ដោយ: គង់ លាងហួរ
ភ្នំពេញ: នៅថ្ងៃអង្គារនេះ កម្ពុជាបានប្រកាសអនុវត្តកម្មវិធីមួយ ដើម្បីផ្តល់ការបណ្តុះបណ្តាលវិជ្ជាជីវៈ និងបច្ចេកទេសដោយឥតគិតថ្លៃដល់យុវជនប្រមាណ១,៥លាននាក់ ដែលមកពីគ្រួសារក្រីក្រ និងងាយរងគ្រោះនៅទូទាំងប្រទេស។
ថ្លែងក្នុងពិធីប្រកាសដាក់ឱ្យអនុវត្តន៍កម្មវិធីជាផ្លូវការ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានអះអាងថា កម្មវិធីនេះមានគោលបំណង បំពាក់ឱ្យយុវជននូវជំនាញបច្ចេកទេស ដើម្បីឱ្យពួកគេអាចទទួលបានការងារ និងប្រាក់ចំណូលកាន់តែប្រសើរនាពេលអនាគត។
សម្តេចបានមានប្រសាសន៍បន្តថា “យុវជនក្រីក្រ និងងាយរងគ្រោះ មិនត្រឹមតែទទួលបានការបណ្តុះបណ្តាល ដោយឥតគិតថ្លៃប៉ុណ្ណោះទេ ប៉ុន្តែថែមទាំងទទួលបានប្រាក់ឧបត្ថម្ភ ប្រចាំខែចំនួន២៨០.០០០រៀល (ប្រហែល៧០ដុល្លារ)ផងដែរ”។
ជាក់ស្តែង យុវជននឹងអាចសិក្សា នៅតាមសាលាបណ្តុះបណ្តាលវិជ្ជាជីវៈ និងបច្ចេកទេសក្នុងប្រទេស លើជំនាញចំនួន៣៨ ក្នុងវិស័យអាទិភាពចំនួន១០ដូចជា សំណង់ អគ្គិសនី និងថាមពល អេឡិចត្រូនិក ម៉ាស៊ីនត្រជាក់ និងកំដៅ ការផលិត មេកានិចទូទៅ និងមេកានិចរថយន្ត ទេសចរណ៍ សេវាកម្ម កសិកម្ម និងកសិឧស្សាហកម្ម ព្រមទាំងអាជីវកម្ម និងបច្ចេកវិទ្យាព័ត៌មាន។
សម្តេចបានបន្ថែមថា “យើងមានទំនុកចិត្តថា កម្មវិធីនេះនឹងរួមចំណែកក្នុងការកាត់បន្ថយភាពក្រីក្រ របស់ប្រទេសកម្ពុជាមកនៅក្រោមកម្រិត១០ភាគរយ”។
យោងតាមរបាយការណ៍របស់កម្មវិធី អភិវឌ្ឍន៍អង្គការសហប្រជាជាតិ (UNDP) បានឱ្យដឹងថា អត្រានៃភាពក្រីក្រនៅក្នុងប្រទេសកម្ពុជាមានចំនួន១៦,៦ភាគរយ ក្នុងឆ្នាំ២០២២ ដោយធ្លាក់ចុះពី៣៦,៧ភាគរយកាលពីឆ្នាំ២០១៤៕Xinhua៕
