ដោយៈ គង់ សូរិយា
ភ្នំពេញៈ ការព្យាករថ្មីបានបង្ហាញថា ទុនបម្រុងអន្តរជាតិកម្ពុជានៅឆ្នាំ២០២៤នេះ នឹងកើនឡើងដល់ជាង២១ពាន់លានដុល្លារ ដោយកើនពីចំនួនជាង ១៩ ពាន់លានដុល្លារ (តាមការប៉ាន់ស្មាន) នៅក្នុងឆ្នាំ ២០២៣។
កំណើនទុនបម្រុងអន្តរជាតិនេះ អាចអនុញ្ញាតឱ្យកម្ពុជាធ្វើការនាំចូលទំនិញ និងសេវាកម្មសំខាន់ៗពីក្រៅប្រទេសបានចំនួន៦,៦ ខែ បើប្រទេសជាតិជួបនឹងវិបត្តិអ្វីមួយ ខណៈអ្នកសេដ្ឋកិច្ចអះអាងថា ការកើនឡើងទុនបម្រុងអន្តរជាតិ គឺបង្ហាញពីភាពរឹងមាំនៃសេដ្ឋកិច្ចជាតិ និងកំណើនការវិនិយោគផ្ទាល់ (FDI)។
យោងតាមឯកសារថវិកាសង្ខេបប្រចាំឆ្នាំ ២០២៤ ក្រសួងសេដ្ឋកិច្ច និងហិរញ្ញវត្ថុ (MEF) បានឱ្យដឹងថា សេដ្ឋកិច្ចប្រទេសកម្ពុជាក្នុងឆ្នាំ ២០២៤ ត្រូវបានព្យាករនឹងសម្រេចបាន កំណើនក្នុងរង្វង់៦,៦ ភាគរយ ដែលនឹងធ្វើឱ្យផលិតផលក្នុងស្រុកសរុប (ផសស) ថ្លៃបច្ចុប្បន្នស្ថិតក្នុងរង្វង់១៤,២៩៥៧ ពាន់លានរៀល (សមមូលប្រមាណ៣៥, ១៦៨ លានដុល្លារ) នៅក្នុងនោះទុនបម្រុងអន្តរជាតិកម្ពុជា សម្រាប់ឆ្នាំ ២០២៤ ត្រូវបានព្យាករនឹងមានចំនួន២១,២៨ ពាន់លានដុល្លារពីចំនួនប៉ាន់ស្មាន១៩,៤៤ ពាន់លានដុល្លារ ក្នុងឆ្នាំ២០២៣ និង១៧,៨ ពាន់លានដុល្លារ ក្នុងឆ្នាំ២០២២។
យោងតាមឯកសារដដែលបានបន្តថា ទោះបីជានៅក្នុងបរិការណ៍ដែលកម្ពុជា កំពុងទទួលផលពីសុខសន្តិភាព និងស្ថិរភាពនយោបាយក្នុងប្រទេស ហើយសេដ្ឋកិច្ចកំពុងងើបឡើងវិញ និងត្រឡប់ទៅរកភាពប្រក្រតី ក្រោយវិបត្តិនៃជំងឺកូវីដ១៩ក្តី ក៏កម្ពុជានៅតែមានបញ្ហាប្រឈម ជាមួយរចនាសម្ព័ន្ធខាងក្នុងមួយចំនួន ដែលធ្វើឱ្យដំណើរការធ្វើពិពិធកម្មសេដ្ឋកិច្ច មិនទាន់សម្រេចបានក្នុងល្បឿនខ្ពស់ តាមការរំពឹងទុកបានឡើយ ហើយភាពប្រកួតប្រជែងក៏នៅមានកម្រិត។
ម្យ៉ាងទៀតកម្ពុជា ក៏ដូចជាបណ្តាប្រទេសដទៃទៀត ក៏កំពុងត្រូវបានបន្តហ៊ុមព័ទ្ធដោយហានិភ័យ និងភាពមិនប្រាកដប្រជាពីកត្តាខាងក្រៅ។
ឯកសារបញ្ជាក់ថា ជារួមហានិភ័យ និងបញ្ហាប្រឈមទាំងនេះបាននិងកំពុងបង្កផលប៉ះពាល់ លើពាណិជ្ជកម្មអន្តរជាតិ ដែលអាចយាយីដល់កិច្ចខិតខំប្រឹងប្រែងរបស់កម្ពុជា ក្នុងការស្តារសេដ្ឋកិច្ចឡើងវិញ ក៏ដូចជាអាចប៉ះពាល់ដល់ គន្លងនៃការអភិវឌ្ឍសង្គម សេដ្ឋកិច្ចឆ្ពោះទៅជាប្រទេសមានចំណូលមធ្យម កម្រិតខ្ពស់នៅឆ្នាំ២០៣០។
សេដ្ឋវិទូនៃរាជបណ្ឌិត្យសភាកម្ពុជា លោក ហុង វណ្ណៈ បានមានប្រសាសន៍ថា ទុនបម្រុងអន្តរជាតិ គឺជាប្រាក់ដែលរដ្ឋាភិបាលប្រទេសនីមួយៗតម្កល់ទុក សម្រាប់ប្រើប្រាស់នៅពេល ប្រទេសជួបវិបត្តិអ្វីមួយ ដោយរដ្ឋាភិបាលអាចដកទុនបម្រុងអន្តរជាតិ ទៅចំណាយលើការទិញស្បៀងអាហារ ថ្នាំពេទ្យ… ឬប្រេងឥន្ធនៈជាដើម ដើម្បីធានានិរន្តរភាពសង្គម និងសេដ្ឋកិច្ច។
លោកបន្ថែមថា “កំនើនទុនវិនិយោគ គឺឆ្លុះបញ្ជាំងពីស្ថានភាពការវិនិយោគផ្ទាល់នៅកម្ពុជាផងដែរ ពីព្រោះនៅពេលសកម្មភាពសេដ្ឋកិច្ច ក្នុងប្រទេសមានដំណើរការល្អ ទើបរដ្ឋាភិបាលអាចរក្សាទុក ឬបង្កើនទុនបម្រុងអន្តរជាតិបានច្រើន”។
យោងតាម World Econo-mic Forum រូបិយប័ណ្ណបរទេស ឬទុនបម្រុងបរទេស ឬគេស្គាល់ថា ជាទុនបម្រុងអន្តរជាតិ រួមមានសាច់ប្រាក់ និងទ្រព្យសកម្មផ្សេងទៀតដូចជាមាស ដែលត្រូវបានតម្កល់ទុកដោយធនា-គារកណ្តាល និងស្ថាប័នហិរញ្ញវត្ថុផ្សេងទៀត ដូចជា មូលនិធិរូបិយវត្ថុអន្តរជាតិ (IMF)៕
