ដោយ: គង់ លាងហួរ
អន្តរជាតិ: ផ្សារហ៊ុននៅតំបន់អាសុីបានងើបឡើងថ្លៃនៅថ្ងៃសុក្រនេះ ហើយប្រាក់ដុល្លារអាមេរិកបានធ្លាក់ថ្លៃចុះ ខណៈអ្នកវិនិយោគិនភ្នាល់ថា ធនាគារកណ្តាលអាមេរិក(Fed) អាចនឹងបញ្ចប់ការដំឡើងអត្រាការប្រាក់របស់ខ្លួនហើយ។
ផលបត្ររតនាគារអាមេរិករយៈពេល១០ឆ្នាំ បានធ្លាក់ចុះលើសពី២០ពិន្ទុមូលដ្ឋាន ចាប់តាំងពីធនាគារកណ្តាលអាមេរិកបានសម្រេចចិត្តរក្សាអត្រាការប្រាក់ឱ្យនៅថេរដដែលក្នុងកិច្ចប្រជុំរបស់ខ្លួនកាលពីថ្ងៃពុធកន្លងទៅ។
សន្ទស្សន៍ ភាគហ៊ុន អាស៊ី ប៉ាស៊ីហ្វិក របស់ក្រុមហ៊ុនអាមេរិក MSCI នៅក្រៅប្រទេសជប៉ុន បានងើបឡើងថ្លៃ០,៩ភាគរយនៅថ្ងៃសុក្រនេះ។
ផ្សារហ៊ុន Nikkei (Nikkei 225) បានងើបឡើងថ្លៃ១,១០ភាគរយ ខណៈផ្សារហ៊ុនហុងកុង Hang Seng បានងើបឡើងថ្លៃ២,១៣ភាគរយ។
ចំណែកឯ សន្ទស្សន៍ផ្សារហ៊ុនចិនដីគោក CSI 300 បានងើបឡើងថ្លៃ០,៧៨ភាគរយ ខណៈសន្ទស្សន៍ផ្សារហ៊ុនshanghai composite បានងើបឡើងថ្លៃ០,៧០ភាគរយ។
សន្ទស្សន៍ប្រាក់ដុល្លារ ដែលវាស់វែងរូបិយប័ណ្ណអាមេរិក ធៀបនឹងរូបិយប័ណ្ណធំៗចំនួន៦ ស្ថិតនៅត្រឹម១០៦,២២ពិន្ទុ បន្ទាប់ពីបានធ្លាក់ថ្លៃចុះដល់កម្រិតទាបបំផុតក្នុងរយៈពេល១សប្តាហ៍ គឺ១០៥,៨ពិន្ទុ កាលពីថ្ងៃព្រហស្បតិ៍។
តម្លៃប្រេងបានកើនឡើងនៅថ្ងៃសុក្រនេះ។តម្លៃប្រេងឆៅ Brent futures បានកើនឡើង៦សេន ដល់៨៦,៩១ដុល្លារ ក្នុងមួយបារ៉ែល គិតត្រឹមម៉ោងសកល 0010 GMT ខណៈតម្លៃប្រេងឆៅអាមេរិកU.S. West Texas Intermediate futures បានកើនឡើង១២សេន ឬ០,២ភាគរយដល់៨២,៥៨ដុល្លារក្នុងមួយបារ៉ែល៕
