ដោយៈ គង់ ម៉ាលីនណា
ភ្នំពេញៈ កម្ពុជាបាននាំចេញទំនិញទៅទីផ្សារអាមេរិក សម្រេចបានទំហំទឹកប្រាក់ប្រមាណ៦២៦លានដុល្លារ កើនឡើងចំនួន១១,៤ភាគរយ បើធៀបនឹងរយៈពេលដូចគ្នាឆ្នាំមុន ដែលមានទំហំទឹកប្រាក់ជាង៥៦២លានដុល្លារ។
យោងតាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជាបានបង្ហាញថា ទំហំពាណិជ្ជកម្មរវាងប្រទេសទាំងពីរ នៅក្នុងខែមករា មានចំនួនសរុប៦៤៤លានដុល្លារ ក្នុងនោះកម្ពុជាមានចេញទៅអាមេរិក មានចំនួន៦២៦លានដុល្លារ និងនាំចូលមកវិញមានចំនួនជាង១៧លានដុល្លារ មានការកើនឡើងចំនួន១០,៨ភាគរយ។
ទំនិញសំខាន់ៗដែលកម្ពុជា នាំទៅអាមេរិក មានដូចជា សម្លៀកបំពាក់ ផលិតផលធ្វើដំណើរ ស្បែកជើង គ្រឿងបង្គុំអេឡិចត្រូនិកអគ្គិសនី និងកង់ ខណៈទំនិញអាមេរិកនាំមកកម្ពុជា មានដូចជា រថយន្ត ឧបករណ៍អេឡិចត្រូនិក គ្រឿងម៉ាស៊ីន ផលិតផលប្រើបច្ចេកវិទ្យាទំនើបៗ និងឱសថ ជាដើម។
សហរដ្ឋអាមេរិក គឺជាទីផ្សារដ៏ធំជាងគេ ដែលបានទទួលទិញទំនិញរបស់កម្ពុជានៅឆ្នាំ២០២៣។
ការនាំចេញរបស់កម្ពុជាទៅកាន់ទីផ្សារអាមេរិក មានដំណើរការល្អ ពោលគឺសម្រេចបានទឹកប្រាក់ជិត៨,៩០ពាន់លានដុល្លារ រយៈពេល១២ខែ ឆ្នាំ២០២៣ ស្មើនឹង០,៨% បើធៀបនឹងឆ្នាំ២០២២ មានចំនួន៨,៩ពាន់លានដុល្លារ។ នេះបើតាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជា៕