ដោយៈ ម៉ាណេត
ព្រះសីហនុៈ ទំហំពាណិជ្ជកម្មនៃការនាំចេញ និងចូលក្នុងតំបន់សេដ្ឋកិច្ចពិសេសក្រុងព្រះសីហនុ (SSEZ)មានទំហំទឹកប្រាក់១,២៧៣លានដុល្លារអាមេរិក ក្នុងរយៈពេល ១០ខែ ឆ្នាំ២០២០ បើទោះបីជួបការលំបាកបណ្តាលមកពីវិបត្តិនៃជំងឺកូវីដ១៩ យ៉ាងណាក៏ដោយ។ នេះបើយោងតាមររបាយការណ៍របស់អគ្គនាយកដ្ឋានគយ និងរដ្ឋាករកម្ពុជានៅថ្ងៃទី១២ ខែវិច្ឆិកា ឆ្នាំ២០២០ ។
របាយការណ៍របស់អគ្គនាយកដ្ឋានគយ និងរដ្ឋាករកម្ពុជាបានបង្ហាញដែរថា ទំហំនេះកើនឡើង៣១.១% បើប្រៀបធៀបនឹងរយៈពេលដូចគ្នានាឆ្នាំ២០១៩ ។ ចំនួននេះស្មើនឹង១០៣% នៃទំហំនាំចេញ និងនាំចូលសរុបនាឆ្នាំ២០១៩ ។
រយៈពេល១០ខែ ឆ្នាំ២០២០នេះ កុងតឺន័រចេញចូល ក្នុងតំបន់សេដ្ឋកិច្ចពិសេសក្រុងព្រះសីហនុ មានរហូតដល់៣៦,២០៦កុងតឺន័រ។
តំបន់សេដ្ឋកិច្ចពិសេសក្រុងព្រះសីហនុ ដែលវិនិយោគដោយក្រុមហ៊ុនចិនបានគូសរំលេចក្នុងសេចក្តីប្រកាសព័ត៌មានរបស់ខ្លួនថា ទំហំនៃការធ្វើពាណិជ្ជកម្មនេះ បានបង្ហាញឱ្យឃើញពីសមត្ថភាព អភិវឌ្ឍប្រកបដោយចីរភាព នៃតំបន់សេដ្ឋកិច្ចពិសេស ក្រុងព្រះសីហនុ ក្នុងកំលុងពេលនៃវិបត្តិជំងឺកូវីដ១៩ ។
របាយការណ៍បានឱ្យដឹងថា “ទាំងនេះ ជាសមិទ្ធផលដ៏គួរឱ្យរំភើបចិត្ត ដែលទទួលបានក្នុងស្ថានភាពធ្ងន់ធ្ងរជំងឺវីរុស COVID-19 កំពុងតែរាត្បាតពាសពេញសកលលោក។ នេះបានឆ្លុះបញ្ចាំង ពីសន្ទុះអភិវឌ្ឍខ្លាំងរបស់តំបន់សេដ្ឋកិច្ចពិ សេសក្រុងព្រះសីហនុ និងបានបង្ហាញឱ្យឃើញពីការខិតខំប្រឹងប្រែងយ៉ាងខ្លាំង របស់ក្រុមហ៊ុនតំបន់សេដ្ឋកិច្ចពិសេសក្រុងព្រះសីហនុ” ។
រោងចក្រ សហគ្រាស និងបុគ្គលិកកម្មករទាំងអស់ បានចូលរួមបង្ការទប់ស្កាត់ជំងឺកូវីដ១៩ និងជម្រុញការអភិវឌ្ឍន៍សេដ្ឋកិច្ច ហើយក៏បានបង្ហាញឱ្យឃើញពីសមត្ថភាពអភិវឌ្ឍន៍ ប្រកបដោយចីរភាពរបស់តំបន់សេដ្ឋកិច្ចពិសេសក្រុងព្រះសីហនុផងដែរ។
តំបន់សេដ្ឋកិច្ចពិសេសក្រុងព្រះសីហនុ ដែលវិនិយោគដោយក្រុមហ៊ុនចិន ជាវេទិកាវិនិយោគអន្តរជាតិមួយ ដែលបើកចំហទូទាំងពិភពលោក ដែលបានបង្កើតទំនាក់ទំនងសេដ្ឋកិច្ច និងពាណិជ្ជកម្មយ៉ាងជិតស្និទ្ធ ជាមួយបណ្តាប្រទេសនៅលើពិភពលោក។ តាំងពីដើមរហូតដល់បច្ចុប្បន្ននេះ តំបន់សេដ្ឋកិច្ចពិសេសក្រុងព្រះសីហនុ បានចាត់ទុកការបម្រើសេវាកម្មជូនរោងចក្រសហគ្រាស និងធ្វើឱ្យបរិយាកាសអាជីវកម្មប្រសើរឡើងជាកិច្ចការដ៏សំខាន់បំផុត។
នៅឆ្នាំ២០២០នេះ នៅពេលដែលជំងឺកូវីដ១៩ចាប់ផ្តើមផ្ទុះឡើង តំបន់សេដ្ឋកិច្ចពិសេសក្រុងព្រះសីហនុ បានចាត់វិធានការប្រយុទ្ធប្រឆាំងជំងឺកូវីដ១ភ្លាមៗ ហើយបានអំពាវនាវឱ្យរោងចក្រ សហគ្រាស នៅក្នុងតំបន់សេដ្ឋកិច្ច។ ជាពិសេសធ្វើការប្រាស្រ័យទាក់ទងជាមួយដៃគូ វិនិយោគតាមប្រព័ន្ធអនឡាញ រួមគ្នាកសាងខ្សែការពារដ៏រឹងមាំមួយ ទើបអាចធានាគ្មានការឆ្លងពីជំងឺ COVID-19 នៅក្នុងតំបន់សេដ្ឋកិច្ចពិសេសក្រុងព្រះសីហនុ។ ធានាដល់ការដំណើការជាធម្មតា របស់រោងចក្រ សហគ្រាស និងបន្តរក្សាឱកាសការងារដល់ប្រជាពលរដ្ឋក្នុងតំបន់។
លើសពីនេះទៅទៀត បានប្រឹងប្រែងជំរុញការអភិវឌ្ឍដំណាក់កាល២ ដោយបង្កើនល្បឿនក្នុងការកសាង និងកែលម្អហេដ្ឋារចនាសម្ព័ន្ធសម្រាប់ផលិតកម្ម និងជីវភាពរស់នៅក្នុងតំបន់ផ្តល់ការធានារឹងមាំសម្រាប់រោងចក្រផលិត៕
