ដោយៈ និស្ស័យ
ភ្នំពេញៈ ធនាគារកសិកម្ម និងអភិវឌ្ឍន៍ជនបទ (ARDB) បានបញ្ចេញទុនរបស់ខ្លួន ចំនួនជាង៤០០លានដុល្លារ ដើម្បីចូលរួមអភិវឌ្ឍន៍ និងលើកកម្ពស់ផលិតភាពការដាំដុះ និងជំរុញការនាំចេញ។
ក្នុងចំណោមទុនដែលបញ្ចេញនោះ មានចំណែក៥០ភាគរយបានប្រើប្រាស់នៅក្នុងវិស័យស្រូវ-អង្ករ។
លោកកៅ ថាច អគ្គនាយក ARDB ថ្លែងក្នុងកម្មវិធីខួប២៥ ឆ្នាំ នៃការបង្កើតធនាគារនេះ កាលពីសប្តាហ៍មុនថា ចាប់តាំងពីការកកើតធនាគារនៅឆ្នាំ១៩៩៨ ឆ្នាំ២០២៣ មូលនិធិភាគទុនិករបស់ធនាគារបានចាប់ផ្តើមពី២,៥លានដុល្លារ នៅឆ្នាំ១៩៩៨ និងកើនឡើងដល់ប្រមាណ១៧០លានដុល្លារនៅឆ្នាំ២០២៣ ដែលមានកំណើនជាមធ្យមប្រមាណ២២ភាគរយក្នុង១ឆ្នាំ។
លោកបញ្ជាក់ថា សម្រាប់សំពាធឥណទាន បានចាប់ផ្តើមពី ០,៥២ លានដុល្លារនៅឆ្នាំ ១៩៩៨ និងបានកើនដល់ប្រមាណ ៤២៣ លានដុល្លារនៅក្នុងឆ្នាំ២០២៣ ដែលមានកំណើនមធ្យម២៨ភាគរយក្នុង១ឆ្នាំ និងមានទ្រព្យសកម្មសរុប បានផ្តើមពី២,៥ លានដុល្លារនៅឆ្នាំ១៩៩៨ និងកើនដល់ប្រមាណ៤៦០ លានដុល្លារនៅឆ្នាំ ២០២៣ ដែលមានកំណើន ជាមធ្យមប្រមាណ២៣ភាគរយក្នុង១ឆ្នាំ។
លោកបានបន្តទៀតថា ក្នុងនាមជាធនាគារបម្រើគោលនយោបាយរបស់រដ្ឋាភិបាលARDB ត្រូវបានធ្វើកំណែទម្រង់ស៊ីជម្រៅ ហើយការកំណែទម្រង់ជាបន្តបន្ទាប់ គឺបានប្រែក្លាយធនាគារអភិវឌ្ឍន៍ជនបទ (RDB) ទៅជាធនាគារអភិវឌ្ឍន៍ជនបទ និងកសិកម្ម (ARDB) ដែលមានមុខងារជាធនាគារពាណិជ្ជ និងបានពង្រីកប្រតិបត្តិការធនាគារបានពេញលេញរបស់ខ្លួន។
លោកបន្ថែមថា ធនាគារARDB បានបង្កើតគម្រោងមួយចំនួនក្នុងការអភិវឌ្ឍវិស័យកសិកម្ម ដូចជា ការបង្កើតមូលនិធិទ្រទ្រង់ និងអភិវឌ្ឍវិស័យកសិកម្ម ដើម្បីអនុវត្តគោលនយោបាយ វិស័យកសិកម្មស្តីពីការជំរុញផលិតកម្មស្រូវ និងការនាំចេញអង្ករARDB ដែលជាប្រតិបត្តិករបានអនុវត្តន៍ ដើម្បីគាំទ្រដល់វិស័យឯកជន ពិសេស SMEs សមាគម សហគមន៍ ឬក្រុមហ៊ុនលើគោលដៅអាទិភាពក្នុងការធានាស្ថិរភាពថ្លៃ និងសន្តិសុខស្បៀង ពង្រឹងសមត្ថភាពឃ្លាំងស្តុកស្រូវ ម៉ាស៊ីនសម្ងួត និងម៉ាស៊ីនកែច្នៃទំនើប។ល។
លោកបញ្ជាក់ថា គម្រោងហិរញ្ញប្បទានពិសេសគាំទ្រ ដល់វិស័យស្រូវ-អង្ករ ពិសេសគាំទ្រដល់ហេដ្ឋារចនាសម្ព័ន្ធ ពាក់ព័ន្ធនឹងស្រូវអង្ករ ក្នុងការកសាងតាមរបៀប “សាងសង់ប្រតិបត្តិការ និងទូទាត់សំណង» ដើម្បីដោះស្រាយបញ្ហាកង្វះខាត នៃហេដ្ឋារចនាសម្ព័ន្ធក្នុងខ្សែច្រវាក់ផលិតកម្មស្រូវ-អង្ករ”៕