សមាគមពាណិជ្ជករគ្រឿងអលង្ការ និងត្បូងមានតម្លៃកម្ពុជានឹង រៀបចំសន្និសីទសារព័ត៌មាននៅថ្ងៃទី១៥វិច្ឆិកាខាងមុខនេះ

ដោយ: គង់ លាងហួរ
ភ្នំពេញ: សមាគមពាណិជ្ជករគ្រឿងអលង្ការ និងត្បូងមានតម្លៃកម្ពុជា គ្រោងនឹងរៀបចំសន្និសីទសារព័ត៌មានស្តីពី ពិព័រណ៍គ្រឿងអលង្ការ និងត្បូងកម្ពុជាអន្តរជាតិ លើកទី១៥ ឆ្នាំ២០២៤ ក្នុងពេលឆាប់ៗខាងមុខនេះ។
យោងតាមសេចក្តីប្រកាសពត៌មាន របស់សមាគមបានឱ្យដឹងថា សន្និសីទសារព័ត៌មាននេះ គ្រោងនឹងប្រព្រឹត្តទៅនៅថ្ងៃទី១៥ ខែវិច្ឆិកា ឆ្នាំ២០២៣ វេលាម៉ោង២:០០ ដល់ម៉ោង ៥:០០សៀល នៅសាលប្រជុំអគារព្រីនស៍ (Prince Holding Group) ជាន់ទី៥ ក្នុងទីក្រុងកោះពេជ្រ រាជធានីភ្នំពេញ។

ជាមួយគ្នានេះ សមាគមពាណិជ្ជករគ្រឿងអលង្ការ និងត្បូងមានតម្លៃកម្ពុជាក៏បានប្រកាសអញ្ជើញ ឯកឧត្តម លោកឧកញ្ញ៉ា លោកជំទាវ លោក លោកស្រី អាជីវករ ក្រុមហ៊ុនគ្រឿងអលង្ការ និងបណ្តាក្រុមហ៊ុនដូចជា វិស័យធនាគារ វិស័យរថយន្ត វិស័យទូរស័ព្ទ វិស័យអចលនទ្រព្យ និងវិស័យពាក់ព័ន្ធផ្សេងៗ ក៏ដូចភ្ញៀវជាតិ-អន្តរជាតិ ដើម្បីចូលរួមទទួលបានព័ត៌មាន លំអិតសំខាន់ៗអំពីការតាំងពិព័រណ៍នេះផងដែរ។

លោក អ៊ួន ពេជ្រភីរម្យ នាយកបត្តិបត្តិក្រុមហ៊ុន ស៊ី.អាយ.ជី.ជេ.អេហ្វ.ខូអិលធីឌី នឹងថ្លែងអំពីគោលបំណង នៃការចុះអនុស្សរណៈយោគយល់ និងការរៀបចំកម្មវិធីដេញថ្លៃម្កុដ របស់កម្មវិធីនារីឯកគ្រឿងអលង្ការ និងត្បូងអន្តរជាតិក្នុងសន្និសីទនេះ។

លើសពីនេះ កម្មវិធីនេះ នឹងមានការរៀបចំពិធីចុះអនុស្សរណៈយោគយល់គ្នា រវាងសមាគមពាណិជ្ជករគ្រឿងអលង្ការ និងត្បូងមានតម្លៃកម្ពុជា និងក្រុមហ៊ុន ស៊ី.អាយ.ជី.ជេ.អេហ្វ.ខូអិលធីឌី។
សេចក្តីប្រកាសព័ត៌មានបានបញ្ជាក់ថា ថ្នាក់ដឹកនាំក្រុមហ៊ុនឯកជននានា ដែលមានបំណងចង់ចូលរួមក្នុងសន្និសីទនេះ ដើម្បីសាកសួរព័ត៌មាន អាចចូលរួមកម្មវិធីនេះបានដោយសេរី ហើយអ្នកសារព័ត៌មានជាតិ អន្តរជាតិនឹងត្រូវស្វាគមន៍ដោយភាពកក់ក្តៅផងដែរ៕
ពត៌មានលំអិត: https://docs.cigjf.org/CIGJF-Group-Companies