ដោយៈ គង់ សូរិយា
ភ្នំពេញៈ លោកឌិត ទីណារដ្ឋមន្រ្តីក្រសួងកសិកម្ម រុក្ខាប្រមាញ់និងនេសាទ បានណែនាំដល់ក្រុមការងារពិសោធន៍ ត្រូវគិតគូរពីវិធីសាស្ត្រ ដែលមានប្រសិទ្ធិភាពសេដ្ឋកិច្ច និងទទួលបានផលចំនេញពិតប្រាកដ។
លោកបានមានប្រសាសន៍បែបនេះ ក្នុងពេលអញ្ជើញស្តាប់បទបង្ហាញស្តីពី ការងារពិសោធន៍បង្ហាញតាមវិធីសាស្ត្រ កសិអេកូឡូស៊ី និងតាមវិធីសាស្ត្រ ប្រើប្រាស់ជីគីមីលើដំណាំស្រូវ នៅវិទ្យាស្ថានស្រាវជ្រាវនិងអភិវឌ្ឍន៍កសិកម្មកម្ពុជាកាលពីថ្ងៃទី៧ មិនា។
ក្នុងកិច្ចប្រជុំនេះ លោករដ្ឋមន្ត្រីបានណែនាំ ដល់ក្រុមការងារពិសោធន៍ ត្រូវគិតគូរពីវិធីសាស្ត្រ ដែលមានប្រសិទ្ធិភាពសេដ្ឋកិច្ច និងទទួលបានផលចំនេញពិតប្រាកដ។ លើសពីនេះទៅទៀត លោករដ្ឋមន្ដ្រីបានជំរុញឱ្យក្រុមការងារ ត្រូវប្រឹងប្រែងបន្ថែមទៀត ដោយតាមដានពីការចំនាយទាំងអស់ ក្នុងដំណើរការពិសោធន៍ និងតាមដានការងារពិសោធន៍ពីមួយឆ្នាំ ទៅមួយឆ្នាំឱ្យមានលទ្ធផលល្អ និងមានប្រសិទ្ធិភាព។
ការងារពិសោធន៍នេះ ធ្វើឡើងក្នុងគោលបំណងប្រៀបធៀបរយៈពេលខ្លី អំពីប្រសិទ្ធិភាពលើទិដ្ឋភាពសេដ្ឋកិច្ច បរិស្ថាន និងសង្គមនៃការអនុវត្តផលិតកម្មកសិកម្ម តាមវិធីសាស្ត្រកសិអេកូឡូស៊ី (Agroecology) ការប្រើប្រាស់ជីគីមី (Conventional Tillage) និងការប្រើប្រាស់ជីស្រស់ (Green Manure) ដោយផ្តោតលើពូជស្រូវ២ ប្រភេទគឺ ពូជស្រូវចំប៉ីស៧០ និងពូជស្រូវផ្ការំដួល៕