ដោយ: គង់ លាងហួរ
អន្តរជាតិ: សមាគមដឹកជញ្ជូនផ្លូវអាកាសអន្តរជាតិ (IATA) បានព្យាករថា តម្រូវការធ្វើដំណើរតាមផ្លូវអាកាស ក្នុងតំបន់អាស៊ីប៉ាស៊ីហ្វិក នឹងស្ទុះងើបឡើងវិញ ដល់កម្រិតមុនផ្ទុះជំងឺរាតត្បាតនៅឆ្នាំ២០២៤នេះ។
យោងតាមសារពត៌មាន VN Express បានចុះផ្សាយថា តម្រូវការធ្វើដំណើរនៅតំបន់អាស៊ីប៉ាស៊ីហ្វិក បានកើនឡើងដល់ជិត៨៣% នៃកម្រិតមុនផ្ទុះជំងឺរាតត្បាត ក្នុងឆ្នាំ២០១៩ កាលពីខែធ្នូ ឆ្នាំ២០២៣កន្លងទៅ។
ចំណែកសារពត៌មាន Business Traveller បានចុះផ្សាយថា តួលេខនៅក្នុងឆ្នាំ២០២៤នេះ ទំនងជានឹងកើនឡើងដល់កម្រិតមុនផ្ទុះជំងឺរាតត្បាតកូវីដ-១៩។
ដំណើរការស្ទុះងើបឡើងវិញនេះ នឹងត្រូវបានជួយជំរុញ តាមរយៈការកើនឡើងនៃតម្រូវការធ្វើដំណើរ បន្ទាប់ពីប្រទេសនានាបានលុបចោលវិធានការរឹតបន្តឹង និងការងើបឡើងវិញនៃសេដ្ឋកិច្ចក្នុងតំបន់អាស៊ីប៉ាស៊ីហ្វិក។
ស្ថានីយទូរទស្សន៍ CNBC បានរាយការណ៍ថា កំណើនពលរដ្ឋចិន ដែលសម្រុកធ្វើដំណើរទៅក្រៅប្រទេស ក៏ជាកត្តាសំខាន់ ដែលជំរុញឱ្យតម្រូវការជើងហោះហើរ នៅក្នុងតំបន់អាស៊ីប៉ាស៊ីហ្វិកកើនឡើងផងដែរ។
យោងតាមការស្រាវជ្រាវ ពីក្រុមហ៊ុនផ្តល់សេវាហិរញ្ញវត្ថុ Citi បង្ហាញថា តួលេខភ្ញៀវទេសចរចិន ដែលចេញដំណើរទៅបរទេស មានចំនួន៣,៦លាននាក់ ក្នុងអំឡុងពិធីបុណ្យចូលឆ្នាំថ្មីប្រពៃណីចិន ខណៈពលរដ្ឋចិនភាគច្រើន បានធ្វើដំណើរមកកាន់ ប្រទេសថៃ សិង្ហបុរី ម៉ាឡេស៊ី វៀតណាម និងឥណ្ឌូនេស៊ី។
បើក្រឡេកទៅមើលប្រទេសថៃ ការកក់ជើងហោះហើរពីសំណាក់ភ្ញៀវទេសចរចិន បានកើនឡើង៤ដង ក្នុងអំឡុងពិធីបុណ្យចូលឆ្នាំចិននៅឆ្នាំ២០២៤នេះ បើប្រៀបធៀបទៅនឹងបុណ្យចូលឆ្នាំចិន កាលពីឆ្នាំ២០២៣។
ជាមួយគ្នានេះ ការកក់ជើងហោះហើរពីប្រទេសចិន ទៅកាន់ប្រទេសសិង្ហបុរីបានកើនឡើងជិត៦ដង។ លើសពីនេះ ចំនួនជើងហោះហើរពីប្រទេសចិន ទៅកាន់ម៉ាឡេស៊ី សិង្ហបុរី និងថៃ ត្រូវបានគេរំពឹងថា នឹងហក់ឡើង៨៧ភាគរយ នៅត្រីមាសទី២ បើធៀបនឹងរយៈពេលដូចគ្នាកាលពីឆ្នាំមុន៕
