ដោយៈ និស្ស័យ
ភ្នំពេញៈ របាយការណ៍របស់ក្រសួងពាណិជ្ជកម្មបានឱ្យដឹងថា ពាណិជ្ជកម្មរបស់កម្ពុជា ជាមួយប្រទេសសមាជិកភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) បានដល់ ២,៧៤ ពាន់លានដុល្លារ ក្នុងខែមករា កើនឡើង២១,២ភាគរយ ធៀបនឹងរយៈពេលមួយឆ្នាំ។
របាយការណ៍បានឱ្យដឹងថា ទំហំពាណិជ្ជកម្មសរុបរបស់កម្ពុជាជាមួយសមាជិក RCEP ផ្សេងទៀតមានចំនួន៦៧,៦ភាគរយ នៃទំហំពាណិជ្ជកម្មសរុប របស់ប្រទេសអាស៊ីអាគ្នេយ៍ចំនួន៤,០៥ ប៊ីលានដុល្លារ ក្នុងខែមករាឆ្នាំនេះ។
របាយការណ៍បានបន្ថែមថា ដៃគូពាណិជ្ជកម្មកំពូលទាំងប្រាំរបស់ខ្លួន ក្រោមកតិកាសញ្ញាពាណិជ្ជកម្មធំ ក្នុងតំបន់នេះគឺ ចិន វៀតណាម ថៃ ជប៉ុន និងឥណ្ឌូនេស៊ី។
រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្មកម្ពុជា លោក ប៉ែន សុវិជាតិ មានប្រសាសន៍ថា RCEP គឺជាកត្តាជំរុញកំនើនពាណិជ្ជកម្មរបស់ប្រទេស និងជាមេដែកដើម្បីទាក់ទាញការវិនិយោគផ្ទាល់ពីបរទេស កាន់តែច្រើនមកកាន់កម្ពុជា។
លោកបានមានប្រសាសន៍ថា ទោះបីជាមានការកើនឡើងនូវលទ្ធិគាំពារនិយម និងការធ្លាក់ចុះនៃតម្រូវការសកលក៏ដោយ ក៏ RCEP បានជំរុញកិច្ចសហប្រតិបត្តិការពាណិជ្ជកម្ម និងវិនិយោគក្នុងតំបន់ ដោយនាំមកនូវផលប្រយោជន៍យ៉ាងច្រើន ដល់ប្រទេសសមាជិកទាំងអស់។
លោកបានបន្តថា “វាបានជួយប្រទេសសមាជិក ក្នុងការជំរុញការស្តារឡើងវិញ ក្រោយជំងឺរាតត្បាតកាន់តែលឿន និងកំណើនពាណិជ្ជកម្មយូរអង្វែង ប្រកបដោយនិរន្តរភាព ដែលរួមចំណែកដល់ការលើកកម្ពស់សន្តិភាព ស្ថិរភាព ភាពសុខដុមរមនា ការអភិវឌ្ឍន៍ និងវិបុលភាពក្នុងតំបន់” ។
លោក សុវិជាតិ បានមានប្រសាសន៍ថា កតិកាសញ្ញាពាណិជ្ជកម្មសេរីដ៏ធំបំផុតរបស់ពិភពលោក នឹងជួយកម្ពុជាឱ្យសម្រេចបាននូវគោលដៅប្រកបដោយមហិច្ឆតារបស់ខ្លួន ក្នុងការក្លាយជាប្រទេសដែលមានចំណូលមធ្យម កម្រិតខ្ពស់នៅឆ្នាំ២០៣០ និងជាប្រទេសដែលមានចំណូលខ្ពស់នៅឆ្នាំ២០៥០។
កិច្ចព្រមព្រៀង RCEP ចូលជាធរមាននៅថ្ងៃទី១ ខែមករា ឆ្នាំ២០២២ ដោយមានប្រទេសចំនួន១៥ ក្នុងតំបន់អាស៊ីប៉ាស៊ីហ្វិក រួមមានប្រទេសសមាជិកអាស៊ានចំនួន១០ ដូចជា ប្រ៊ុយណេ កម្ពុជា ឥណ្ឌូនេស៊ី ឡាវ ម៉ាឡេស៊ី មីយ៉ាន់ម៉ា ហ្វីលីពីន សិង្ហបុរី ថៃ និងវៀតណាម និងដៃគូពាណិជ្ជកម្មចំនួន៥ រួមមាន ចិន ជប៉ុន កូរ៉េខាងត្បូង អូស្ត្រាលី និងនូវែលសេឡង់។ Xinhua៕
