ដោយៈ និស្ស័យ
ភ្នំពេញៈ សាជីវកម្មធានាឥណទានកម្ពុជា (CGCC) សម្រាប់សហគ្រាសធុនតូច និងមធ្យម បាននិងកំពុងផ្តលើការធានាដល់ម្ចាស់សហគ្រាសធុនតូច និងមធ្យម ដែលអាចឲ្យពួកគេខ្ចីប្រាក់បានរហូតដល់៥០,០០០ដុល្លារដោយពុំចាំបាច់មានប្រាក់បញ្ចាំ។
យោងតាមទិន្នន័យពីត្រីមាសទី៤ ឆ្នាំ២០២៣ របស់សមាគមមីក្រូហិរញ្ញវត្ថុកម្ពុជា (CMA) សម្រាប់កម្ចីប្រភេទទី១ តិចជាង៣០០០ ដុល្លារ ចំនួន៨៥ភាគរយនៃប្រាក់កម្ចីទាំងនេះ ត្រូវបានផ្តល់ដោយមិនមានទ្រព្យសម្បត្ដិជាវត្ថុបញ្ចាំ។
ដោយឡែកសម្រាប់ប្រាក់កម្ចីប្រភេទទី២ ដែលមានទឹកប្រាក់ចន្លោះ $៣០០១- $ ១០.០០០ ចំនួន២២ភាគរយនៃប្រាក់កម្ចីត្រូវបានផ្តល់ដោយគ្មានវត្ថុបញ្ចាំ។ ហើយសម្រាប់ប្រាក់កម្ចីប្រភេទទី៣ ចន្លោះពី $១០.០០១-$៥០.០០០ – មានតែ១៩ភាគរយនៃប្រាក់កម្ចីត្រូវបានផ្តល់ដោយគ្មានវត្ថុបញ្ចាំ។
រហូតមកដល់ពេលនេះ ទិន្នន័យក៏នឹងពុំមានការផ្លាស់ប្តូរច្រើនដូចកាលពីឆ្នាំមុនប៉ុន្មាននោះទេ ប៉ុន្តែដោយឡែកសម្រាប់កម្ចីប្រភេទទី៤ ដែលមានលើសពី៥០.០០០ ដុល្លារឡើងទៅ៤០ភាគរយនៃកម្ចីត្រូវបានផ្តល់ដោយគ្មានវត្ថុបញ្ចាំ។
នេះបណ្តាលមកពី CGCC បានបង្កើតគំនិត និងអាជីវកម្មថ្មីក្នុងការធានា ផ្តល់ប្រាក់កម្ចីដែលមានចំនួន១៦៤លានដុល្លារដល់សហគ្រាសខ្នាតតូច និងមធ្យម (MSMEs)ចំនួន១.៩២៨ ក្នុងរយៈពេលបីឆ្នាំចុងក្រោយនេះ។
នាយកប្រតិបត្តិCGCC លោក KL Wong បានមានប្រសាសន៍ឲ្យដឹងថា ការធានាប្រាក់កម្ចីបែបនេះ បានធ្វើឱ្យសហគ្រាសធុនតូច និងមធ្យមរួមចំណែកបង្កើតការងារ។
លោកបានបន្តថា “កម្ចីដែលយើងផ្តល់អោយបានជួយបង្កើតការងារថ្មីជាង៥២.០០០កន្លែង នៅក្នុងប្រទេសកម្ពុជាពីសហគ្រាសធុនតូច និងមធ្យមដែលយើងបានគាំទ្រ”។
ជាមួយគ្នានេះ លោក ហេង បូមករា អគ្គនាយករងត្រួតពិនិត្យទី១ធនាគារជាតិនៃកម្ពុជាក៏បាននិយាយថា ការបង្កើត CGCC គឺជាការទទួលស្គាល់នូវតួនាទី ដ៏សំខាន់របស់សហគ្រាសធុនតូច និងមធ្យមនៅក្នុងសេដ្ឋកិច្ច។
លោកបន្តថា “សហគ្រាសធុនតូច និងមធ្យមតំណាងឱ្យចំនួន ៧០ភាគរយនៃឱកាសការងារក្នុងប្រទេស និងរួមចំណែក៥៨ភាគរយដល់GDPរបស់ប្រទេសយើង”។លោកបន្តថា “សហគ្រាសធុនតូច និងមធ្យមទាំងនេះ ដំណើរការក្នុងវិស័យដូចជាកសិកម្ម ឧស្សាហកម្ម និងសេវាកម្ម”។
ដោយគិតពីភាពចម្រុះនៃសហគ្រាសធុនតូច និងមធ្យមក្នុងប្រទេសCGCC បានធានាប្រាក់កម្ចីរហូតដល់៥០ភាគរយ សម្រាប់សហគ្រាសធុនតូច និងមធ្យមក្នុងសេវាកម្ម និងពាណិជ្ជកម្ម៣ភាគរយពីកសិកម្ម ។ ចំនួន៧ភាគរយពីឧស្សាហកម្ម និងចំនួន៤០ ភាគរយទៀតសម្រាប់សហគ្រាសធុនតូច និងមធ្យមផ្សេងទៀត។
សមាគមមីក្រូហិរញ្ញវត្ថុកម្ពុជា(CMA) បាននិយាយថា សមាជិកជាច្រើនរបស់ខ្លួន រួមទាំង LOLC Microfinance និង AMK Microfinance គឺជាស្ថាប័នហិរញ្ញវត្ថុ ដែលចូលរួមក្នុងគម្រោងរបស់ CGCC។
CGCC បានឃើញសកម្មភាពធានា ប្រាក់កម្ចីខ្ពស់បំផុតរបស់ខ្លួននៅក្នុងខែមីនា ឆ្នាំ២០២២ នៅពេលដែលវាបានធានាដល់អាជីវកម្មចំនួន៩១ សម្រាប់ប្រាក់កម្ចីចំនួន៨,៣ លានដុល្លារ។
នាយកប្រតិបត្តិ CGCC បាននិយាយថា ល្បឿននៃការផ្តល់ប្រាក់កម្ចីនេះ មានលំនឹងក្នុងឆ្នាំ២០២៣ ដែលសហគ្រាសរដ្ឋបានធានាចំនួន៧២ លានដុល្លារ ក្នុងចំនួនប្រាក់កម្ចីសម្រាប់៩៤៣ គណនី៕
