ដោយ: គង់ លាងហួរ
ប៉េកាំង: យោងតាមទិន្នន័យពីក្រុមហ៊ុន China State Railway Group Co., Ltd. បានបង្ហាញថា ខ្សែផ្លូវរថភ្លើងថ្មីសរុបប្រវែង១.៤០២គីឡូម៉ែត្រ ត្រូវបានដាក់ឱ្យប្រើប្រាស់ នៅទូទាំងប្រទេសចិនក្នុងរយៈពេល៣ត្រីមាសដំបូង នៃឆ្នាំ២០២៣នេះ ឬស្មើនឹងរយៈពេល៩ខែ។
នេះបើយោងតាមការចុះផ្សាយ ដោយសារពត៌មានរបស់រដ្ឋចិន Xinhua កាលពីពេលថ្មីៗកន្លងទៅនេះ។ ក្នុងចំណោមខ្សែផ្លូវរថភ្លើងថ្មី សរុបប្រវែង១.៤០២គីឡូម៉ែត្រនេះ គេសង្កេតឃើញថា ខ្សែផ្លូវរថភ្លើងល្បឿនលឿន មានប្រវែង១.២៧៦គីឡូម៉ែត្រ ដែលត្រូវបានដាក់ឱ្យដំណើរការ ។នេះបើតាមក្រុមហ៊ុន China State Railway Group។
បណ្តាគម្រោងធំៗក្នុងការសាងសង់ ហេដ្ឋារចនាសម្ព័ន្ធផ្លូវដែករបស់ប្រទេសចិន បានរីកចម្រើនយ៉ាងលឿនរហ័សបំផុត ក្នុងអំឡុងរយៈពេលខាងលើនេះ។
ជាក់ស្តែង ការវិនិយោគទ្រព្យសកម្មថេរ នៅក្នុងវិស័យផ្លូវដែករបស់ប្រទេសចិន បានកើនឡើង៧,១ភាគរយ ដល់ទំហំទឹកប្រាក់៥០៨,៩ពាន់លានយ័ន (ប្រហែល៧០,៩ពាន់លានដុល្លារអាមេរិក)ក្នុងរយៈពេល៣ត្រីមាសដំបូងនៃឆ្នាំ២០២៣នេះ។
ក្រុមហ៊ុនខាងលើបានអះអាងទៀតថា ប្រទេសចិនគ្រោងនឹងដាក់ឱ្យដំណើរការខ្សែរថភ្លើងថ្មី ដែលមានប្រវែងសរុបជាង៣.០០០គីឡូម៉ែត្រ ក្នុងឆ្នាំនេះ ដែលក្នុងនោះ ខ្សែរថភ្លើងប្រវែង២.៥០០គីឡូម៉ែត្រ គឺជារថភ្លើងល្បឿនលឿន។
កាលពីពេលថ្មីៗនេះ រថភ្លើងដឹកទំនិញចិន-អឺរ៉ុប ដែលផ្ទុកពេញចំណុះ បានធ្វើដំណើរមកដល់ទីក្រុងម៉ាឌ្រីដ ប្រទេសអេស្បាញ ដែលជារថភ្លើងដំបូងគេ តភ្ជាប់ពីខេត្តសានស៊ីភាគខាងជើង របស់ប្រទេសចិនទៅកាន់ប្រទេសអេស្ប៉ាញ៕