ដោយ: គង់ លាងហួរ
ហ្សាការតា: ប្រទេសឥណ្ឌូនេស៊ី បានបើកសម្ពោធកសិដ្ឋានថាមពលពន្លឺព្រះអាទិត្យ បណ្តែតទឹកតម្លៃ១០០លានដុល្លារ ដែលជាកសិដ្ឋានធំបំផុតនៅតំបន់អាស៊ីអាគ្នេយ៍ ខណៈប្រទេសនេះកំពុងងាកទៅរកប្រភពថាមពលបៃតងកកើតឡើងវិញ។
កសិដ្ឋានថាមពលពន្លឺព្រះអាទិត្យ បណ្តែតទឹកស៊ីរ៉ាតា (Cirata) ដែលអាចផលិតអគ្គិសនីគ្រប់គ្រាន់ សម្រាប់ផ្តល់ថាមពលដល់គ្រួសារចំនួន៥០.០០០ ត្រូវបានសាងសង់នៅលើអាងស្តុកទឹកទំហំ២០០ ហិកតា នៅក្នុងខេត្តជ្វាខាងលិច ដែលស្ថិតនៅចម្ងាយប្រហែល១៣០គីឡូម៉ែត្រពីរដ្ឋធានីហ្សាការតា។
ប្រធានាធិបតីឥណ្ឌូនេស៊ី លោកJoko Widodo បានថ្លែងសន្ទរកថាក្នុងពិធីសម្ភោធនោះថា “ថ្ងៃនេះជាថ្ងៃប្រវត្តិសាស្ត្រមួយ ខណៈក្តីសុបិនដ៏ធំរបស់យើង ក្នុងការសាងសង់រោងចក្រថាមពល កកើតឡើងវិញទ្រង់ទ្រាយធំ នៅទីបំផុតគឺសម្រេចបានហើយ”។
លោកបានបន្តថា “ពេលនេះ យើងអាចសាងសង់កសិដ្ឋានថាមពលពន្លឺព្រះអាទិត្យ បណ្តែតទឹកដ៏ធំបំផុតទី១ នៅតំបន់អាស៊ីអាគ្នេយ៍ និងធំជាងគេបំផុតទី៣ នៅលើពិភពលោកប្រកបដោយជោគជ័យ”។
គម្រោងនេះគឺជាកិច្ចសហប្រតិបត្តិការ រវាងក្រុមហ៊ុនអគ្គិសនីជាតិរបស់ឥណ្ឌូនេស៊ី Perusahaan Listrik Negara និងក្រុមហ៊ុនថាមពលកកើតឡើងវិញ Masdar ដែលមានមូលដ្ឋាននៅរាជធានីអាប៊ូដាប៊ី (Abu Dhabi) នៃប្រទេសសហភាពអារ៉ាប់រួម។
គម្រោងខ្នាតយក្សមួយនេះ នឹងចំណាយរយៈពេល៣ឆ្នាំ ដើម្បីបញ្ចប់ការសាងសង់រួចជាស្ថាពរ និងចំណាយថវិកាអស់ប្រហែល១០០លានដុល្លារ។
គម្រោងកសិដ្ឋានថាមពល ពន្លឺព្រះអាទិត្យមួយនេះ ទទួលបានមូលនិធិ ពីក្រុមហ៊ុន Sumitomo Mitsui Banking Corporation ក្រុមហ៊ុន Societe Generale និងក្រុមហ៊ុន Standard Chartered ហើយកសិដ្ឋាន មានបន្ទះស្រូបពន្លឺព្រះអាទិត្យ ចំនួន៣៤០.០០០បន្ទះ។
ជាមួយគ្នានេះ រដ្ឋាភិបាលឥណ្ឌូនេស៊ី បានប្រកាសប្តេជ្ញាចិត្តថា ខ្លួននឹងខិតខំព្យាយាម សម្រេចឱ្យបាននូវគោលដៅ នៃការបំភាយឧស្ម័នផ្ទះកញ្ចក់សូន្យ (Net-Zero emission) នៅត្រឹមឆ្នាំ២០៦០ខាងមុខ៕
