ដោយៈ សហការី
ភ្នំពេញៈ កត់សម្គាល់រយៈពេលមួយទសវត្សរ៍ នៃប្រតិបត្តិការ នៅកម្ពុជា ធនាគារពាណិជ្ជ ឈីហ្វ (ខេមបូឌា) បានបង្ហាញពាណិជ្ជសញ្ញាថ្មីរបស់ខ្លួន ដែលជាជំហ៊ានមួយមិនត្រឹមតែបង្ហាញអំពី ការផ្លាស់ប្តូរពាណិជ្ជសញ្ញាសាជីវកម្មថ្មីប៉ុណ្ណោះទេ ប៉ុន្តែក៏ប្រកាសអំពីការត្រៀមខ្លួនរបស់ខ្លួន ក្នុងការចាប់យកយុគធនាគារឌីជីថលដំបូងគេផងដែរ។
ពាណិជ្ជសញ្ញាថ្មី ពោរពេញដោយថាមវន្ត ដែលជាផ្នែកមួយនៃគំនិតផ្តួចផ្តើមជាយុទ្ធសាស្រ្ត ដើម្បីឆ្លើយតបនឹងមនុស្សវ័យក្មេង ដែលមានចំណេះដឹងផ្នែកបច្ចេកវិទ្យានៅកម្ពុជា ខណៈធនាគារប្រារព្ធគម្រប់ខួបអនុស្សាវរីយ៍១០ឆ្នាំ នៅក្នុងឧស្សាហកម្មនេះ។ លោកបណ្ឌិត សឿង ម៉ូរ៉ារិទ្ធ ប្រធាននាយកប្រតិបត្តិធនាគារ ឈីហ្វ បានពន្យល់ពីសារៈសំខាន់ នៃពាណិជ្ជសញ្ញាថ្មីនេះថា ជាតំណាងនៃស្ថាប័នមួយ ដែលតម្រង់ខ្លួនឡើងវិញ ជាមួយការគិតឆ្ពោះទៅមុខ លើអតិថិជនដែលមានចំណេះដឹងផ្នែកឌីជីថល ដែលកំពុងតែក្លាយជាចំណុចស្នូល នៃវិស័យហិរញ្ញវត្ថុកាន់តែទូលំទូលាយ នៅកម្ពុជា។
លោកបណ្ឌិតបានបញ្ជាក់ថា “ពាណិជ្ជសញ្ញាថ្មីរបស់ធនាគារ ឈីហ្វ នេះគឺជាសក្ខីភាពមួយបង្ហាញ ពីការប្តេជ្ញាចិត្តរបស់យើងចំពោះការច្នៃប្រឌិតថ្មី និងការត្រៀមខ្លួនរបស់យើង ដើម្បីឆ្លើយតបទៅនឹងយុគឌីជីថល”។លោកបន្ថែមថា “វាមិនមែនគ្រាន់តែជាការផ្លាស់ប្តូរការរចនាប៉ុណ្ណោះទេ ប៉ុន្តែជាការផ្តល់សញ្ញាមួយ ទៅកាន់ទីផ្សារថា យើងកំពុងវិវឌ្ឍន៍ជាមួយ នឹងតម្រូវការរបស់អតិថិជនដែលកំពុងមានការផ្លាស់ប្តូរ ជាពិសេសយុវជនជំនាន់ក្រោយ ដែលជាអនាគតអ្នកដឹកនាំប្រទេសជាតិ”។ផែនការយុទ្ធសាស្រ្ត និងវិធីសាស្រ្តឆ្លើយតបទៅនឹងតម្រូវការទីផ្សារ ចាប់តាំងពីបានបើកប្រតិបត្តិការ ក្នុងទីផ្សារកម្ពុជាក្នុងឆ្នាំ២០១៣ ធនាគារឈីហ្វ បានក្លាយពីធនាគារឯកទេសទៅជាធនាគារពាណិជ្ជដ៏ទូលំទូលាយមួយនៅក្នុងឆ្នាំ២០១៨។ ដំណើររបស់ធនាគារ ត្រូវបានកត់សម្គាល់ដោយភាពធន់ដ៏ខ្លាំងក្លា នៅចំពោះមុខការប្រែប្រួលសេដ្ឋកិច្ចទាំងក្នុងស្រុកនិងសកល។
ភាពធន់នេះត្រូវបានឆ្លុះបញ្ចាំង នៅក្នុងកំណើននៃប្រាក់បញ្ញើសរុបរបស់ខ្លួន ដែលបច្ចុប្បន្នមានលើសពី១៦០លានដុល្លារ ហើយទ្រព្យសកម្មសរុបរបស់ធនាគារ មានចំនួនលើសពី២៤០លានដុល្លារ គិតត្រឹមខែវិច្ឆិកាឆ្នាំនេះ។ ភាពរឹងមាំផ្នែកហិរញ្ញវត្ថុនេះ គឺជាលទ្ធផលដែលកើតឡើងដោយផ្ទាល់ពីផែនការយុទ្ធសាស្រ្តរបស់ធនាគារ និងវិធីសាស្រ្តឆ្លើយតបរបស់ធនាគារចំពោះតម្រូវការទីផ្សារ។
ប្រធាននាយកប្រតិបត្តិបានរំលឹក ពីការវិវឌ្ឍយុទ្ធសាស្ត្ររបស់ធនាគារ ដោយសង្កត់ធ្ងន់លើគុណតម្លៃរបស់ខ្លួនថា “យើងបានកសាងមូលដ្ឋានគ្រឹះនៃការជឿទុកចិត្ត ជាមួយអតិថិជនរបស់យើង តាមរយៈការយកចិត្តទុកដាក់ ចំពោះក្រមសីលធម៌វិជ្ជាជីវៈ សុចរិតភាព ភាពប្រុងប្រយ័ត្ន និងតម្លាភាព។ ទាំងនេះមិនមែនគ្រាន់តែជាគោលការណ៍ប៉ុណ្ណោះទេ ប៉ុន្តែជាសសរស្តម្ភ ដែលបានគាំទ្រដល់ដំណើររបស់យើងក្នុងមួយទសវត្សរ៍កន្លងមកនេះ”។
ការប្តេជ្ញាចិត្តរបស់ធនាគារឈីហ្វ គឺរក្សាល្បឿនជាមួយនឹងបច្ចេកវិទ្យាហិរញ្ញវត្ថុចុងក្រោយបំផុត ដែលបាននាំឱ្យមានភាពជាដៃគូយុទ្ធសាស្ត្រ ជាមួយនឹងក្រុមហ៊ុនឈានមុខ ផ្នែកបច្ចេកវិទ្យាមកពីទីក្រុងហុងកុង និងឥណ្ឌា ជាដើម។ ភាពជាដៃគូទាំងនេះមានសារៈសំខាន់ណាស់ក្នុងការធានាថា ហេដ្ឋារចនាសម្ព័ន្ធបច្ចេកវិទ្យារបស់ធនាគារនៅតែឈានមុខគេ និងមានប្រសិទ្ធភាព ដែលជាភាពចាំបាច់សម្រាប់បម្រើអតិថិជនជំនាន់ថ្មី។
ខណៈធនាគារ ឈីហ្វ កំពុងសម្លឹងមើលទៅវិសាលភាពកាន់តែធំ លោកបណ្ឌិតម៉ូរ៉ារិទ្ធ បានបង្ហាញផែនការពង្រឹងពាណិជ្ជសញ្ញាសាជីវកម្ម ប្រកាន់ខ្ជាប់យ៉ាងតឹងរ៉ឹងនូវស្តង់ដារ អនុលោមភាព និងពង្រីកវត្តមានរបស់ពួកគេ នៅតាមទីតាំងសំខាន់ៗក្នុងរាជធានីភ្នំពេញ។
ប្រធាននាយកប្រតិបត្តិ ក៏បានចែករំលែកនូវចំណេះដឹងសម្រាប់អ្នកមានទេពកោសល្យ នៅក្នុងឧស្សាហកម្មធនាគារ ដែលកំពុងរីកចម្រើន ដោយលើកឡើងពីសារៈសំខាន់ នៃការរៀនសូត្រឥតឈប់ឈរ កំណត់ត្រាជោគជ័យដ៏រឹងមាំ និងការរក្សាបាននូវសុចរិតភាព។
ពាណិជ្ជសញ្ញាឆ្លុះបញ្ជាំងពីភាពយុវវ័យនិងច្នៃប្រឌិតដែលជាការផ្លាស់ប្តូររបស់ធនាគារឌីជីថលដំបូងគេ គំនិតផ្តួចផ្តើមបង្កើតពាណិជ្ជសញ្ញាថ្មីនេះឡើង គឺជារបត់ដ៏សំខាន់មួយសម្រាប់ធនាគារ ឈីហ្វ នៅពេលដែលធនាគារឈានចូលទៅកាន់ទសវត្សរ៍ទី២ នៃប្រតិបត្តិការរបស់ខ្លួន។ ពាណិជ្ជសញ្ញាថ្មីនេះមិនត្រឹមតែឆ្លុះបញ្ចាំងពីស្មារតីក្មេងវ័យ និងគំនិតច្នៃប្រឌិតប៉ុណ្ណោះទេ ប៉ុន្តែវាក៏ជានិមិត្តសញ្ញា នៃការខិតខំប្រឹងប្រែងឥតឈប់ឈររបស់ធនាគារឈីហ្វ ក្នុងការក្លាយជាគ្រឹះស្ថានធនាគារ បែបឌីជីថលដំបូងគេដែលអាចឆ្លើយតប និងបំពេញតម្រូវការសេវាកម្ម ធនាគាររបស់យុវជនកម្ពុជា។ ដំណើររយៈពេលមួយទស្សវត្សរ៍របស់ធនាគារ ឈីហ្វបានបង្ហាញយ៉ាងស៊ីជម្រៅអំពីកំណើន និងភាពធន់នៅក្នុងបរិយាកាសសេដ្ឋកិច្ចដ៏លំបាកបន្ទាប់ពីជំងឺកូវីដ១៩។ វាជាការគូសបញ្ជាក់ពីអំណាចនៃទំនុកចិត្តរបស់អតិថិជន ចក្ខុវិស័យជាយុទ្ធសាស្ត្រ និងការទទួលយកបច្ចេកវិទ្យាឌីជីថល ក្នុងវិស័យធនាគារ ដែលកំពុងមានការប្រកួតប្រជែង។ ខណៈដែលធនាគារឈានជើងចូល ដល់ឆ្នាំ២០២៤ និមិត្តសញ្ញាថ្មីនេះ មិនគ្រាន់តែជាការធ្វើបច្ចុប្បន្នភាព លើសោភ័ណភាពប៉ុណ្ណោះទេ ប៉ុន្តែជាការប្រកាសអំពីយុទ្ធសាស្ត្រតម្រង់ទិស នាពេលអនាគតរបស់ធនាគារឈីហ្វ និងមហិច្ឆតារបស់ខ្លួន ក្នុងការបន្តជាផ្នែកដ៏សំខាន់មួយ នៃវិស័យហិរញ្ញវត្ថុរបស់ប្រទេសកម្ពុជា ដែលឆ្លុះបញ្ចាំង ជាពិសេសជាមួយនឹងបំណងប្រាថ្នា របស់មនុស្សជំនាន់ក្រោយ៕