ដោយៈ និស្ស័យ
ភ្នំពេញៈ សាជីវកម្មធានាឥណទានកម្ពុជា (CGCC) សហព័ន្ធស្រូវអង្ករកម្ពុជា (CRF) និងស្ថាប័នហិរញ្ញវត្ថុដែលចូលរួម (PFIs) បានចុះហត្ថលេខាលើកិច្ចព្រមព្រៀង លើគម្រោងធានាការនាំចេញអង្ករចំនួន៣០លានដុល្លារ (REGS)។
ឥណទាននេះផ្តល់ក្នុងគោលបំណង ដើម្បីជួយរោងម៉ាស៊ីនកិនស្រូវស្តុកទុកសម្រាប់កិន កែច្នៃ ការនាំចេញ និងការបង្កើនផលិតផលតម្លៃបន្ថែមក្នុងស្រុក។
ពិធីចុះហត្ថលេខានេះធ្វើឡើង កាលពីថ្ងៃសុក្រសប្តាហ៍មុនក្រោមអធិបតីភាព លោក រស់ សីលវ៉ា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ ក្រុមប្រឹក្សាភិបាលនៃសាជីវកម្ម ធានាឥណទានកម្ពុជា និងថ្នាក់ដឹកនាំ និងសមាជិកនៃ សហព័ន្ធស្រូវអង្ករកម្ពុជា ស្ថាប័នហិរញ្ញវត្ថុ និងសាជីវកម្មធានាឥណទានកម្ពុជា។
កិច្ចសហប្រតិបត្តិការជាផ្លូវការ ដោយភាគីទាំងបីលើគម្រោងធានាការនាំចេញអង្ករ សំដៅបង្កើនផលិតភាព និងការប្រកួតប្រជែងនៃឧស្សាហកម្មអង្កររបស់កម្ពុជា និងជំរុញការនាំចេញអង្ករស្របតាមគោលនយោបាយ របស់រាជរដ្ឋាភិបាលកម្ពុជាស្តីពីវិស័យកសិកម្ម។
សាជីវកម្មធានាឥណទានកម្ពុជា បានដាក់ចេញនូវគម្រោងធានាការនាំចេញអង្ករ ជាគម្រោងធានាឥណទានជាកញ្ចប់ (Portfolio Guarantee Scheme) ដែលមានស្ថាប័នហិរញ្ញវត្ថុ ចំនួនប្រាំពីរចូលរួម រួមមាន គ្រឹះស្ថានមីក្រូហិរញ្ញវត្ថុ អេ អឹម ខេ ធនាគារកាណាឌីយ៉ា ធនាគារពាណិជ្ជកម្មក្រៅប្រទេសនៃកម្ពុជា (FTB) ធនាគារមេយប៊ែង(ខេមបូឌា) ធនាគារព្រីនស៍ ធនាគារស្ថាបនា និងធនាគារវីង (កម្ពុជា)។
គម្រោងនេះនឹងដោះស្រាយតម្រូវការ ហិរញ្ញប្បទានរបស់អ្នកនាំចេញអង្ករ និងរោងម៉ាស៊ីនកិនស្រូវ ដែលមិនមានវត្ថុបញ្ចាំ ដើម្បីទទួលប្រាក់កម្ចីពីស្ថាប័នហិរញ្ញវត្ថុ ជាពិសេសក្នុងរដូវប្រមូលផល។
លោក រស់ សីលវ៉ា បានមានប្រសាសន៍ថា ការដាក់ឱ្យដំណើរការគម្រោងនេះ គឺជាការឆ្លុះបញ្ចាំងពីការប្តេជ្ញាចិត្តយ៉ាងមុតមាំ របស់ រដ្ឋាភិបាល ក្នុងការគាំទ្រផលិតកម្មស្រូវ និងការនាំចេញអង្កររបស់កម្ពុជា តាមរយៈគម្រោងធានាឥណទានសាធារណៈ ដែលCGCC ជាប្រតិបត្តិករ ដោយផ្តល់ការធានាចំនួន៨០ភាគរយ ជាមួយនឹងប្រាក់កម្ចីអតិបរមារហូតដល់៣លានដុល្លារ។
លោកបានមានប្រសាសន៍ថា “REGS នឹងគាំទ្រដល់តម្រូវការហិរញ្ញប្បទានរបស់អ្នកនាំចេញអង្ករ និងរោងម៉ាស៊ីនកិនស្រូវ ដើម្បីទិញស្រូវពីកសិករ ដើម្បីផលិតស្រូវសម្រាប់នាំចេញ ស្របតាមគោលនយោបាយរបស់រដ្ឋាភិបាល ក្នុងការបង្កើនផលិតកម្មនិងនាំចេញអង្កររបស់កម្ពុជា”។
លោកឧកញ៉ាចាន់ សុខឃាំង ប្រធានសហព័ន្ធស្រូវអង្ករកម្ពុជា បានមានប្រសាសន៍ថា កញ្ចប់ធានាឥណទានស្រូវ នឹងជួយឱ្យរោងម៉ាស៊ីនកិនស្រូវ ពង្រីកអាជីវកម្មរបស់ខ្លួន ក្នុងការប្រមូលស្រូវស្តុកសំរាប់កិនកែច្នៃនាំចេញ បង្កើត និងបង្កើននូវផលិតផលតម្លៃបន្ថែមនៅក្នុងស្រុក ដែលកើតចេញពីអនុផល នៃការកិនស្រូវទាំងអស់ដល់វិស័យផ្សេងទៀត ដូចជាវារីវប្បកម្ម និងកសិដ្ឋានចិញ្ចឹមសត្វ។
លោកបានបន្ថែមថា “កញ្ចប់ធានា ក៏ជាការលើកទឹកចិត្តបន្ថែមសម្រាប់ពង្រីកការនាំចេញ ដល់មួយលានតោនក្នុងមួយឆ្នាំដែលកំណត់ ដោយគោលនយោបាយផលិតកម្មស្រូវ របស់រាជរដ្ឋាភិបាល ហើយយើងជឿជាក់ថា ផែនការនេះនឹងសម្រេចបាននៅឆ្នាំ២០២៥” ៕