ដោយៈ គង់ ម៉ាលីនណា
ភ្នំពេញៈ ប្រព័ន្ធធនាគារនៅកម្ពុជា បានកត់ត្រាកំណើនឥណទាន ក្នុងអត្រា៤,៨ភាគរយកាលពីឆ្នាំមុន ដែលជាកំណើនទាបមិនធ្លាប់មានក្នុងរយៈពេល២ទសវត្សរ៍ចុងក្រោយនេះ។
វិស័យមួយនេះនៅតែរឹងមាំ ក្នុងការជំរុញកំណើនសេដ្ឋកិច្ចយោងតាមរបាយការណ៍ចុងក្រោយបំផុត របស់ធនាគារជាតិនៃកម្ពុជា (NBC) គិតត្រឹមខែធ្នូ ឆ្នាំ ២០២៣ ប្រព័ន្ធធនាគាររបស់កម្ពុជាមានធនាគារពាណិជ្ជចំនួន៥៨ ធនាគារឯកទេស៩ និងគ្រឹះស្ថានមីក្រូហិរញ្ញវត្ថុ៨៧។ កំណើនឥណទានក្នុងប្រព័ន្ធធនាគារ បានកើនដល់ ៥៧,៦ពាន់លានដុល្លារ កាលពីឆ្នាំ ២០២៣ កើន ៤,៨ ភាគរយធៀបនឹងឆ្នាំ ២០២២។
របាយការណ៍ដដែលឱ្យដឹងទៀតថា ការបែងចែកប្រាក់កម្ចីតាមវិស័យរួមមានសណ្ឋាគារ និងភោជនីយដ្ឋាន បានកើនឡើង០,៦ ភាគរយប៉ុណ្ណោះ, ការលក់ដុំ កើនឡើង៤,៨ ភាគរយ, ការទិញលំនៅឋាន កើនឡើង៦,៤ ភាគរយ, អចលនទ្រព្យកើនឡើង១៦,៩ភាគរយ និងសំណង់ កើន១៣,៩ភាគរយ។ ប្រាក់កម្ចីមិនដំណើរការ (NPL) នៅក្នុងវិស័យធនាគារទាំងមូល មានចំនួន៥,៤ភាគរយ និងវិស័យមីក្រូហិរញ្ញវត្ថុមានចំនួន៦,៧ ភាគរយកាលពីឆ្នាំមុន។
របាយការណ៍ឱ្យដឹងទៀតថា ប្រាក់បញ្ញើនៅក្នុងប្រព័ន្ធធនាគារបានកើនឡើង១៣,១ភាគរយ ដល់៤៧,៩ពាន់លានដុល្លារកាលពីឆ្នាំ ២០២៣។
របាយការណ៍បន្ថែមថា ទ្រព្យសកម្មបច្ចុប្បន្ន ក្នុងប្រព័ន្ធធនាគារកម្ពុជាបានកើនឡើងដល់ ៨៤,៣ ពាន់លានដុល្លារកាលពីឆ្នាំមុន កើនឡើង ៨,៦ ភាគរយ ធៀបនឹងរយៈពេលដូចគ្នាកាលពីឆ្នាំ ២០២២។
ទេសាភិបាលធនាគារជាតិនៃកម្ពុជា លោកស្រី ជា សិរី បានថ្លែងនៅក្នុងកិច្ចប្រជុំបូកសរុបការងារប្រចាំឆ្នាំ កាលពីចុងខែមករាថា ក្នុងរយៈពេល២ឆ្នាំចុងក្រោយនេះ NPL មានការកើនឡើងតិចតួច ដោយសារការរីករាលដាលជំងឺកូវីដ១៩ និងការធ្លាក់ចុះកំណើនប្រាក់កម្ចី។
លោកស្រីបញ្ជាក់ថា “តាមពិតទៅ ប្រាក់កម្ចីមិនដំណើរការ គឺស្ថិតនៅក្រោមកម្រិត ដែលអាចគ្រប់គ្រងបាន ប៉ុន្តែការកើនឡើងប្រាក់កម្ចីមិនដំណើរការ នាំឱ្យមានការធ្លាក់ចុះប្រាក់ចំណេញ ដូច្នេះវាធ្វើឱ្យការបង្កើនល្បឿនកំណើនប្រាក់កម្ចី ដើម្បីគាំទ្រទៅដល់សកម្មភាពសេដ្ឋកិច្ច”៕
