសគម្រោងវិនិយោគលើវិស័យឧស្សាហកម្ម និងមួយចំនួនទៀត នៅក្រៅតំបន់សេដ្ឋកិច្ចពិសេស។
ក្នុងនោះក៏ឃើញគម្រោងវិនិយោគធំមួយ បានបន្ថែមទុនវិនិយោគរបស់ខ្លួនបន្ថែមទៀត គឺរោងចក្រផលិតសំបកកង់យានយន្តនៅខេត្តស្វាយរៀង ដែលគម្រោងនេះ នឹងជួយផ្ដល់ឱកាសការងារជាច្រើននិងជួយរក្សាតម្លៃកៅស៊ូរបស់កម្ពុជា ឱ្យមានស្ថិរភាពលើទីផ្សារផងដែរ៕