ដោយ: គង់ លាងហួរ
អន្តរជាតិ: អតិផរណាប្រចាំឆ្នាំនៅសហភាពអឺរ៉ុប និងតំបន់ចាយប្រាក់អឺរ៉ូ បានបន្តបង្ហាញពីសញ្ញានៃការថយចុះ ខណៈអត្រាអតិផរណារបស់បណ្តាប្រទេសសមាជិកEU ចំនួន១៥ បានថយចុះក្នុងខែមករា។
អតិផរណានៅក្នុងសហភាពអឺរ៉ុប បានធ្លាក់ចុះបន្តិចម្តងៗ និងជាប់លាប់ ចាប់តាំងពីបានហក់ឡើង ដល់កម្រិតខ្ពស់បំផុតរបស់ខ្លួន ក្នុងរង្វង់១១,៥% កាលពីខែតុលា ឆ្នាំ២០២២កន្លងទៅ។
តួយ៉ាង អតិផរណាប្រចាំឆ្នាំ នៅក្នុងសហភាពអឺរ៉ុបបានធ្លាក់ចុះពី៣,៤% នៅក្នុងខែធ្នូ ឆ្នាំ២០២៣ មកនៅត្រឹម៣,១%នៅខែមករា ឆ្នាំ២០២៤នេះ ។នេះបើយោងទៅតាម Eurostat ដែលជាការិយាល័យស្ថិតិរបស់សហភាពអឺរ៉ុប។
តួលេខនៅខែមករា បង្ហាញពីភាពខុសគ្នាផ្ទុយស្រឡះ បើធៀបនឹងរយៈពេលដូចគ្នាកាលពីឆ្នាំមុន ដែលនៅពេលនោះ អតិផរណាប្រចាំឆ្នាំរបស់សហភាពអឺរ៉ុប បានស្ថិតក្នុងរង្វង់១០,០ភាគរយ។
ទន្ទឹមនឹងនេះដែរ អត្រាអតិផរណាប្រចាំឆ្នាំរបស់តំបន់ចាយប្រាក់អឺរ៉ូ ស្ថិតក្នុងរង្វង់២,៨% ក្នុងខែមករា ឆ្នាំ២០២៤នេះ ដោយធ្លាក់ចុះពី២,៩% ក្នុងខែធ្នូ ឆ្នាំ២០២៣ និងធ្លាក់ចុះគួរឱ្យកត់សម្គាល់ បើធៀបនឹងអត្រាអតិផរណាចំនួន៨,៦% ក្នុងខែមករា ឆ្នាំ២០២៣។
ការធ្លាក់ចុះនៃអត្រាអតិផរណា បានបង្ហាញឱ្យឃើញថា តម្លៃទំនិញប្រើប្រាស់ កំពុងកើនឡើងយឺតជាងកាលពីមុន ទោះបីជាវានៅតែកើនឡើងយ៉ាងណាក្តី។
យោងតាមទិន្នន័យបឋមរបស់ការិយាល័យស្ថិតិ Eurostat ចេញផ្សាយនៅថ្ងៃទី១ ខែមីនា បង្ហាញថា អតិផរណាប្រចាំឆ្នាំនៅក្នុងតំបន់ចាយប្រាក់អឺរ៉ូ បានធ្លាក់ចុះមកនៅត្រឹម២,៦% ក្នុងខែកុម្ភៈ ធ្លាក់ចុះពី២,៨% នៅក្នុងខែមករា។ ទោះជាយ៉ាងណាក្តី អត្រានេះនៅតែមិនទាន់អាចថយចុះដល់គោលដៅ២% របស់ធនាគារកណ្តាលអឺរ៉ុបនៅឡើយ។
បើធៀបទៅនឹងខែធ្នូ ឆ្នាំ២០២៣ អតិផរណាប្រចាំឆ្នាំ បានធ្លាក់ចុះ នៅក្នុងបណ្តាប្រទេសសមាជិកសហភាពអឺរ៉ុបចំនួន១៥ នៅតែមានស្ថិរភាព ក្នុងប្រទេសសមាជិកEU ចំនួន១ និងបានកើនឡើងក្នុងប្រទេសសមាជិកចំនួន១១ផ្សេងទៀត។
បណ្តាប្រទេសសមាជិក EU ដែលមានអត្រាអតិផរណាប្រចាំឆ្នាំទាបជាងគេបំផុតក្នុងខែមករា គឺប្រទេសដាណឺម៉ាក និងអ៊ីតាលី ដែលអតិផរណានៅប្រទេសទាំង២នេះ បានថយចុះដល់០,៩ភាគរយ៕