ដោយ: គង់ លាងហួរ
អន្តរជាតិ: តម្លៃប្រេងបានធ្លាក់ចុះនៅថ្ងៃអង្គារនេះ ដោយសារ អ្នកវិនិយោគរំពឹងថា ការបន្តរឹតបន្តឹងអត្រាការប្រាក់របស់សហរដ្ឋអាមេរិកក្នុងរយៈពេលយូរ នឹងធ្វើឱ្យតម្រូវការអ្នកប្រើប្រាស់ និងឧស្សាហកម្មមានការថមថយចុះ។
តម្លៃប្រេងឆៅ Brent futuresបានធ្លាក់ចុះ១២សេនមកនៅត្រឹម៨៣,៣៤ដុល្លារក្នុងមួយបារ៉ែលគិតត្រឹមម៉ោងសកល 0041 GMT ខណៈតម្លៃប្រេងឆៅ West Texas Intermediate របស់អាមេរិកបានធ្លាក់ចុះ៨សេន មកនៅត្រឹម៧៩,៧២ដុល្លារក្នុងមួយបារ៉ែល។
លោក Philip Jefferson អនុប្រធានធនាគារ Fed បានថ្លែងកាលពីថ្ងៃច័ន្ទថា វាលឿនពេកហើយ! យើងមិនទាន់អាចប្រាប់បានថា តើអតិផរណានឹងបន្តថយចុះក្នុងរយៈពេលវែងឬក៏យ៉ាងណានោះទេ ខណៈលោក Michael Barr អនុប្រធានម្នាក់ទៀតរបស់ធនាគារ Fed បានអះអាងថា គោលនយោបាយរឹតបន្តឹងរូបិយវត្ថុ ត្រូវការពេលវេលាបន្ថែមទៀត។
នាពេលនេះ ទីផ្សាររំពឹងថា ធនាគារកណ្តាលអាមេរិក(Fed) អាចនឹងបញ្ចុះអត្រាការប្រាក់សរុបចំនួន០,៤១%ប៉ុណ្ណោះសម្រាប់ឆ្នាំ២០២៤ ដោយក្នុងនោះ កិច្ចប្រជុំនៅខែវិច្ឆិកាខាងមុខ មានឱកាសខ្ពស់បំផុតនៃការបញ្ចុះអត្រាការប្រាក់។នេះបើយោងតាមសារពត៌មាន Reuters។
នៅព្រឹកថ្ងៃអង្គារនេះ សន្ទស្សន៍ប្រាក់ដុល្លារ ដែលវាស់វែងរូបិយប័ណ្ណដុល្លារអាមេរិក ធៀបទៅនឹងរូបិយប័ណ្ណដៃគូប្រជែងធំៗចំនួន៦ ដូចជាប្រាក់យ៉េន និងប្រាក់អឺរ៉ូជាដើម បានងើបឡើងថ្លៃដល់ត្រឹម១០៤,៦១ពិន្ទុ។
ចំណែកឯ ផ្សារហ៊ុននៅតំបន់អាស៊ីក៏បានធ្លាក់ថ្លៃចុះផងដែរ នៅព្រឹកថ្ងៃអង្គារនេះ ស្របពេលដែលទស្សនៈវិស័យ និងពេលវេលាពិតប្រាកដនៃការបញ្ចុះអត្រាការប្រាក់របស់សហរដ្ឋអាមេរិកបន្តប្រឈមមុខនឹងភាពមិនច្បាស់លាស់។
តាមរយៈការជួញដូរនៅព្រឹកថ្ងៃអង្គារនេះ សន្ទស្សន៍ ផ្សារហ៊ុន នៅតំបន់អាស៊ី របស់ក្រុមហ៊ុនអាមេរិក MSCI នៅ ក្រៅ ប្រទេស ជប៉ុន បានធ្លាក់ថ្លៃចុះប្រមាណ០,៨៦ភាគរយ គិតត្រឹមម៉ោង១០:០៤នាទីព្រឹក។
ប៉ុន្តែ ផ្សារហ៊ុន Nikkei របស់ប្រទេសជប៉ុនបានងើបឡើងថ្លៃ០,១៧ភាគរយ ខណៈពេលដែលសន្ទស្សន៍ផ្សារហ៊ុន Hang Seng របស់ទីក្រុងហុងកុងបានធ្លាក់ថ្លៃចុះ១,៩៤ភាគរយ។
ដោយឡែក សន្ទស្សន៍ផ្សារហ៊ុនបន្ទះឈីបពណ៌ខៀវ CSI300 របស់ប្រទេសចិន បានធ្លាក់ថ្លៃចុះ០,៣២ភាគរយ ខណៈដែលសន្ទស្សន៍ផ្សារហ៊ុន shanghai Composite បានធ្លាក់ថ្លៃចុះ០,៣៦ភាគរយ។
រីឯ ផ្សារហ៊ុនរបស់ប្រទេសអូស្ត្រាលី S&P /ASX 200 បានធ្លាក់ថ្លៃចុះ០,២៧ភាគរយ ខណៈពេលដែលសន្ទស្សន៍ផ្សារហ៊ុន KOSPI របស់ប្រទេសកូរ៉េខាងត្បូងបានធ្លាក់ថ្លៃចុះ០,៤៩ភាគរយ៕
